މިޔަންމާ އަސްކަރިއްޔާއިން ދިން ޑްރޯން ޙަމަލާއެއްގައި ރޮހިންޔާ ދަރިކޮޅުގެ ޢާއިލާތަކެއް މަރައިލައިފި
މިޔަންމާގެ އަސްކަރިއްޔާއިން އެ ޤައުމުގައި ދިރިއުޅޭ ރޮހިންޔާ ދަރިކޮޅުގެ މުސްލިމުންނާ ދެކޮޅަށް ހިންގަމުންދާ ގަތުލުއާންމުގެ ދަށުން ރަޙުމު ކުޑަ ޑްރޯން ޙަމަލާތަކެއްދީ އެ ދަރިކޮޅުގެ ގިނަ ޢަދަދެއްގެ ބަޔަކު މަރައިލައިފިއެވެ. ގަތުލުއާންމުން ސަލާމަތްވާން އަމިއްލަ ވަޒަން ދޫކޮށް ހިޖުރަކުރަން މަސައްކަތް ކުރަމުން ދިޔަ މީހުންނަށް އަމާޒުކޮށް މިޔަންމާގެ އަސްކަރިއްޔާއިން ދިން ޙަމަލާގައި މަރައިލާފައިވާ މީހުންގެ ތެރޭގައި ގިނަ ޢަދަދެއްގެ ކުޑަކުދިން ހިމެނެއެވެ.
މަންޒަރު ފެނުނު މީހުން ބުނީ, މިޔަންމާގެ އަސްކަރިއްޔާގެ ޑްރޯން ޙަމަލާތައް އަމާޒު ކޮށްފައި ވަނީ, އެ ޤައުމު ދޫކޮށް ބަންގްލަދޭޝަށް ހިޖުރަ ކުރަން މަސައްކަތް ކުރަމުން ދިޔަ ޢާއިލާތަކަކަށް ކަމުގައެވެ. ޙަމަލާ ދިން ވަގުތު އެ މީހުން ދިޔައީ ނާފް ކޯރު ހުރަސް ކުރުމަށް ބޯތަކަށް އެރުމަށް ތައްޔާރުވަމުންނެވެ. އަސްކަރީ ޑްރޯންތަކުން ވަނީ ބޯޓުތަކަށް ވެސް ޙަމަލާތައް އަމާޒު ކޮށްފައެވެ.
މަރައިލާފައިވާ މީހުންގެ ތެރޭގައި ގިނަ ޢަދަދެއްގެ މާބަނޑު އަންހެނުންނާއި ތުއްތު ކުދިން ހިމެނޭ ކަމުގައި ވެސް މަންޒަރު ފެނުނު މީހުން ބުންޏެވެ. އެއީ, ރަކައިން ސްޓޭޓްގައި ދިރިއުޅޭ މުސްލިމުންނަށް އަމާޒުކޮށް މިޔަންމާގެ އަސްކަރިއްޔާއިން ފަހުގެ ތާރީޚެއްގައި ދީފައިވާ އެންމެ ނުރައްކާތެރި އަދި ރަޙުމު ކުޑަ ޙަމަލާތަކެވެ. އެ ޙަމަލާތަކުގެ ޒިންމާ އުފުލަން މިޔަންމާގެ އަސްކަރީ ސަރުކާރުން ދަނީ ދެކޮޅު ހަދަމުންނެވެ.
ޙަމަލާތަކުގައި މަރައިލާފައިވާ މީހުންގެ ޢަދަދު ސާފެއް ނޫނެވެ. ޙަމަލާ ދީފައިވާ ސަރަޙައްދުން ނަގާފައިވާ ވީޑިޔޯތަކުން ފެންނަނީ މަރައިލާފައިވާ ގިނަ ޢަދަދެއްގެ މީހުންގެ ހަށިތަކާއި ހަށިގަނޑުގެ ބައިތައް ކިސަޑު ހެދިފައިވާ ބިމުގައި އޮތް މަންޒަރެވެ. ޙަމަލާތަކުން ސަލާމަތްވި ބައެއް މީހުން ބުނީ, މަރަައިލާފައިވާ މީހުންގެ ޢަދަދު 200އަށްވުރެ އިތުރުވާނެ ކަމަށް ބެލެވޭ ކަމުގައެވެ.
ބަންގްލަދޭޝަށް ހިޖުރަ ކޮށްފައިވާ މިޔަންމާގެ ރޮހިންޔާ ދަރިކޮޅުގެ މީހުންނަށް އެހީތެރިކަން ފޯރުކޮށްދޭ ބައިނަލްއަޤުވާމީ ޖަމުޢިއްޔާ, ޑޮކްޓަރސް ވިތްއައުޓް ބޯޑަރސް (އެމްއެސްއެފު)ން ބުނީ ފާއިތުވި ހަފުތާއެއްހާ ދުވަހުގެ ތެރޭގައި ގިނަ ޢަދަދެއްގެ ބަޔަކު ބަންގަލަދޭޝަން ހިޖުރަ ކޮށްފައިވާ ކަމުގައެވެ. އޭގެ ތެރެއިން 39 މީހަކަށް ޞިއްޙީ ފަރުވާ ދޭން ޖެހުނު ކަމަށާއި, އެ މީހުން ޒަޚަމުވެފައިވާ ވަނީ މޯޓަރާއި ބަޑީގެ ޙަމަލާތަކުގައި ކަމަށް ވެސް އެމްއެސްއެފުން ހާމަކުރިއެވެ.
ރެފިއުޖީންނާ ބެހޭ އދގެ ހައި ކޮމިޝަނަރުގެ އިދާރާއިން ވަނީ ރޮހިންޔާ ދަރިކޮޅުގެ މީހުންނަށް އަމާޒުކޮށް މިޔަންމާގެ އަސްކަރިއްޔާއިން ހިންގަމުންދާ ގަތުލުއާންމު ފުޅާ ކުރުމާ ގުޅިގެން އެ ކަމާ މެދު ކަންބޮޑުވުން ފާޅު ކޮށްފައެވެ. އެ އިދާރާގެ ތަރުޖަމާނު ބުނީ, ބޭ އޮފް ބެންގާލް ކަނޑު ހުރަސްކޮށް ބަންގްލަދޭޝަށް ހިޖުރަ ކުރަން މަސައްކަތް ކުރި ރޮހިންޔާ ދަރިކޮޅު މުސްލިމުން ތިބި ދެ އުޅަނދަކަށް މިޔަންމާގެ އަސްކަރިއްޔާއިން ޙަމަލާ ދީފައިވާ ކަން ކަށަވަރު ކުރެވިފައިވާ ކަމުގައެވެ. ނަމަވެސް, މައުންދަވުގައި އެންމެ ފަހުން ދީފައިވާ ޙަމަލާތަކުގައި މަރައިލާފައިވާ މީހުންގެ ޢަދަދު ސާފު ނޫން ކަމުގައި އެ އިދާރާއިން ބުންޏެވެ.
ރޮހިންޔާ ދަރިކޮޅުގެ މުސްލިމުންނާ ދެކޮޅަށް މިޔަންމާގެ އަސްކަރިއްޔާއިން ދެމުންދާ ލާއިންސާނީ އަނިޔާތަކާއި ހިންގަމުންދާ ގަތުލުއާންމުން ސަލާމަތްވުމަށް 2017ވަނަ އަހަރަށް ފަހު 730,000އަށްވުރެ ގިނަ މީހުން ވަނީ ބަންގްލަދޭޝަށް ހިޖުރަ ކޮށްފައެވެ. ރޮހިންޔާ ދަރިކޮޅާ ދެކޮޅަށް މިޔަންމާގެ އަސްކަރިއްޔާއިން ގަތުލުއާންމެއް ހިންގަމުންދާ ކަމުގައި އދން ވެސް ވަނީ ކަނޑައަޅާފައެވެ. 2021ވަނަ އަހަރު ހިންގި ބަޣާވާތެއްގައި, މިޔަންމާގެ އަސްކަރިއްޔާއިން ވެރިކަން ފޭރިގަތް ފަހުން މިޔަންމާގެ މަސްރަޙު ވަނީ އިތުރަށް ގޯސްވެފައެވެ.