އީރާނާއި ޔަހޫދީ ފައުޖުގެ އަސްކަރީ މަތިންދާބޯޓުތައް ވައްޓާލާނެ ކަމުގެ އިންޒާރު އުރުދުނުން ދީފި

ހަނގުރާމައިގެ މައިދާނަކަށް އުރުދުން ބަދަލު ކޮށްލުމުގެ ފުރުޞަތު އީރާނާއި ޔަހޫދީންނަށް ނުދޭނެ ކަމުގައި އެ ޤައުމުގެ ޚާރިޖީ ވަޒީރު އައިމަން އަލް-ޞަފްދީ ވިދާޅުވެއްޖެއެވެ. އޭނާ އެ މޭރުމުން ވާހަކަފުޅު ދައްކަވާފައި ވަނީ, ޔަހޫދީންނާ މެދު މެދުއިރުމަތީގެ ޤައުމުތަކުގައި އޮތް ނަފުރަތު އެތަކެއް ގުނައަކަށް އިތުރުވެ, ޔަހޫދީންނަށް އޮތް ބިރުވެރިކަން އިތުރުވެފައިވާ ދަނޑިވަޅެއްގައެވެ.

މެދުއިރުމަތީގެ މަސްރަޙު ހޫނުވެފައި ވަނީ ފަލަސްޠީނުގެ ޣައްޒާގެ މުސްލިމުން ޝަހީދު ކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނާ ގުޅިގެންނެވެ. އަދި, ޔަހުދީންގެ އެންމެ ބޮޑު މަދަދުގާރު, އެމެރިކާއިން އެ ޢުދުވާނަށް އެހީތެރިކަމާއި އެއްބާރުލުން ދެމުންދާތީއެވެ. ޔަހޫދީ ފައުޖުން ޖުލައި 31ވަނަ ދުވަހު އީރާނުގެ ވެރިރަށް ތަހްރާނަށް ބޮން އަޅައި, ޙަމާސް ޖަމާޢަތުގެ ސިޔާސީ ގޮފީގެ ވެރިޔާ އިސްމާޢީލް ހަނިއްޔާ ޝަހީދު ކޮށްލިއެވެ.

ހަނިއްޔާ ޝަހީދު ކޮށްލުމުން އެ ކަމުގެ ބަދަލު ހިފާނެ ކަމަށް ބުނެ, އީރާނާއި އެކްސިސް އޮފް ރެސިސްޓެންސްގައި ހިމެނޭ މުޖާހިދުންނާއި ހަތިޔާރު އެޅި ޖަމާޢަތްތަކުން ވަނީ ޔަހޫދީންނަށް އިންޒާރު ދީފައެވެ. އަދި, ލުބްނާންގެ ވެރިރަށް ބައިރޫތަށް ޙަމަލާދީ, އެ ޤައުމުގެ މުޖާހިދުންގެ ޖަމާޢަތް, ޙިޒްބުاللهގެ އަސްކަރީ ކޮމާންޑަރު ފުޢާދު ޝުކްރު ޝަހީދު ކޮށްލުމުން ޙިޒްބުاللهން ވެސް ވަނީ ޔަޙޫދީންނަށް ނުރައްކާތެރި އިންޒާރެއް ދީފައެވެ.

"އުރުދުނަކީ ހަނގުރާމައިގެ މައިދާނަކަށް ބަދަލު ކޮށްލުމުގެ ފުރުޞަތު އީރާނާއި އިސްރާއީލަށް ނުދެވޭނެ. އުރުދުންގެ ސިޔާދަތީ މިނިވަން ކަމަށް އަރައިގަނެ, އީރާނާއި އިސްރާއީލުގެ އަސްކަރީ މަތިންދާބޯޓުތަކަށް މި ޤައުމުގެ ވައިގެ ސަރަޙައްދަށް ނުވަދެވޭނެ ކަމާއި, މި ޤައުމުގެ ރައްޔިތުންގެ ފުރާނައަށް ނުރައްކާ ފަދަ އަމަލުތައް ނުހިންގޭނެ ކަން އެ ދެ ޤައުމަށް ވާނީ އަންގާފައި،" ޞަފްދީ ވިދާޅުވިއެވެ.

އުރުދުންގެ ވައިގެ ސަރަޙައްދަށް އެތެރެވާ އަސްކަރީ މަތިންދާބޯޓުތަކާއި މިސައިލް ފަދަ ހަތިޔާރުތަކަށް ޙަމަލާދީ ނައްތައިލާނެ ކަމުގެ އިންޒާރު ވެސް ޞަފްދީ ދެއްވިއެވެ. "އުރުދުންގެ ވައިގެ ސަރަޙައްދަށް އެތެރެވާ ކޮންމެ އެއްޗަކަށް, އަދި މި ޤައުމުގެ ރައްޔިތުންނަށް ނުރައްކާވާ ފަދަ ކޮންމެ އެއްޗަކަށް ޙަމަލާ ދޭނަން،" ޞަފްދީ އިންޒާރު ދެއްވަމުން ވިދާޅުވިއެވެ.

ހުސްވި އޭޕްރިލް މަހު އީރާނުން ވަނީ 300އެއްހާ ބެލިސްޓިކް މިސައިލާއި އަސްކަރީ ޑްރޯން ބޭނުން ކޮށްގެން ޔަހޫދީންގެ ރަށްތަކަށް ވަރުގަދަ ޙަމަލާތަކެއް ދީފައެވެ. އޭގެ ތެރެއިން, އުރުދުންގެ ވައިގެ ސަރަޙައްދުން ދަތުރު ކުރި ހަތިޔާރުތައް އުރުދުންގެ އަސްކަރިއްޔާއިން ވަނީ ދިފާޢުކޮށް ވައްޓައިލާފައެވެ. ނަމަވެސް, އެ ޙަމަލާތައް ދިނުމުގެ ކުރިން އީރާނުން ވަނީ އުރުދުންނާއި, ތުރުކީވިލާތުގެ އިތުރުން ޢިރާޤުގެ ސަރުކާރަށް އެ ކަން އަންގައި, ހުއްދަ ހޯދާފައެވެ.

މެދުއިރުމަތީގެ މަސްރަޙު ފިނި ކުރަން ވެސް އުރުދުނުން ވަނީ މަސައްކަތްތަކެއް ފަށާފައެވެ. އެ ގޮތުން, މެދުއިރުމަތީގައި އުފެދިފައިވާ ނުތަނަވަސް ކަމަށް ސުލްޙަވެރި ހައްލެއް ހޯދުމާ ގުޅޭ ގޮތުން އީރާނުގެ ސަރުކާރާ މަޝްވަރާ ކުރެއްވުމަށް ޞަފްދީ ދާދި ފަހުން ވަނީ ތަހްރާނަށް ދަތުރުފުޅެއް ކުރައްވާފައެވެ. އެ ދަތުރުފުޅުގައި އޭނާ ވަނީ އީރާނުގެ ޚާރިޖީ ވަޒީރު ކަމުގެ މަޤާމު ވަގުތީ ގޮތުން ފުރުއްވަމުން ގެންދަވާ ޢަލީ ބާޤިރީ ކުންނީއާ ބައްދަލު ކުރައްވާފައެވެ.

އެ ދަތުރުފުޅުގައި, އީރާނާއި އުރުދުނާ ދެމެދު ދެބަސްވުންތައް އުފެދިފައިވާ މައްސަލަތަކާ ގުޅޭ ގޮތުން ވެސް ޞަފްދީއާއި ކުންނީ މަޝްވަރާ ކުރެއްވިއެވެ. އޭގެ ތެރޭގައި, އުރުދުނަށް މަސްތުވާތަކެތި އެތެރެ ކުރުމުގެ ވިޔަފާރީގައި ސޫރިޔާގައި ހަރަކާތްތެރިވާ އީރާނުން ވާގިވެރިޔާ ޖަމާޢަތްތަކުން ހަރަކާތްތެރިވަމުންދާ މައްސަލަ ހިމެނެއެވެ. ޔަހޫދީންނަށް އަމާޒުކޮށް އީރާނުން ދިން ޙަމަލާތައް ދިފާޢު ކުރުމުގައި އުރުދުނުން ބައިވެރިވެފައިވާ ކަމަށް ބަލައި, އީރާނުން ވެސް އޮތީ އުރުދުނާ މެދު ހިތްހަމަ ނުޖެހިފައެވެ.

އީރާނާއި އެކްސިސްގައި ހިމެނޭ މުޖާހިދުންގެ ޖަމާޢަތްތަކުން ޔަހޫދީންނަށް އަމާޒުކޮށް ދީފާނެ ޙަމަލާއަކުން އެ މީހުން ރައްކާތެރި ކޮށްދިނުމަށް އެމެރިކާއިން މިހާރު ވެސް ދަނީ ފިޔަވަޅުތަކެއް އަޅަމުންނެވެ. އެމެރިކާގެ ދިފާޢީ އިދާރާ, ޕެންޓެގަނުން ބުނީ ޔަހޫދީންގެ ސަލާމަތީ ފިޔަވަޅުތައް ވަރުގަދަ ކުރަން އެހީތެރިވުމުގެ ގޮތުން މެދުއިރުމައްޗަށް އިތުރު އަސްކަރީ މަނަވަރުތަކާއި މަތިންދާބޯޓުތައް ފޮނުވުމުގެ މަސައްކަތް ފަށާފައިވާ ކަމުގައެވެ.