ޔަހޫދީން ޣައްޒާއަށް ދިން ވައިގެ ހަމަލާއެއްގައި ޙަމާސްގެ އުތުރު ޣައްޒާގެ އަސްކަރީ ވެރިޔާ، އިއްޒުއްދީން އަލް ބައިކް ޝަހީދުކޮށްލައިިފިއެވެ. ޙަމާސްއިން ވަނީ އޭނާ ޝަހީދުވެފައިވާ ކަން ކަށަވަރުކޮށްދީފައެވެ.
ޢިއްޒުއްދީން އަލްބައިކްއަށް އަމާޒުކޮށް ޔަހޫދީން ހަމަލާ ދީފައި ވަނީ ޣައްޒާ ސިޓީގެ ނަޞްރު އަވަށުގައި ހުންނަ މީހުން ދިރިއުޅޭ އިމާރާތަކަށެވެ. އެ ހަމަލާގައި އިތުރު މީހަކު ވެސް ޝަހީދުވެފައިވެއެވެ.
ޙަމާސްއިން ބުނީ ޔަހޫދީންގެ އަނިޔާތަކަށް ކެތް ނުކުރެވިގެން 2023ވަނަ އަހަރުގެ އޮކްޓޯބަރު މަހުގެ 7ވަނަ ދުވަހު ޔަހޫދީ ދައުލަތަށް ޙަމާސްއިން ދިން ޖިހާދީ ހަމަލާ ރޭވުމުގައި ޢިއްޒުއްދީން އަލްބައިކް އިސް ދައުރެއް ޢަދާ ކުރެއްވި ކަމަށެވެ.
ޢިއްޒުއްދީން އަލްބައިކް ޝަހީދުކޮށްލުމަށް ދިން ހަމަލާއަށް ފަހު ޔަހޫދީން ވަނީ ޖަބާލިއާ ރެފިއުޖީ ކޭމްޕުގައި ހުންނަ ޞިއްޙީ ފަރުވާދޭ ކްލިނިކެއް ކައިރިއަށް ވެސް ވައިގެ ހަމަލާއެއް ދީފައެވެ. އެ ހަމަލާގައި ވެސް މީހަކު ޝަހީދުވެފައިވެއެވެ.
ހަމާސްގެ އިިސްވެރިން ހިމެނޭ ގޮތަށް މި މަހުގެ ތެރޭގައި ހަމާސްގެ 20 ހަނގުރާމަވެރިން ޝަހީދުކޮށްލާފައިވާ ކަމަށް ޔަހޫދީން ބުނެއެވެ. ނަމަވެސް ޔަހޫދީންނަކީ މި ފަދަ ތަފާސްހިސާބުތައް ތަކުރާރުކޮށް އޮޅުވާލާ މަކަރުވެރި ބައެކެވެ. ޣައްޒާގެ ކުށެއްނެތް އާންމުން ޝަހީދު ކުރަމުން ދަނީ ވެސް ހަމާސްގެ ހަނގުރާމަވެރިން ޝަހީދުކޮށްލުމުގެ ނަމުގައެވެ.
ފާއިތުވި 24 ގަޑިއިރުގެ ތެރޭގައި ޣައްޒާގެ ނުސައިރަތު ރެފިއުޖީ ކޭޕްމުގައި ދިރިއުޅޭ ފަލަސްޠީނުގެ ރައްޔިތުން ވަނީ ޔަހޫދީންގެ ހަމަލާތަކުގައި މީގެ ތިން އަހަރު ކުރިން ޝަހީދުވި 41 މީހެެއްގެ ހަށިތައް ވަޅުލުމަށް ޖަނާޒާ ބާއްވައިފައެވެ. އެ ހަށިތަކަކީ ޣައްޒާގެ ސުންނާފަތިވެފައިވާ އިމާރާތްތަކުގެ ދަށުން ވަރަށް ފަހުން ނަގާފައިވާ ހަށިތަކެކެވެ. އެ ޖަނާޒާގައި ޝަހީދުވި މީހުންގެ ޢާއިލާއާއި ރައްޓެހިން ހިމެނޭ ގޮތަށް ގިނަ ޢަދަދެއްގެ މީހުން ބައިވެރިވެފައިވެއެވެ.
ފަލަސްޠީނުގެ އިދާރާތަކުން ލަފާކުރާ ގޮތުގައި 8،000އަށްވުރެ ގިނަ މީހުންގެ ހަށިތައް އިމާރާތްތަކާއި ގައުކުނޑީގެ ދަށުގައި ތާށިވެފައި އަދިވެސް އެބަ ހުއްޓެވެ. މިދިޔަ މަހުގެ ތެރޭގައި ޣައްޒާ ސިޓީގެ ސުންނާފަތިވެފައިވާ އިމާރާތްތަކުގެ ދަށުން ހަށިތައް ހޯދުމަށް މަސައްކަތް ކުރި ޓީމަކުން ވަނީ އެއް ޢާއިލާއަކަށް ނިސްބަތްވާ 112 މީހުންގެ ހަށިތައް ހޯދައިފައެވެ. މީހުންގެ ހަށިތައް ހޯދުމަށް ކުރާ މަސައްކަތަށް ބޭނުންވާ މެޝިންތަކާއި އާލާތްތައް ނެތުމުން އެ މަސައްކަތް ވެފައި ވަނީ އުނދަގޫ މަސައްކަތަކަށެވެ.
ޣައްޒާގެ ރައްޔިތުން ނަސްލުހޭދު ކުރުމަށް 2023ވަނަ އަހަރުގެ އޮކްޓޯބަރު މަހު ފެށި ހަނގުރާމަ ދިގު މުއްދަތަކަށް ދެމިގެން ގޮސްފައިވާއިރު، މިިދިޔަ އަހަރުގެ އޮކްޓޯބަރު މަހުގެ 10ވަނަ ދުވަހު ޔަހޫދީންނާއި ޙަމާސް ޖަމާޢަތާ ދެމެދު ވަނީ ހަނގުރާމަ މެދުކަނޑައިލުމުގެ އެއްބަސްވުމެއްގައި ނަމެއްގައި ސޮއިކޮށްފައެވެ. އެއްބަސްވުމެއް ޤާއިމްކުރި ނަމަވެސް ޔަހޫދީންގެ ޙަމަލާތައް އަދިވެސް ދަނީ ޣައްޒާއަށް އަމާޒުވަމުންނެވެ.
ހަނގުރާމަ ފެށުނު ފަހުން އެއްބަސްވުމުގައި ސޮއިކުރުމާ ހަމައަށް ޔަހޫދީން ވަނީ މައުސޫމް ކުޑަކުދިންނާއި ކުށެއް ނެތް އަންހެނުން ހިމެނޭ ގޮތަށް ޣައްޒާގެ 73،400 މީހުން ޝަހީދުކޮށްލައިފައެވެ. ޔަހޫދީންގެ ހަމަލާތަކުގައި 174،300 މީހުންނަށް ޒަޚަމްވެފައިވެއެވެ. އެއްބަސްވުމަށް ޢަމަލުކުރަން ފެށި ފަހުން ވެސް ޔަހޫދީން ވަނީ ޣައްޒާގެ 1،400 ރައްޔިތުން ޝަހީދުކޮށްލައި، 4،200އަށް ވުރެ ގިނަ މީހުންނަށް ޒަޚަމްކޮށްލައިފައެވެ.