ޔަހޫދީ ފައުޖުގެ ހައްދުފަހަނަ އެޅި ސިފައިން ފަލަސްޠީނުގެ ޣައްޒާއަށް ބޮންއަޅައި 40 މީހުން ޝަހީދު ކޮށްލައިފިއެވެ. ފާއިތުވި ހަފުތާއެއްހާ ދުވަހުގެ ތެރޭގައި ޔަހޫދީ ފައުޖުން ވަނީ ޣައްޒާގެ މުސްލިމުންނަށް އަމާޒުކޮށް ދެމުންދާ ރަޙުމު ކުޑަ ޙަމަލާތައް އިތުރު ކޮށްފައެވެ. ޢުދުވާން ފުޅާ ކޮށްފައި ވަނީ, އީރާންގެ ވެރިރަށް ތަހްރާނުގައި ދިން ޙަމަލާއެއްގައި ޣައްޒާގައި ވެރިކަން ކުރާ ޙަމާސް ޖަމާޢަތުގެ ސިޔާސީ ގޮފީގެ ވެރިޔާ އިސްމާޢީލް ހަނިއްޔާ ޝަހީދު ކޮށްލުމުން, ބިރުވެރި ކަމެއްގެ ތެރެއަށް ޔަހޫދީން ވެއްޓިފައިވާ ދަނޑިވަޅެއްގައެވެ.
ޔަހޫދީ ފައުޖުން ޣައްޒާއަށްް އެންމެ ފަހުން ދީފައިވާ ގިނަ ޙަމަލާތައް އަމާޒު ކޮށްފައި ވަނީ ރެފިއުޖީ ކޭމްޕުތަކުގައި ޢާންމުން ދިރިއުޅޭ ފޭލިގެތަކަށްށެވެ. ޣައްޒާގެ ޞިއްޙީ ޚިދުމަތްތެރިން ބުނީ, އަލް-ބުރަޔިޖު ރެފިއުޖީ ކޭމްޕުގައި ޢާންމުން ދިރިއުޅޭ ފޭލިގެތަކަށް ޔަހޫދީ ފައުޖުން ދިން ރަޙުމު ކުޑަ ޙަމަލާތަކެއްގައި 15 މީހުން ޝަހީދު ކޮށްލި ކަމުގައެވެ. އަދި, އަލް-ނުޞަޔިރާތު ރެފިއުޖީ ކޭމްޕަށް ބޮން އަޅައި އިތުރު ހަތަރު މީހުން ޝަހީދު ކޮށްލިއެވެ. އެއީ, ވަރަށް ގިނަ ޢަދަދެއްގެ ރެފިއުޖީން ދިރިއުޅެމުންދާ ކޭމްޕުތަކެކެވެ.
ޔަހޫދީ ފައުޖުގެ ޙަމަލާތައް ޣައްޒާގެ އުތުރާއި ދެކުނަށް ވެސް އަމާޒުކޮށްފައިވެއެވެ. އެ ގޮތުން, ޣައްޒާގެ އުތުރުގައި އޮތް ޣައްޒާ ސިޓީގައި ޢާންމުން ދިރިއުޅޭ ގެއަކަށް ބޮން އަޅައި ޔަހޫދީ ފައުޖުން ވަނީ ފަސް މީހުން ޝަހީދު ކޮށްލާފައެވެ. އަދި, ދެކުނުގައި އޮތް ޚާން ޔޫނިސަށް ދިން ރަޙުމު ކުޑަ ޙަމަލާތަކެއްގައި އެކަކު ޝަހީދު ކޮށްލައި ގިނަ ޢަދަދެއްގެ ބަޔަކު ޒަޚަމު ކޮށްލިއެވެ. އޮގަސްޓު 8ވަނަ ދުވަހު ޔަހޫދީ ފައުޖުން ވަނީ ޣައްޒާ ސިޓީގެ އިރުމަތީގައި ހިންގާ ދެ މަދަރުސާއަކަށް ބޮން އަޅައި އިތުރު 15 މީހުން ޝަހީދު ކޮށްލާފައެވެ. އޭގެ ތެރޭގައި ވެސް ގިނައީ ކުށެއް ނެތް އަންހެނުންނާއި މައުސޫމު ކުޑަކުދިންނެވެ.
ޣައްޒާގެ މިނިވަން ކަމަށް ޖިހާދު ކުރަމުންދާ މުޖާހިދުންގެ ޖަމާޢަތްތަކުން ދަނީ ޔަހޫދީ ފައުޖުގެ ނިރުބަވެރި ސިފައިންނަށް ވަރުގަދައަށް ރައްދު ދެމުންނެވެ. އެ ގޮތުން, ޙަމާސާއި އިސްލާމިކް ޖިހާދުގެ މުޖާހިދުން ދަނީ ޔަހޫދީންގެ ރަށްތަކަށް ރޮކެޓު ޙަމަލާތައް އަމާޒު ކުރަމުންނެވެ. ެއ ޙަމަލާތަކުގައި ޔަހޫދީ ފައުޖުގެ ސިފައިންގެ ބަޔަކު މަރުވެ, އިތުރު ބަޔަކު ޒަޚަމުވެފައިވާ ކަމުގައި އެ ޖަމާޢަތްތަކުން ބުންޏެވެ.
ހަނިއްޔާގެ އިތުރުން ލުބްނާންގެ ވެރިރަށް ބައިރޫތަށް ޙަމަލާދީ މުޖާހިދުންގެ ޖަމާޢަތް, ޙިޒްބުاللهގެ އަސްކަރީ ކޮމާންޑަރު ފުޢާދު ޝުކްރު ޝަހީދު ކޮށްލުމުން ޔަހޫދީންނާ މެދު އޮތް ނަފުރަތު އިތުރުވެ, އެ މީހުން ވަނީ ބިރުވެރިކަމެއްގެ ތެރެއަށް ވެއްޓިފައެވެ. އީރާނުގެ އިތުރުން އެކްސިސް އޮފް ރެސިސްޓެންސްގައި ހިމެނޭ މުޖާހިދުންނާއި ހަތިޔާރު އެޅި ޖަމާޢަތްތަކުން ވަނީ ޔަހޫދީންގެ ކިބައިން ބަދަލު ހިފާނެ ކަމުގެ އިންޒާރު ދީފައެވެ. އެ އިންޒާރުތަކާ ގުޅިގެން ޔަހޫދީން ދަނީ, މުޖާހިދުން ދީފާނެ ނުރައްކާތެރި އަދި ވަރުގަދަ ޙަމަލާއަކުން ދިފާޢުވުމަށް ރައްކާތެރި ކަމުގެ ފިޔަވަޅުތައް އަޅަމުންނެވެ. ހަނިއްޔާއާއި ޝުކްރު ޝަހީދު ކޮށްލުމުން މެދުއިރުމަތީގައި ނުރައްކާތެރި ހަނގުރާމައެއް ފެށިދާނެ ކަމުގެ ބިރު ވަނީ ބޮޑުވެފައެވެ.
ޔަހޫދީންނަށް ނުރައްކާތެރި އަދި ބިރުވެރި ދުވަސްތަކެއް ކުރިމަތިވެފައިވީ ނަމަވެސް, ޔަހޫދީ ފައުޖުން ދަނީ ޣައްޒާގައި ހިންގަމުންދާ ޢުދުވާން އެންމެ ހިނދު ކޮޅަކަށް ވެސް މެދުކަނޑައިލަން ދެކޮޅު ހަދަމުންނެވެ. ޔަހޫދީ ފައުޖުން މިހާރު ދަނީ ޚާން ޔޫނިސަށް ތިންވަނަ ފަހަރަކަށް އެއްގަމު މަގުން އަރައި ޢުދުވާންތައް ފުޅާ ކުރަން ތައްޔާރުވަމުންނެވެ. ޚާން ޔޫނިސްގެ އިތުރުން ޣައްޒާގެ އުތުރުގައި އޮންނަ ބަޔިތު ޙާނޫނާއި ބަޔިތު ލާހިޔާ ހުސްކުރަން ޔަހޫދީ ފައުޖުން ވަނީ އަންގާފައެވެ.
ފަލަސްޠީނުގައި ނިކަމެތި ކޮށްލާފައިވާ ރައްޔިތުންނަށް ކާބޯތަކެއްޗާއި އިންސާނީ އެހީތެރިކަން ފޯރު ކޮށްދޭން މަސައްކަތް ކުރަމުންދާ ބައިނަލްއަޤުވާމީ ޖަމުޢިއްޔާތަކުގެ މުވައްޒަފުންނަށް ވެސް ޔަހޫދީ ފައުޖުގެ ނުރައްކަލުން ސަލާމަތެއް ނެތެވެ. ދާދި ފަހުން ދަޔިރް އަލް-ބަލަޙަށް ޔަހޫދީ ފައުޖުން ދިން ޙަމަލާއެއްގައި, އެމެރިކާގެ އިންސާނީ އެހީދޭ ޖަމުޢިއްޔާ, ވަރލްޑް ސެންޓްރަލް ކިޗަން (ޑަބްލިޔުސީކޭ)ގެ އިޖުތިމާޢީ ޚިދުމަތްތެރިއެއް ކަމުގައިވާ ނާދީ ސަލޫތް ވަނީ ޝަހީދު ކޮށްލާފައެވެ.
ސަލޫތް ޝަހީދު ކޮށްލުމުން ޑަބްލިޔުސީކޭން ވަނީ ކަންބޮޑުވުން ފާޅު ކޮށްފައެވެ. އެއީ, ޔަހޫދީ ފައުޖުން އެ ޖަމުޢިއްޔާގެ މުވައްޒަފުންތަކެއް ޝަހީދު ކޮށްލާފައިވާ ފުރަތަމަ ފަހަރެއް ނޫނެވެ. އޭޕްރިލް މަހު ޔަހޫދީ ފައުޖުން ދިން ރަޙުމު ކުޑަ ޙަމަލާތަކެއްގައި ވެސް އެ ޖަމުޢިއްޔާގެ ހަތް މުވައްޒަފުން ޝަހީދު ކޮށްލިއެވެ. އެ ހާދިސާއާ ގުޅިގެން ޑަބްލިޔުސީކޭން ކާބޯތަކެއްޗާއި އިންސާނީ އެހީގެ ސާމާނު ބެހުމަށް ކުރަމުން ދިޔަ މަސައްކަތްތައް މެދުކެނޑުނެވެ.
2023 އޮކްޓޫބަރު 7ން ފެށިގެން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 39,699އަށް އުފުލިފައެވެ. އޭގެ ތެރޭގައި 16،000އަށްވުރެ ގިނަ ޢަދަދަކަށް މައުސޫމު ކުޑަކުދިން ހިމެނެއެވެ. އަދި، ޔަހޫދީ ފައުޖުން ސުންނާފަތި ކޮށްލާފައިވާ އިމާރާތްތަކުގެ ދަށުގައި އިތުރު 10،000އަށްވުރެ ގިނަ މީހުންގެ ހަށިތައް ތާށިވެފައިވާ ކަމުގައި ޣައްޒާގެ އޮފިޝަލުން ގަބޫލު ކުރެއެވެ. ޔަހޫދީންގެ ރަޙުމު ކުޑަ ޙަމަލާތަކުގައި ޒަޚަމު ކޮށްލާފައިވާ މީހުންގެ ޢަދަދު ވަނީ 91,722އަށް އުފުލިފައެވެ.