ބަދަލު ހިފުމުގެ ގޮތުން ޔަހޫދީންނަށް ޙަމަލާ ދިނުމާ ދެކޮޅަށް ހުޅަނގުގެ ބޮޑެތި ޤައުމުތަކުން އީރާނަށް ބާރު އަޅައިފިއެވެ. ޔަހޫދީންނާ ދެކޮޅަށް ޙަމަލާ ދިނުމާ ދެކޮޅަށް އީރާނަށް ބާރު އަޅާފައި ވަނީ އިނގިރޭސިވިލާތާއި ފަރަންސޭސިވިލާތުގެ އިތުރުން ޖަރުމަނުވިލާތުގެ ވެރިން ނެރުނު ގުޅިފައިވާ ބަޔާނެއްގައެވެ. އެއީ, ޔަހޫދީންގެ މަދަދުގާރުންގެ ތެރޭގައި ހިމެނޭ ވިލާތުގެ އެންމެ ބޮޑެތި އަދި ބާރުގަދަ ޤައުމުތަކެކެވެ.
ޔަހޫދީންނާ ދެކޮޅަށް ޙަމަލާއެއް ދިނުމާ ދެކޮޅަށް އެ ތިން ޤައުމުން އަޑު އުފުލާފައި ވަނީ, ޔަހޫދީ ފައުޖުގެ އަމަލުތަކާ ގުޅިގެން މެދުއިރުމަތީގެ މަސްރަޙު ހޫނުވެ, ނުރައްކާތެރި ހަނގުރާމައެއް ފެށިދާނެ ކަމުގެ ބިރު ހީވެފައިވާ ދަނޑިވަޅެއްގައެވެ. 2023 އޮކްޓޫބަރު 7ން ފެށިގެން ޔަހޫދީ ފައުޖުން ދަނީ ފަލަސްޠީނުގެ ޣައްޒާގެ މުސްލިމުން ޝަހީދުކޮށް ނެތިކޮށްލަން ލާއިންސާނީ ޢުދުވާނެއް ހިންގަމުންނެވެ.
އެ ޢުދުވާނުގެ ދަށުން ޔަހޫދީ ފައުޖުން ޖުލައި 31ވަނަ ދުވަހު ވަނީ އީރާނުގެ ވެރިރަށް ތަހްރާނަށް ނިރުބަވެރި ޙަމަލާއެއްދީ, ޣައްޒާގައި ވެރިކަން ކުރާ ޙަމާސް ޖަމާޢަތުގެ ސިޔާާސީ ގޮފީގެ ވެރިޔާ އިސްމާޢީލް ހަނިއްޔާ ޝަހީދު ކޮށްލާފައެވެ. އީރާނާއި އެކްސިސް އޮފް ރެސިސްޓެންސްގައި ހިމެނޭ މުޖާހިދުންނާއި ހަތިޔާރު އެޅި ޖަމާޢަތްތަކުން ވަނީ ޔަހޫދީންގެ ކިބައިން ބަދަލު ހިފުމުގެ ގޮތުން ނުރައްކާތެރި ޙަމަލާތަކެއް ދޭނެ ކަމުގެ އިންޒާރު ދީފައެވެ.
ހަނިއްޔާގެ އިތުރުން, ޔަހޫދީ ފައުޖުން ވަނީ ލުބްނާންގެ ވެރިރަށް ބައިރޫތަށް ބޮން އަޅައި އެ ޤައުމުގެ މުޖާހިދުންގެ ޖަމާޢަތް, ޙިޒްބުاللهގެ އަސްކަރީ ކޮމާންޑަރު ފުޢާދު ޝުކްރު ވެސް ޝަހީދު ކޮށްލާފައެވެ. އެ ކަމުގެ ބަދަލު ހިފުމުގެ ގޮތުން ޔަހޫދީންނަށް ދެމުންދާ ޙަމަލާތައް އިތުރުކޮށް ވަރުގަދަ ކުރާނެ ކަމުގެ އިންޒާރު ޙިޒްބުاللهން ވެސް ވަނީ ދީފައެވެ.
ޔަހުދީންގެ ދިފާޢުގައި އިނގިރޭސިވިލާތާއި ފަރަންސޭސިވިލާތުގެ އިތުރުން ޖަރުމަނުވިލާތުން ނެރެފައިވާ ބަޔާނުގައި ބުނެފައި ވަނީ, ޔަހޫދީންނަށް ޙަމަލާ ދީފި ނަމަ މެދުއިރުމަތީގެ މަސްރަޙު އިތުރަށް ހޫނުވާނެ ކަމުގައެވެ. އަދި, ޣައްޒާ ޢުދުވާން ހުއްޓުވަން މިޞްރާއި ޤަޠަރުން އިސްވެ ބާއްވަމުންދާ މަޝްވަރާތަކަށް ހުރަސް އެޅޭނެ ކަމުގައެވެ.
ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނާއި ގަތުލުއާންމަކީ ހަނގުރާމައެއްގެ ގޮތުގައި ސިފަކޮށް, އެ ތިން ޤައުމުން ވަނީ އެ ހަނގުރާމައަށް ހުއްޓުމަކަށް ގެންނަން ޖެހޭ ކަމަށް ވެސް ބުނެފައެވެ. ނަމަވެސް, އެ ބަޔާނުގައި ޔަހޫދީ ދައުލަތުގެ ނަން އެންމެ ފަހަރަކު ވެސް ގަނެފައި ނުވާ ކަން ފާހަގަ ކުރަން ޖެހެއެވެ.
ޙަމާސުން ރަހީނު ކޮށްފައިވާ އަސީރުން މިނިވަން ކުރަން ޖެހޭ ކަމަށާއި, ޣައްޒާގައި ހިންގަމުންދާ ލާއިންސާނީ ޢުދުވާނުގައި ބިކަކޮށް ނިކަމެތި ކޮށްލާފައިވާ މުސްލިމުންނަށް އިންސާނީ އެހީގެ ސާމާނު ފޯރުކޮށްދޭން ޖެހޭ ކަމަށް ވެސް ތިން ޤައުމުން ނެރެފައިވާ ބަޔާނުގައި ބުނެފައިވެއެވެ. ޣައްޒާގެ ރައްޔިތުންނަށް ކާބޯތަކެއްޗާއި އިންސާނީ އެހީގެ ސާމާނު ފޯރުކޮށްދިނުމަށް ކުރަމުންދާ މަސައްކަތްތަކަށް ހުރަސް އަޅަމުން ދަނީ ޔަހޫދީ ފައުޖެވެ. ޣައްޒާގެ މުސްލިމުން ނިކަމެތި ކޮށްލުމުގެ ބޭނުމުގައި ޔަހޫދީ ފައުޖުން ވަނީ އެ ސަހަރަށް ކާބޯތަކެއްޗާއި އިންސާނީ އެހީ ވެއްދެން އޮތް ހުރިހާ މަގެއް ބަންދު ކޮށްފައެވެ.
ޔަހޫދީ ފައުޖުން ހަނިއްޔާ ޝަހީދު ކޮށްލާފައި ވަނީ, އީރާނުގެ ރައީސް މަސްޢޫދު ޕީޒިޝްކިޔާން ހުވައި ކުރެއްވުމުގެ ރަސްމިއްޔާތުގައި ބައިވެރިވެ ވަޑައިގެންނެވުމަށް ތަހްރާނަށް ވަޑައިގެންނެވުމުންނެވެ. ނަމަވެސް, ޔަހޫދީން ދަނީ އޭނާ ޝަހީދު ކޮށްލަން ދިން ނިރުބަވެރި ޙަމަލާގެ ޒިންމާ އުފުލަން ދެކޮޅު ހަދަމުންނެވެ. ސަބަބަކީ, ބަދަލު ހިފުމުގެ ގޮތުން އީރާނާއި އެކްސިސުން ދީފާނެ ޚަމަލާއަކާ މެދު ޖެހިލުންވެ, ބިރުގަތުމެވެ.
އީރާނުން ގަބޫލު ކުރާ ގޮތުގައި, ހަނިއްޔާ ޝަހީދު ކޮށްލަން ޔަހޫދީ ފައުޖުން ދީފައި ވަނީ ނިރުބަވެރި ޙަމަލާއެކެވެ. އަދި, އީރާނުގެ ސިޔާދަތީ މިނިވަންކަމަށް ޔަހޫދީން އަރައިގަނެފައިވާ ކަމަށާއި, ޤައުމީ ސަލާމަތަށް ނުރައްކާކޮށް އީރާނުގެ ރައްޔިތުންގެ ފުރާނައަށް ނުރައްކާ ކޮށްފައިވާ ކަމަށް ވެސް އެ ޤައުމުން ގަބޫލު ކުރެއެވެ. ހަނިއްޔާ ޝަހީދު ކޮށްލުމާ ގުޅިގެން އީރާނުގެ ރޫހީ އެންމެ މަތީ ވެރިޔާ އާޔަތުالله ޢަލީ އަލް-ޚާމަންޢީ ވަނީ ޔަހޫދީންގެ ކިބައިން ބަދަލު ހިފަން އީރާނުގެ އިސްލާމީ އިންޤިލާބީ ލަޝްކަރަށް އަމުރު ކުރައްވާފައެވެ.
އިންޤިލާބީ ލަޝްކަރުގެ ކޮމާންޑަރުގެ ނައިބު ޢަލީ ފަދަވީ ވިދާޅުވީ ޚާމަންޢީގެ އަމުރުގައިވާ ކަންކަން ވަރަށް ސާފު ކަމަށާއި, އެ އަމުރު އޭގެ އެންމެ ފުރިހަމަ ގޮތުގައި އީރާނުގެ ލަޝްކަރުން ތަންފީޒު ކުރާނެ ކަމުގައެވެ. ހަނިއްޔާ ޝަހީދު ކޮށްލުމުން ބަދަލު ހިފާނެ ކަމުގެ އިންޒާރު ދިނުމަށް ފަހު އައިއާރްޖީސީން ވަނީ ވަރުގަދަ އަސްކަރީ ތަމްރީނުތަކެއް ވެސް ހިންގަން ފަށާފައެވެ.
އެ އިންޒާރުތަކާ ގުޅިގެން ޔަހޫދީންނާއި އެ މީހުންގެ އެންމެ ބޮޑު މަދަދުގާރު, އެމެރިކާއިން ވަނީ ތެޅިފޮޅެން ފަށާފައެވެ. ޔަހޫދީން ވަނީ ދިފާޢީ ކަންކަން ވަރުގަދަ ކުރުމުގެ މަސައްކަތް ފަށައި, އީރާނާއި އެކްސިސުން ދީފާނެ ޙަމަލާއަކަށް ތައްޔާރުވާން ފަށާފައެވެ. އަދި, އެމެރިކާއިން ވަނީ ޔަހޫދީންގެ ޙިމާޔަތާއި ރައްކާތެރިކަން ކަށަވަރު ކޮށްދިނުމަށް އެ ޤައުމުގެ އަސްކަރީ މަނަވަރުތަކާއި ސަބްމެރިންތައް މެދުއިރުމައްޗަށް ފޮނުވަން ފަށާފައެވެ.
2023 އޮކްޓޫބަރު 7ން ފެށިގެން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 39,897އަށް އުފުލިފައެވެ. އޭގެ ތެރޭގައި 16،000އަށްވުރެ ގިނަ ޢަދަދަކަށް މައުސޫމު ކުޑަކުދިން ހިމެނެއެވެ. އަދި، ޔަހޫދީ ފައުޖުން ސުންނާފަތި ކޮށްލާފައިވާ އިމާރާތްތަކުގެ ދަށުގައި އިތުރު 10،000އަށްވުރެ ގިނަ މީހުންގެ ހަށިތައް ތާށިވެފައިވާ ކަމުގައި ޣައްޒާގެ އޮފިޝަލުން ގަބޫލު ކުރެއެވެ. ޔަހޫދީންގެ ރަޙުމު ކުޑަ ޙަމަލާތަކުގައި ޒަޚަމު ކޮށްލާފައިވާ މީހުންގެ ޢަދަދު ވަނީ 92,152އަށް އުފުލިފައެވެ.