ބަންގްލަދޭޝްގެ ވަގުތީ ސަރުކާރުން ޢާންމު އިންތިޚާބު އިޢުލާނު ކުރުމުން ކުރީގެ ބޮޑުވަޒީރު ޝައިޚް ޙަސީނާ ޤައުމަށް އެނބުރި ވަޑައިގަންނަވާނެ ކަމުގައި އެ ކަމަނާގެ ދަރިކަލުން ހާމަ ކުރައްވައިފިއެވެ. ސަރުކާރާ ދެކޮޅަށް ފެށި ބޮޑު މުޒާހަރާތަކާ ގުޅިގެން އިސްތިޢުފާ ދެއްވުމަށް ފަހު ޤައުމު ދޫކޮށް ޙަސީނާ ވަނީ އިންޑިޔާއަށް ވަޑައިގަންނަވާފައެވެ. ވަގުތީ ސަރުކާރު އެކުލަވައިލާފައި ވަނީ އޭނާ އިސްތިޢުފާ ދެއްވުމުންނެވެ.
ޙަސީނާގެ ސަރުކާރާ ދެކޮޅަށް މުޒާހަރާ ކުރި ދަރިވަރުންގެ ޑިމާންޑުތަކަށް ބޯލެނބުމުގެ ގޮތުން, ވަގުތީ ސަރުކާރުގެ އިސް މުޝީރުގެ ގޮތުގައި ޢައްޔަން ކޮށްފައި ވަނީ ނޮބެލް ސުލްޙައިގެ އިނާމާ ހާސިލު ކުރައްވާފައިވާ މުޙައްމަދު ޔޫނުސެވެ. އޭނާ ވަނީ, ރައީސް މުޙައްމަދު ޝިހާބުއްދީންގެ ކުރިމަތީގައި މަޤާމުގެ ހުވައި ކުރައްވައި, މަސްއޫލިއްޔަތުތަކާ ހަވާލުވެ ވަޑައިގަންނަވާފައެވެ. ވަގުތީ ސަރުކާރުގެ މައިގަނޑު ޒިންމާއަކީ އަމަންއަމާން ކަން ގާއިމުކޮށް, ސުލްޙަވެރި އަދި އިންސާފުވެރި އިންތިޚާބެއް ބޭއްވުމެވެ.
76 އަހަރުގެ ޙަސީނާގެ ދަރިކަލުން ސަދީބް ވާޒިބް ޖޯއި ވިދާޅުވީ ވަގުތީ ސަރުކާރުން އިންތިޚާބު އިޢުލާނު ކުރުމުން ޙަސީނާ އެނބުރި ދާކާއަށް ވަޑައިގަންނަވާނެ ކަމުގައެވެ. "އަޅުގަނޑުގެ މަންމާފުޅު ކުރިން ވިސްނަވާފައި އޮތީ ދައުރު ނިމުމުން ސިޔާސީ މައިދާނުން ވަކިވާން. ސިޔާސީ މައިދާނަށް ނިކުތުމެ އެއްވެސް ވިސްނުމެއް ޝަޢުޤެއް އަޅުގަނޑުގެ ކިބައިގައި ނެތް. ނަމަވެސް, ބަންގްލަދޭޝަށް ކުރިމަތިވި ކާރިސާއާ ގުޅިގެން ވެރިކަމުގައި ހުސްކަމެއް އުފެދިފައިވާ ކަމަށް ގަބޫލު ކުރަން. ސިޔާސީ ކަންކަމުގައި ހަރަކާތްތެރިވާ އަޅުގަނޑު ފެށީ ޕާޓީގެ [އަވާމީ ލީގް] މަސްލަޙަތަށް ޓަކައި،" ޖޯއި ވިދާޅުވިއެވެ.
ބަންގްލަދޭޝްގައި ވަގުތީ ސަރުކާރެއް އެކުލަަވައިލާފައި ވަނީ ޙަސީނާގެ އަވާމީ ލީގުގެ އެއްވެސް ބައިވެރިވުމެއް ނެތިއެވެ. އޭނާގެ ސަރުކާރާ ދެކޮޅަށް މުޒާހަރާއަށް ނިކުތް ކޮލެޖުތަކާއި ޔުނިވަރސިޓީތަކުގެ ދަރިވަރުން ހުއްޓުވަން ފުލުހުން ބާރުގެ ބޭނުން ކުރުމުން ހިނގި ހަމަނުޖެހުންތަކުގައި 300އަށްވުރެ ގިނަ މީހުން މަރުވިއެވެ. އަދި, އެތަކެއް ހާސް ބަޔަކު ޒަޚަމުވިއެވެ. އޭގެ ތެރޭގައި ގިނައީ ދަރިވަރުންނެވެ.
އިސްތިޢުފާ ދެއްވުމަށް ފަހު އިންޑިޔާއަށް ވަޑައިގެންނެވި ޙަސީނާ އިނގިރޭސިވިލާތުގެ ސަރުކާރުގެ ޙިމާޔަތް ހޯއްދަވަން މަސައްކަތް ކުރައްވަމުން ގެންދަވާ ކަމުގައި އިންޑިޔާގެ މީޑިޔާތަކުން ރިޕޯޓު ކުރިއެވެ. ނަމަވެސް, އިނގިރޭސިވިލާތުގެ ސަރުކާރުން ވެސް, ޙަސީނާގެ ފަރާތުން ވެސް އެ ކަން ކަށަވަރު ކޮށްދީފައެއް ނެތެވެ. ބަންގްލަދޭޝްގެ މަސްރަޙާ ގުޅޭ ގޮތުން އިންޑިޔާއާއި އިނގިރޭސިވިލާތުގެ ޚާރިޖީ ވަޒީރުން ދާދި ފަހުން ވަނީ މަޝްވަރާ ކުރައްވާފައެވެ.
ޙަސީނާ އަމަލު ކުރައްވަން ރާއްވަވާފައިވާ ގޮތް ނޭނގޭ ކަމަށާއި, ޙަސީނާގެ އަމިއްލަ މަސްލަޙަތާ ގުޅޭ ކަންކަމުގައި ބަސްބުނަން ބޭނުން ނުވާ ކަމުގައި ވެސް އިންޑިޔާ ސަރުކާރުން ބުނެފައިވެއެވެ. އޭނާއަށް އިންޑިޔާ ސަރުކާރުން ކިހާ ދުވަހަކު ޙިމާޔަތް ފޯރު ކޮށްދޭނެ ކަން އެ ޤައުމުން ސާފު ކޮށްދީފައެއް ނުވެއެވެ. އެ ކަމާ ގުޅޭ ގޮތުން ނޫސްވެރިން ސުވާލު ކުރުމުން އިންޑިޔާގެ ޚާރިޖީ ވުޒާރާގެ ތަރުޖަމާނު ރަންދީރް ޖަޔަސްވާލް ވިދާޅުވީ, އިންޑިޔާގައި މަޑު ކުރާނީ ކިހާ މުއްދަތަކަށް ކަން ދަންނަވަން އިނގޭނީ ޙަސީނާއަށް ކަމުގައެވެ. "އޭނާގެ ރޭވުންތަކާ މެދު އަޅުގަނޑުމެން ބަސް ބުނުމަކީ މުނާސިބު ކަމެއް ނޫން،" ޖަޔަސްވާލް ވިދާޅުވިއެވެ.