ބަންގްލަދޭޝްގައި އެކުލަވައިލާފައިވާ ވަގުތީ ސަރުކާރުގެ އިސް މުޝީރު ކަމުގެ މަޤާމަށް ނޮބެލް ސުލްޙައިގެ އިނާމު ހާސިލު ކުރައްވާފައިވާ މުޙައްމަދު ޔޫނުސް ޢައްުޔަން ކޮށްފިއެވެ. އޭނާ އެ މަޤާމަށް ޢައްޔަން ކޮށްފައި ވަނީ ރައީސް މުޙައްމަދު ޝިހާބުއްދީންގެ ރަސްމީ ގެކޮޅުގައި އެ ކަމަށް ޓަކައި ބޭއްވި ޚާއްޞަ ރަސްމިއްޔާތެއްގައެވެ.
ބަންގްލަދޭޝްގައި ވަގުތީ ސަރުކާރެއް އެކުލަވައިލާފައި ވަނީ ބޮޑުވަޒީރު ކަމުގެ މަޤާމުގައި ހުންނެވި ޝައިޚް ޙަސީނާ އިސްތިޢުފާ ދެއްވައި, ޤައުމު ދޫކޮށް ވަޑައިގެންނެވުމާ ގުޅިގެންނެވެ. ޙަސީނާ އިސްތިޢުފާ ދެއްވާފައި ވަނީ ބަންގްލަދޭޝްގެ ކޮލެޖުތަކާއި ޔުނިވަރސިޓީތަކުގެ ދަރިވަރުން ޖުލައި މަހުން ފެށިގެން އޭނާގެ ސަރުކާރާ ދެކޮޅަށް ކުރަމުން ދިޔަ މުޒާހަރާތަކާ ގުޅިގެންނެވެ.
އައު ސަރުކާރުގެ އިސް މުޝީރު ކަމުގެ މަޤާމަށް ޔޫނުސް ޢައްޔަން ކުރުމާ އެކު, ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވަނީ އޭނާއަށް މަރުޙަބާ ދަންނަވާފައެވެ. ޔޫނުސަށް މަރުޙަބާ ދަންނަވައި އެކްސްގައި ޝާއިޢު ކުރެއްވި ޕޯސްޓެއްގައި ރައީސުލްޖުމްހޫރިއްޔާ ވަނީ ބަންގްލަދޭޝަކީ ދިވެހިރާއްޖޭގެ ޒަމާންވީ ގާތް ރަޙުމަތްތެރިއެއް ކަން ފާހަގަ ކުރައްވާފައެވެ. އަދި, ޔޫނުސްގެ މުޝީރު ކަމުގެ ދަށުގައި ބަންގްލަދޭޝާއި އެ ޤައުމުގެ ރައްޔިތުންނަށް ސުލްޙައާއި ފާގަތިކަން ލިބުމަށް ދިވެހިރާއްޖެއިން އަބަދުމެ އެދޭ ކަމުގައި ވެސް ރައީސުލްޖުމްހޫރިއްޔާ ފާހަގަ ކުރެއްވިއެވެ.
ހުސްވި ޖުލައި މަހުގެ މެދެއްހާ ހިސާބުގައި ޙަސީނާގެ ސަރުކާރާ ދެކޮޅަށް ދަރިވަރުން މުޒާހަރާ ކުރަން ފަށާފައި ވަނީ ސަރުކާރުގެ ވަޒީފާތަކަށް މީހުން ޢައްޔަން ކުރުމުގައި އަމަލު ކުރަމުން ދިޔަ ކޯޓާ ނިޒާމާ ދެކޮޅަށެވެ. ނަމަވެސް, އެ މުޒާހަރާތައް ރޫޅައިލަން ފުލުހުން ބާރުގެ ބޭނުންކޮށް, ގިނަ ޢަދަދެއްގެ ދަރިވަރުން މަރައިލުމާ ގުޅިގެން މުޒާހަރާތައް ހޫނުވެ, ޙަސީނާގެ އިސްތިޢުފާއަށް ބާރު އަޅަން ފެށިއެވެ. މުޒާހަރާތަކުގެ ތެރެއިން ހިނގި ހަމަނުޖެހުންތަކުގައި މަރުވި މީހުންގެ ޢަދަދު ވަނީ 300އަށް އުފުލިފައެވެ. އަދި, އެތަކެއް ހާސް ބަޔަކު ޒަޚަމުވިއެވެ.
އަައު ސަރުކާރުގެ އިސް މުޝީރުގެ މަޤާމަށް ޔޫނުސް ޢައްޔަން ކުރުމަށް ޝިހާބުއްދީން ނިންމަވާފައި ވަނީ, މުޒާހަރާ ކުރަމުންދާ ދަރިވަރުންގެ ޑިމާޑުތަކަށް އިޖާބަ ދިނުމުގެ ގޮތުންނެވެ. ފަރަންސޭސިވިލާތުގެ ވެރިރަށް ޕެރިހުގައި ބޭސްފަރުވާއަކަށް ވަޑައިގެން ހުންނެވި ޔޫނުސް އެނބުރި ދާކާއަށް ވަޑައިގަންނަވާފައި ވަނީ އޮގަސްޓު 8ވަނަ ދުވަހުއެވެ. މުޒާހަރާގެ ބައިވެރިން ވަނީ އޭނާއަށް ވަރަށް ހޫނު މަރުޙަބާއެއް ކިޔާފައެވެ.
"މި ޤައުމަކީ ވަރަށް ރީތި ޤައުމަކަށް ބަދަލު ކޮށްލުމަށް ބޮޑެތި ފުރުޞަތުތަކެއް އެބައޮތް. އަޅުގަނޑު ކުރިއަށް ދާން ބޭނުމީ މި ޤައުމުގެ ދަރިވަރުން ދައްކާ މަގަކުން،" ދާކާއަށް ވަޑައިގެންނެވުމަށް ފަހު ނޫސްވެރިންނާ ވާހަކަފުޅު ދައްކަވަމުން ޔޫނުސް ވިދާޅުވިއެވެ. ޔޫނުސް ގަބޫލު ކުރައްވާ ގޮތުގައި ޙަސީނާގެ ޚުދްމުޚްތާރު ކަމުން ޤައުމު ސަލާމަތް ކޮށްދީފައި ވަނީ އެ ޤައުމުގެ ދަރިވަރުންނެވެ.
"މި ވަގުތަކީ އަލުން ތެދުވަންވީ ވަގުތު. ސަރުކާރާއި ދިފާޢީ އޮފިޝަލުންނަށް ބުނަން އޮތީ - އަޅުގަނޑުމެން އެންމެންނަކީ އެއް ޢާއިލާއެކޭ, ކުރިއަށް ދާންވާނީ ވެސް އެކުގައޭ،" ޔޫނުސް ވިދާޅުވިއެވެ.
ބަންގްލަދޭޝްގެ މީޑިޔާތަކުން ރިޕޯޓު ކުރާ ގޮތުގައި, ޙަސީނާގެ ސަރުކާރާ ދެކޮޅަށް މުޒާހަރާތައް އިންތިޒާމު ކުރި ހަރަކާތުގައި އިސްކޮށް ބައިވެރިވި ދެ ދަރިވަރުން ކަމުގައިވާ ނާހިދް އަލް-އިސްލާމާއި އާސިފް އަލް-މަޙްމޫދަށް ވެސް ވަގުތީ ސަރުކާރުން ޖާގައެއް ދޭނެއެވެ. ނަމަވެސް, އެއްވެސް ރަސްމީ އިދާރާއަކުން އެ ކަން ކަށަވަރު ކޮށްދީފައެއް ނެތެވެ. އެ ސަރުކާރުގައި ބައިވެރިވުމުގެ ފުރުޞަތު ޙަސީނާގެ އަވާމީ ލީގަކަށް ނޯންނާނެއެވެ.
ޢުމުރުން 84 އަހަރުގެ ޔޫނުސަކީ, ބަންގްލަދޭޝްގެ ފަގީރު ޢާއިލާތަކަށް އެހީތެރިކަން ފޯރުކޮށްދޭން ހަރުދަނާ މަސައްކަތްތަކެއް ކުރައްވާފައިވާ ބޭފުޅެކެވެ. އެ ގޮތުން, އޭނާގެ ގްރާމީން ބޭންކުން ވަނީ ފަޤީރު ޢާއިލާތަކަށް މާލީ އެހީތެރިކަން ފޯރުކޮށް ދިނުމަށް 100 ޑޮލަރުން ދަށުގެ ކުދި ލޯނު ދޫކުރުމުުގެ ޕުރޮގުރާމެއް ހިންގާފައެވެ. ޔޫނުސާއި ގްރީމަން ބޭންކަން ނޮބެލް ސުލްޙައިގެ އިނާމު ލިބިފައިވާ އެ ޕުރޮގުރާމާ ގުޅިގެންނެވެ.