ސޫރިޔާގައި ދިން ޑްރޯން ޙަމަލާއެއްގައި އެ ޤައުމުގައި ގާއިމު ކޮށްފައި ތިބި އެމެރިކާއާއި އަސްކަރީ އިއްތިޙާދުގެ ފައުޖުގެ ބައެއް ސިފައިން ޒަޚަމު ކޮށްލައިފިއެވެ. އެއީ, މެދުއިރުމަތީގެ ޤައުމުތަކުގައި ގާއިމުވެގެން ތިބި އެމެރިކާގެ އިސްތިޢުމާރީ ސިފައިންނަށް އަމާޒުކޮށް ފާއިތުވި ހަފުތާއެއްހާ ދުވަހުގެ ތެރޭގައި ދީފައިވާ ނުރައްކާތެރި ދެވަނަ ޙަމަލާތަކެވެ.
އެމެރިކާގެ އަސްކަރިއްޔާއިން ފުރަތަމަ ބުނެފައި ވަނީ ޑްރޯން ޙަމަލާގައި އެ ޤައުމުގެ ސިފައިންގެ އެއްވެސް މީހެއްގެ ފުރާނައަށް ނުރައްކާވެފައި ނުވާ ކަމުގައެވެ. ނަމަވެސް, ބައެއް ސިފައިންނަށް ދުމުގެ އަސަރުކޮށް އަނިޔާވި ކަން ފަހުން ހާމަކުރިއެވެ. ޑްރޯން ޙަމަލާ އަމާޒު ކޮށްފައިވާ ސަރަޙައްދުގައި ތިބި އެމެރިކާ ސިފައިން މިހާރު ވަނީ އެހެން ސަރަޙައްދަކަށް ބަދަލު ކޮށްފައެވެ.
ނަން ހާމަ ކޮށްފައި ނުވާ އެމެރިކާގެ އަސްކަރިއްޔާގެ މަސްދަރަކު ބުނީ, އެމެރިކާ ސިފައިންނަށް ބޮޑެތި ޒަޚަމުތަކެއް ލިބިފައި ނުވާ ކަމުގައެވެ. ނަމަވެސް, ބައެއް މީހުންގެ ސިކުނޑިއަށް އަނިޔާވިތޯ ބެލުމަށް ތަހުލީލުތައް ކުރަމުންދާ ކަމުގައި އޭނާ ބުންޏެވެ. އެމެރިކާ ސިފައިންނަށް އަމާޒުކޮށް ދީފައިވާ ޙަމަލާތަކުގެ ޒިންމާ އެއްވެސް ފަރާތަކުން އުފުލާފައެއް ނެތެވެ.
ޢިރާޤުގެ ހުޅަނގުގައި އޮންނަ ޢައިން އަލް-ޢަސަދު އަސްކަރީ ވައިގެ ބަނދަރަށް ދާދިފަހުން ދިން ޙަމަލާތަކެއްގައި އެމެރިކާ ސިފައިންގެ ފަސް މީހުން ޒަޚަމު ކޮށްލާފައިވެއެވެ. މެދުއިރުމަތީގެ ޤައުމުތަކުގައި ގާއިމުވެ ތިބޭ އެމެރިކާގެ އިސްތިޢުމާރީ ސިފައިންނަށް އަމާޒުކޮށް ދެމުންދާ ޙަމަލާތައް އިތުރުކޮށް, ވަރުގަދަ ކޮށްފައި ވަނީ އެ ސަރަޙައްދުގެ މަސްރަޙު ހޫނުވެފައިވާ ދަނޑިވަޅެއްގައެވެ.
ޔަހޫދީ ފައުޖުން ޖުލައި 31ވަނަ ދުވަހު އީރާނުގެ ވެރިރަށް ތަހްރާނަށް ދިން ޙަމަލާއެއްގައި ފަލަސްޠީނުގެ ޣައްޒާގައި ވެރިކަން ކުރާ ޙަމާސް ޖަމާޢަތުގެ ސިޔާސީ ގޮފީގެ ވެރިޔާ އިސްމާޢީލް ހަނިއްޔާ އަވަހާރަ ކޮށްލިއެވެ. އެ ޙަމަލާއާ ގުޅިގެން އީރާނުގެ އިތުރުން އެކްސިސް އޮފް ރެސިސްޓެންސްގައި ހިމެނޭ މުޖާހިދުންނާއި ހަތިޔާރު އެޅި ޖަމާޢަތްތަކުން ވަނީ ޔަހޫދީންގެ ކިބައިން ބަދަލު ހިފާނެ ކަމަށް ބުނެ ނުރައްކާތެރި އިންޒާރެއް ދީފައެވެ. އެ އިންޒާރުތަކާ އެކު ޔަހޫދީންނާއި އެ މީހުންގެ އެންމެ ބޮޑު މަދަދުގާރު, އެމެރިކާއިން ވަނީ ތެޅިފޮޅެން ފަށާފައެވެ.
ހަނިއްޔާގެ އިތުރުން ޔަހޫދީ ފައުޖުން ވަނީ, ލުބްނާންގެ ވެރިރަށް ބައިރޫތަށް ދިން ރަޙުމު ކުޑަ ޙަމަލާތަކެއްގައި އެ ޤައުމުގެ މުޖާހިދުންގެ ޖަމާޢަތް, ޙިޒްބުاللهގެ އަސްކަރީ ކޮމާންޑަރު ފުޢާދު ޝުކްރު ޝަހީދު ކޮށްލާފައެވެ. އެ ކަމުގެ ބަދަލު ހިފާނެ ކަމަށް ބުނެ, ޙިޒްބުاللهން ވެސް ވަނީ ޔަހޫދީންނަށް އިންޒާރު ދީފައެވެ. ފަލަސްޠީނުގެ ޣައްޒާގެ މުސްލިމުން ޝަހީދުކޮށް ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނާ ދެކޮޅު ހެދުމުގެ ގޮތުން ޙިޒްބުاللهން މިހާރު ވެސް ދަނީ ޔަހޫދީންގެ ރައްތަކާއި ހައްދުފަހަނަ އެޅި ޔަހޫދީ ސިފައިންނަށް ޙަމަލާތައް އަމާޒު ކުރަމުންނެވެ.
ހަނިއްޔާއާއި ޝުކްރު ޝަހީދު ކޮށްލުމާ ގުޅިގެން މެދުއިރުމަތީގައި ނުރައްކާތެރި ހަނގުރާމައެއް ފެށިދާނެ ކަމު ބިރު ވަނީ އިތުރުވެފައެވެ. މެދުއިރުމަތީގެ ޤައުމުތަކުގައި ތިބި އެމެރިކާގެ އިސްތިޢުމާރީ ސިފައިންނަށް އަމާޒުކޮށް ދެމުންދާ ޙަމަލާތައް އިތުރު ކުރުމުން އެމެރިކާގެ ދިފާޢީ ވަޒީރު ލޮއިޑް އޮސްޓިން ވަނީ ކަންބޮޑުވުން ފާޅު ކުރައްވާފައެވެ. އޭނާ ވިދާޅުވީ އެ ފަދަ ޙަމަލާތައް ބަލައިނުގަނެވޭނެ ކަމުގައެވެ. ނަމަވެސް, ވޮޝިންގޓަނުން ބުނީ, މެދުއިރުމަތީގެ މަސްރަޙު ފިނި ކުރަން މަސައްކަތް ކުރަމުންދާ ކަމުގައެވެ.
ސޫރިޔާގައި އެމެރިކާގެ އިސްތިޢުމާރީ ސިފައިންގެ 900އެއްހާ މީހުން ގާއިމުކޮށްފައި ތިބޭއިރު, އަވައްޓެރި ޢިރާޤުގައި ވެސް އެމެރިކާގެ 2,500އެެއްހާ ސިފައިން ތިބެއެވެ. ޢިރާޤުގައި ތިބި އެމެރިކާ ސިފައިން ފޭބުމަށް ޢިރާޤު ސަރުކާރުން ވަނީ ސެޕްޓެންބަރު މަހުގެ ނިޔަލަށް މުހުލަތު ދީފައެވެ.