ޒުވާނުން: ފުރުޞަތުތަކުގެ ބޭނުންހިފައި، ޒިންމާދާރު، ހަރުދަނާ ބަޔަކަށްވާންޖެހޭ

މިއަދަކީ ބައިނަލްއަޤުވާމީ ޒުވާނުންގެ ދުވަހެވެ. ޒުވާނުންގެ ދުވަސް ކޮންމެ އަހަރަކުވެސް ފާހަގަކުރަނީ ޒުވާނުންނަށް ކުރިމަތިވާ އެކި މައްސަލަތައް ހައްލުކުރުމަށް ބައިނަލްއަޤުވާމީ ފެންވަރުގައި މަސައްކަތްކޮށް، މުޖުތަމަޢުގައި ޒުވާނުން ހޯދައި ކުރިއެރުންތައް ފާހަގަކުރުމުގެ މަޤުޞަދުގައެވެ. މިއަދަކީ މިގޮތަށް ފާހަގަކުރެވޭ 26 ވަނަ ޒުވާނުންގެ ދުވަހެވެ.

ޒުވާނުންގެ ދުވަހެއް އެންމެ ފުރަތަމަ ފާހަގަކުރީ 1998 ވަނަ އަހަރުއެވެ. މިދުވަސް ފާހަގަކުރަން ފެށީ ދުނިޔޭގެ އެކި ޤައުމުތަކުގެ ޒުވާނުންނާބެހޭ ވަޒީރުން ބައިވެރިވި ބައްދަލުވުމެއްގައި، އޮގަސްޓު މަހުގެ 12 ވަނަ ދުވަހަކީ ބައިނަލްއަޤުވާމީ ގޮތުން ފާހަގަކުރާ ޒުވާނުންގެ ދުވަސްކަމަށް ކަނޑައެޅުމަށް ނިންމުމާ ގުޅިގެންނެވެ. މި ބައްދަލުވުން އޮތީ 1998 ވަނަ އަހަރުގެ އޮގަސްޓު މަހުގެ ތެރޭގައެވެ.

ޒުވާނުންގެ ދުވަހަށް މިއަހަރު އދއިން ކަނޑައަޅާފައިވާ ޝިޢާރު ގުޅުވާފައިވަނީ ދެމެހެއްޓެނިވި ތަރައްޤީގައި ފަންނިއްޔާތު ބޭނުންކޮށްގެން ޒުވާނުންނަށް ހޯދޭނެ ކުރިއެރުންތަކުގެ މައްޗަށެވެ. އެގޮތުން މިއަހަރުގެ ޝިޢާރަކީ "ފްރޮމް ކްލިކްސް ޓު ޕްރޮގްރެސް: ޔޫތު ޑިޖިޓަލް ޕާތްވޭސް ފޯ ސަސްޓެއިނަބަލް ޑިވަލޮޕްމެންޓް" މިއެވެ.

ރާއްޖޭގައި ޒުވާނުން ކަމުގައި ބަލަނީ ޢުމުރުން 18 އަހަރާއި 35 އަހަރާ ދެމެދުގެ މީހުންނެވެ. އެގޮތުން ރާއްޖޭގެ އާބާދީގެ 35 އިންސައްތައަކީ ޒުވާނުންނެވެ.

ޒުވާނުން ބާރުވެރިކުރުވައި އެމީހުންނަށް ފުރުޞަތުތައް ހޯދައިދިނުމަށް އެހެން ޤައުމުތަކެކޭ އެއްފަދައިން ރާއްޖޭގައިވެސް ގިނަ މަސައްކަތްތަކެއް ކުރެއެވެ. ޒުވާނުންނަށް ވަޒީފާގެ ފުރުޞަތުތައް ހޯދައިދީ، ކަންކަން ނިންމުމުގައި ޒުވާނުންގެ އަޑު ގަދަކުރުމަށް އެތައް ކަމެއް ކުރެއެވެ. އެގޮތުން ވަޒީފާގެ މައިދާނަށް ތައްޔާރުވެފައިވާ ޤާބިލު ބަޔަކަށް ޒުވާނުން ހެދުމަށް އެމީހުން ތަމްރީންކުރުމުގެ އެތައް ޕްރޮގުރާމެއް ރާއްޖޭގައި ހިންގައެވެ. އަދި ޒުވާނުންނަށް ތަފާތު ދާއިރާތަކުން ތަމްރީންވުމުގެ ފުރުޞަތުތައް ފަހިކޮށްދިނުމާއި ވިޔަފާރި ފެށުމަށް ލުއި ލޯނު، ޒުވާނުންނަށްވަނީ ޚާއްސަ ކޮށްފައެވެ.

ޒުވާނުންނަށް ފަހިވާނެހެން މަގު ކޮށައިދޭއިރު، ސުވާލު އުފެދެނީ މި ފުރުޞަތުތަކުގެ ބޭނުން އެންމެ ރަނގަޅު ގޮތުގައި ޒުވާނުންނަށް ހިފޭކަމާމެދުގައެވެ.

ސަރުކާރުން ޒުވާނުންނަށް ފަހިކޮށްދޭ ފުރުޞަތުތަކުގެ ބޭނުން އެންމެ ރަނގަޅުގޮތުގައި ހިފަނީ ނިސްބަތުން މަދު ޒުވާނެކެވެ. ގިނަ ޒުވާނުންގެ ކިބައިގައި އިޖުތިމާޢީ ތަފާތު މައްސަލަތައް އެބަހުއްޓެވެ. އެގޮތުން މަސްތުވާތަކެތީގެ ވަބާގައި ޖެހިފައިވާ ދިވެހި ޒުވާނުން ގިނައެވެ. ގިނަ ޒުވާނުންގެ ކިބައިގައި އަދަބު އަޚުލާޤު ނުހުރެވެ. ޤާނޫނާއި ގަވައިދުތަކަށް އިޙްތިރާމްކުރާ ޒުވާނުންވެސް މަދެވެ. ބައެއް ޒުވާނުން ދެކެނީ ގަވައިދަކީ އަގެއް ނެތް، ބޭނުމެއް ނެތް އެއްޗެއްގެ ގޮތުގައެވެ.

މަޝްހޫރު އިޖުތިމާޢީ ޢިލްމުވެރިޔާ އަދި ދިވެހިރާއްޖޭގެ ޤައުމީ ޔުނިވަރސިޓީގެ އެސިސްޓެންޓް ޕްރޮފެސަރ ޑރ. ޢަލީ ޝަމީމް ވިދާޅުވީ މަގުމަތިވެ، ކުށަށް އަރައިގަނެ، އިޖުތިމާޢީ އެކި މައްސަލަތަކާ ޒުވާނުން ކުރިމަތިލާންޖެހޭ މައިގަނޑު ސަބަބަކީ އެމީހުންނަށް ވަޒީފާ ނުލިބުން ކަމަށެވެ.

ޢަލީ ޝަމީމް ވިދާޅުވި ގޮތުގައި ޒުވާނުންނަށް ވަޒީފާ ނުލިބުމުގައި އެމީހުންގެ ވިސްނުން ދައުރެއް އަދާކުރެއެވެ. އެގޮތުން ގިނަ ޒުވާނުން ބޭނުންވަނީ އެންމެ ފުރަތަމަވެސް ބޮޑު މުސާރަ ލިބޭ ވަޒީފާތަކަށް ދިޔުމަށްކަން ޢަލީ ޝަމީމް ފާހަގަކުރެއްވިއެވެ.

"ގިނަ ޒުވާނުން ބޭނުންވަނީ 18 އަހަރު ވުމާއެކު އަމިއްލަ ފައި މައްޗަށް ތެދުވަން. ގިނަ ޒުވާނުން ދިރިއުޅެން ޖެހެނީ އެއް ގެއެއްގައި ގިނަ ބަޔަކާއެކު. އެމީހުން ބޭނުންވަނީ އެކަނި އެޕާޓުމަންޓެއް ނަގައިގެން ވަރަށް ހަމަޖެހިލައިގެން މިނިވަންކަމާއެކު ދިރިއުޅެން. އެމީހުން ބުނަނީ ފިލާވަޅު ދަސްކުރެވޭނެ އަމިއްލަ ކޮޓަރިއެއް ބޭނުންވެޔޭ. އަމިއްލަ ސައިކަލެއް ގަނެގެން، ބޮޑު މުސާރަ ލިބޭ ވަޒީފާއެއްގައި އުޅެން ބޭނުންވަނީ." ޑރ. އަލީ ޝަމީމް ވިދާޅުވިއެވެ.

ޢަލީ ޝަމީމް ވިދާޅުވި ގޮތުގައި ޒުވާނުންގެ ވިސްނުން ހުންނަ ގޮތް ބެލުމަށް ދިރާސާއެއް ހެދުމަކީ މުހިންމު ކަމެކެވެ. އަދި ޒުވާނުން ބިނާކޮށް އެމީހުން ޒިންމާދާރު ކުރެވޭނެ ގޮތްތައް އެނގޭނީ އޭރުންކަން ޑރ. ޢަލީ ޝަމީމް ފާހަގަކުރެއެވެ.

ޒުވާނުންނަކީ އެމީހުންނަށް ފަހިކޮށްދެވޭ ފުރުޞަތުތަކުގެ ބޭނުން އެންމެ ރަނގަޅުގޮތުގައި ހިފާ ބަޔެއްކަން ކަށަވަރުކުރުމަށް ޝަމީމް ވަނީ ހައްލެއްވެސް ވިދާޅުވެދެއްވާފައެވެ. އެގޮތުން ޒުވާނުންނަށް މަގު ކޮށައިދޭ ލަފާދާރުންތަކެއް ޚާއްސަކުރުމަކީ ކުރެވިދާނެކަމެއްކަމަށް ޝަމީމް ވިދާޅުވެއެވެ.

ޑރ. ޢަލީ ޝަމީމްވެސް ވިދާޅުވާ ފަދައިން ގިނަ ދިވެހި ޒުވާނުންނަށް ދިމާވާ މައްސަލައަކީ އެމީހުންގެ ވިސްނުން ބައްޓަންވެފައިވާ ގޮތެވެ. ޒުވާނުން ބާރުވެރިކުރުވުމުގައި މިއަދު ކުރަންޖެހިފައިވާ ކަމަކީ އެމީހުންގެ ވިސްނުން ޒިންމާދާރު ކުރުމެވެ. އެމީހުންނަކީ ރިވެތި އަޚުލާޤުގެ ވެރި ބަޔަކަށް ހަދައި ޤާނޫނާއި ގަވައިދުތަކާ އެއްގޮތަށް އުޅޭ ބަޔަކަށް ހެދުމެވެ. ޒުވާނުންނަށް ތަމްރީން ދޭންވީ މި އަސާސްގެ މަތިންނެވެ.

ޒުވާނުންގެ ދުވަސް މިއަދު ފާހަގަކުރާއިރު، މިދެންނެވި ގޮތަށް ވިސްނުން ބައްޓަންކުރުމަށް ދިވެހި ހުރިހާ ޒުވާނުން ސަމާލުކަންދޭންޖެހެއެވެ. އަދި ޒިންމާދާރު، ގަވައިދަށް އިޙްތިރާމްކުރާ ޚުލްޤު ހެޔޮ ބަޔަކަށްވުމަށް ކޮންމެ ޒުވާނަކުވެސް ޢަޒުމް ކަނޑައަޅަންޖެހެއެވެ. ފުރަތަމަ ބޮންތީގައި ނުހިފޭނެކަން ދަންނަންޖެހެއެވެ. ބޮޑެތި މީހުން، ބޮޑެތި މަޤާމުތަކަށް އައީ ބޮޑެތި މަސައްކަތް ކުރުމަށްފަހުކަން، އެއީ ދިވެހި ޒުވާނުން ދެބަސްވުމެއްނެތި ޤަބޫލުކުރަންޖެހޭ ޙަޤީޤަތެވެ.