ތުރުކީވިލާތުގެ އަސްކަރިއްޔާގެ ޢިރާޤުގެ އުތުރުގެ ސަރަޙައްދުތަކަށް ވައިގެ ޙަމަލާތަކެއްދީފިއެވެ. މި ޙަމަލާތައް އަމާޒު ކޮށްފައި ވަނީ ކުރްދިސްތާން ވަރކަރސް ޕާޓީ (ޕީކޭކޭ)ގެ ހަނގުރާމަވެރިން ހަރަކާތްތެރިވަމުން ދިޔަ ސަރަޙައްދަކަށެވެ. އެ ޙަމަލާތަކުގައި ކުރުދީ ހަނގުރާމަވެރިންގެ 17 މީހުން މަރުވި ކަމުގައި ތުރުކީވިލާތުގެ ދިފާޢީ ވުޒާރާއިން ހާމަކުރިއެވެ.
އެއީ, ޢިރާޤުގެ އުތުރުގެ ސަރަޙައްދުތަކުގައި ހަރަކާތްތެރިވަމުންދާ ޕީކޭކޭގެ ހަނގުރާމަވެރިންނަށް ތުރުކީވިލާތުން ޙަމަލާތަކެއް ދީފައިވާ ފުރަތަމަ ފަހަރެއް ނޫނެވެ. ޢިރާޤުގައި ހަރަކާތްތެރިވާ ޕީކޭކޭގެ ހަނގުރާމަވެރިންނާ ދެކޮޅަށް ތުރުކީވިލާތުގެ އަސްކަރިއްޔާއިން ދަނީ ކްލޯ-ލޮކްގެ ނަމުގައި އަސްކަރީ އޮޕަރޭޝަނެއް ހިންގަމުންނެވެ.
ޕީކޭކޭއަކީ, ތުރުކީވިލާތުގެ އިތުރުން އެމެރިކާއާއި ވިލާތުގެ އިއްތިހާދުން ނިރުބަވެރި ޖަމާޢަތެއްގެ ގޮތުގައި ކަނޑައަޅާފައިވާ ހަނގުރާމަވެރިންގެ ޖަމާޢަތެކެވެ. އެ ޖަމާޢަތުން ތުރުކީވިލާތުގެ ސަރުކާރާ ދެކޮޅަށް ހަތިޔާރު އުފުލާފައި ވަނީ 1984ވަނަ އަހަރުއެވެ. އަދި, އޭގެ ފަހުން އެ ޖަމާޢަތުން ދަނީ ތުރުކީވިލާތުގެ ސަރުކާރާއި އަސްކަރިއްޔާގެ އިތުރުން ޢާންމު ރައްޔިތުންނަށް އަމާޒުކޮށް ނިރުބަވެރި ޙަމަލާތައް ދެމުންނެވެ.
ޢިރާޤުގެ އިތުރުން ސޫރިޔާގައި ހަރަކާތްތެރިވާ ކުރުދީންނާ ގުޅުން އޮތް ހަތިޔާރު އެޅި ޖަމާޢަތްތަކަށް އަމާޒުކޮށް ވެސް ތުހުކީވިލާތުގެ އަސްކަރިއްޔާއިން ދަނީ ޙަމަލާ ދެމުންނެވެ. ސޫރިޔާގައި ހަރަކާތްތެރިވާ ކަރޑިޝް ވައިޕީޖީއަކީ ޕީކޭކޭއާ ގުޅުން އޮތް ހަތިޔާރު އެޅި ޖަމާޢަތެކެވެ. އެ ޖަމާޢަތްތަކާ ދެކޮޅަށް ހިންގަމުންދާ އޮޕަރޭޝަންގެ ދަށުން ތުރުކީވިލާތުގެ ސަރަޙައްދީ ރޮނގު ކައިރީގައި އޮންނަ ސޫރިޔާގެ ބައެއް ސަރަޙައްދުތަކުގައި ތުރުކީވިލާތުގެ އަސްކަރިއްޔާއިން ދަނީ ހަރަކާތްތެރިވަމުންނެވެ.