ސޫރިޔާގެ މެދުތެރޭގައި އޮންނަ ރަަށަކަށް ޔަހޫދީ ފައުޖުން ރަޙުމު ކުޑަ ވައިގެ ޙަމަލާތަކެއްދީ ސޫރިޔާ އަސްކަރިއްޔާގެ ހަތަރު ސިފައިން ޒަޚަމު ކޮށްލައިފިއެވެ.
ސޫރިޔާގެ ދަޢުލަތުގެ މީޑިޔާ ސާނާއިން ބުނީ ޙުއްމުޞްގެ ޝުޢަޔިރާތު އަސްކަރީ ވައިގެ މަރުކަޒަށް އަމާޒުކޮށް ޔަހޫދީ ފައުޖުން ދީފައިވާ ޙަމަލާތަކުގައި އެ ތަނަށް ބޮޑެތި ގެއްލުންތަކެއް ލިބިފައިވާ ކަމުގައެވެ. ސޫރިޔާގެ ސަލާމަތީ ބާރުގެ މަސްދަރުތަކާ ހަވާލާދީ ސާނާއިން ބުނީ, ސޫރިޔާއަށް ޙަމަލާ ދީފައި ވަނީ ލުބްނާންގެ އުތުރުގެ ސަރަޙައްދެއްގައި ތިބި ޔަހޫދީ ސިފައިން ކަމުގައެވެ.
އެއީ ޔަހޫދީ ފައުޖުން ބައިނަލްއަޤުވާމީ ޤާނޫނުތަކާ ޚިލާފަށް ސޫރިޔާގެ ސިޔާދަތީ މިނިވަންކަން ނިގުޅައިގަނެ, އެ ޤައުމުގެ ސަރަޙައްދުތަކަށް ވަދެ ޙަމަލާތައް ދީފައިވާ ފުރަތަމަ ފަހަރެއް ނޫނެވެ. ޔަހޫދީ ފައުޖުން ކުރިން ބުނެފައި ވަނީ, އެ ފަދަ ޙަމަލާތައް އަމާޒު ކުރަމުން ދަނީ ސޫރިޔާގައި ޙަރަކާތްތެރިވާ އީރާނާ ގުޅުން އޮތް މީހުންނާއި ޖަމާޢަތްތަކަށް ކަމުގައެވެ. 2023 އޮކްޓޫބަރު 7ގައި ފަލަސްޠީނުގެ ޣައްޒާގެ މުސްލިމުންނާ ދެކޮޅަށް ލާއިންސާނީ ޢުދުވާންތައް ފެށި ފަހުން ޔަހޫދީ ފައުޖުން ވަނީ ސޫރިޔާގެ އަމާޒުތަކަށް ދެމުންދާ ޙަމަލާތައް ވެސް އިތުރު ކޮށްފައެވެ.
2011ވަނަ އަހަރު ސޫރިޔާގައި ދާޚިލީ ހަނގުރާމަ ފެށުމާ އެކު ޔަހޫދީ ފައުޖުން ސޫރިޔާއަށް ޙަމަލާތައް އަމާޒު ކުރަން ފެށިއެވެ. އެ ޙަމަލާތައް އަމާޒު ކޮށްފައި ވަނީ ސޫރިޔާގައި ހަރަކާތްތެރިވަމުން ދިޔަ އީރާނުގެ އަސްކަރީ މުޝީރުންނާއި ސޫރިޔާގެ އަސްކަރިއްޔާގެ ސިފައިންނާއި މަރުކަޒުތަކަށެވެ. އެއީ, ލުބްނާންގެ މުޖާހިދުންގެ ޖަމާޢަތް, ޙިޒްބުاللهއަށް ހަތިޔާރު ފޯރުކޮށްދިނުން ހުއްޓުވުމުގެ ބޭނުމުގައި ދެމުންދާ ޙަމަލާތަކެއް ކަމަށް ޔަހޫދީ ފައުޖުން އެއިރު ބުނެފައިވެއެވެ.
މީގެ ހަފުތާއެއްހާ ދުވަސް ކުރިން ވެސް ޔަހޫދީ ފައުޖުން ސޫރިޔާއާއި ލުބްނާން ގުޅޭ ސަރަޙައްދީ ރޮނގު ކައިރީގައި އޮންނަ ޙޫޝް އަލް-ސައްޔިދް ޢަލީ އަވަށަށް ވައިގެ ޙަމަލާތަކެއް ދިނެވެ. އެ ޙަމަލާތައް އަމާޒު ކޮށްފައި ވަނީ ޙިޒްބުاللهގެ މުޖާހިދުން ދަތުރު ކުރަމުން ދިޔަ އުޅަނދަކަށެވެ. ޙުއްމުޞާ 20 މޭލު ދުރުގައި އޮންނަ ޙޫޝް އަލް-ސައްޔިދް ޢަލީއަށް ދިން ޙަމަލާތަކުގައި އެއްވެސް މީހެއްގެ ފުރާނައަށް ނުރައްކާވި ކަން ސާފެއް ނޫނެވެ.