ސޫރިޔާގެ އިރުމަތީގެ ސަރަޙައްދަކަށް ދިން ވައިގެ ޙަމަލާއެއް އީރާނާ ގުޅުން އޮތް ހަތިޔާރު އެޅި ޖަމާޢަތަކަށް ނިސްބަތްވާ ފަސް ހަނގުރާވެރިން މަރައިލައިފިއެވެ. ޙަމަލާތައް އަމާޒު ކޮށްފައި ވަނީ ޢިރާޤާއި ސޫރިޔާ ގުޅޭ ސަރަޙައްދީ ރޮނގު ކައިރިން, ސޫރިޔާ ފަޅިން ދަތުރު ކުރަމުން ދިޔަ އުޅަނދަކަށެވެ. އެ ޙަމަލާގެ ފަހަތުގައި ވަނީ ކޮން ބަޔެއް ކަން ސާފެއް ނޫނެވެ.
އެ ސަރަޙައްދަށް ޙަމަލާ ދީފައި ވަނީ އަސްކަރީ ޑްރޯނެއް ބޭނުން ކޮށްގެންނެވެ. ނަމަވެސް, ސޫރިޔާގެ ސަލާމަތީ ބާރުގެ މަސްދަރުތަކުން ބުނީ, އެއީ ކޮން ޤައުމެއްގެ އަސްކަރިއްޔާއަށް ނިސްބަތްވާ ޑްރޯނެއް ކަން ސާފު ނޫން ކަމުގައެވެ. ބެލެވޭ ގޮތުގައި އެއީ އެމެރިކާގެ އިސްތިޢުމާރީ ސިފައިން ނުވަތަ ޔަހޫދީ ފައުޖުން ދީފައިވާ ޙަމަލާއެކެވެ. ސޫރިޔާގައި ހަރަކާތްތެރިވާ އީރާނުގެ އަސްކަރީ މުޝީރުންނާއި, އީރާނުން ވާގިވެރިވާ ހަތިޔާރު އެޅި ޖަމާޢަތްތަކަށް ޔަހޫދީ ފައުޖުން މީގެ ކުރިން ވެސް އެތަކެއް ފަހަރެއް މަތިން ޙަމަލާތައް އަމާޒު ކޮށްފައިވެއެވެ.
ސޫރިޔާ-ޢިރާޤު ސަރަޙައްދީ ރޮނގު ކައިރީގައި އޮންނަ ސޫރިޔާގެ ބޮޑު ސަރަޙައްދެއް އޮތީ އީރާނާ ގުޅުން އޮތް ހަތިޔާރު އެޅި ޖަމާޢަތްތަކުގެ އަތްދަށުގައެވެ. އެއީ, ސޫރިޔާގެ ދާޚިލީ ހަނގުރާމައިގައި ރައީސް ބައްޝާރް ހާފިޛް އަލް-ޢަސަދުގެ ސަރުކާރުގެ ދިފާޢުގައި, އެ ޤައުމުގެ އަސްކަރިއްޔާއަށް ވާގިވެރިވެފައިވާ ޖަމާޢަތްތަކެވެ. އެ ޖަމާޢަތްތަކަކީ އީރާނުން ވާގިވެރިވާ ޖަމާޢަތްތަކެއް ކަމަށް ހުޅަނގާއި ޔަހޫދީން ތުހުމަތު ކުރެއެވެ.
ދާދި ފަހުން ޔަހޫދީ ފައުޖުން ވަނީ ސޫރިޔާގެ މެދުތެރޭގައި އޮންނަ ސަރަޙައްދަކަށް ދިން ރަޙުމު ކުޑަ ޙަމަލާތަކެއްގައި, ސޫރިޔާގެ އަސްކަރިއްޔާގެ ހަތަރު ސިފައިން ޒަޚަމު ކޮށްލާފައެވެ. އެ ޙަމަލާތައް އަމާޒު ކޮށްފައި ވަނީ ޙުއްމުޞްގެ ޝުޢަޔިރާތު އަސްކަރީ ވައިގެ މަރުކަޒަށެވެ. ސޫރިޔާގެ ސަލާމަތީ ބާރުގެ މަސްދަރުތަކާ ހަވާލާދީ އެ ޤައުމުގެ ދަޢުލަތުގެ މީޑިޔާ, ސާނާއިން ބުނީ ސޫރިޔާއަށް ޙަމަލާ ދީފައި ވަނީ ލުބްނާންގެ އުތުރުގެ ސަރަޙައްދެއްގައި ތިބި ޔަހޫދީ ސިފައިން ކަމުގައެވެ.
ޔަހޫދީ ފައުޖުން ދަނީ ބައިނަލްއަޤުވާމީ ޤާނޫނުތަކާ ޚިލާފަށް, ސޫރިޔާގެ ސިޔާދަތީ މިިނިވަން ކަމަށް އަރައިގަންނަމުންނެވެ. އަދި, އެ ޤައުމުގެ ވައިގެ ސަރަޙައްދަށް ވަދެ, ޢާންމުން ދިރިއުޅޭ ސަރަޙައްދުތަކަށް ޙަމަލާތައް އަމާޒު ކުރަމުންނެވެ. ވެރިރަށް ދިމިޝްޤަށް ވެސް ޔަހޫދީ ފައުޖުން އެތަކެއް ފަހަރަކު ޙަމަލާ ދީފައިވެއެވެ. ނަމަވެސް, ބައިނަލްއަޤުވާމީ ޤާނޫނުތަކާ ޚިލާފަށް ޔަހޫދީ ފައުޖުން ހިންގަމުންދާ އެ ފަދަ އަމަލުތައް ހުއްޓުވަން ބައިނަލްއަޤުވާމީ މުޖުތަމަޢު ވަނީ ނުކުޅެދިފައެވެ. ސަބަބަކީ, ޔަހޫދީންގެ އެ ފަދަ އަމަލުތައް ހުއްޓުވަން ކުރަމުންދާ މަސައްކަތްތަކަށް އެ މީހުންގެ އެންމެ ބޮޑު މަދަދުގާރު, އެމެރިކާއިން ހުރަސް އެޅުމެވެ.
2011ވަނަ އަހަރު ސޫރިޔާގައި ދާޚިލީ ހަނގުރާމަ ފެށުމާ އެކު ޔަހޫދީ ފައުޖުން ސޫރިޔާއަށް ޙަމަލާތައް އަމާޒު ކުރަން ފެށިއެވެ. އެ ޙަމަލާތައް އަމާޒު ކޮށްފައި ވަނީ ސޫރިޔާގައި ހަރަކާތްތެރިވަމުން ދިޔަ އީރާނުގެ އަސްކަރީ މުޝީރުންނާއި ސޫރިޔާގެ އަސްކަރިއްޔާގެ ސިފައިންނާއި މަރުކަޒުތަކަށެވެ. އެއީ, ލުބްނާންގެ މުޖާހިދުންގެ ޖަމާޢަތް, ޙިޒްބުاللهއަށް ހަތިޔާރު ފޯރުކޮށްދިނުން ހުއްޓުވުމުގެ ބޭނުމުގައި ދެމުންދާ ޙަމަލާތަކެއް ކަމަށް ޔަހޫދީ ފައުޖުން އެއިރު ބުނެފައިވެއެވެ.