ބަދަލު ހިފުމުގެ ގޮތުން އީރާނުން ޔަހޫދީންނަށް އަމާޒުކޮށް ދީފާނެ ޙަމަލާއަކަށް އެމެރިކާއިން ތައްޔާރަށް އޮތް ކަމުގައި ވައިޓް ހައުސްގެ ޤައުމީ ސަލާމަތާ ބެހޭ މަޖިލީހުގެ ތަރުޖަމާނު ޖޯން ކަރބީ ވިދާޅުވެއްޖެއެވެ. ޔަހޫދީންނަށް ނުރައްކާތެރި ޙަމަލާތަކެއް ދޭނެ ކަމަށް އީރާނާއި އެކްސިސް އޮފް ރެސިސްޓެންސްގައި ހިމެނޭ ޖަމާޢަތްތަކުން އިންޒާރު ދީފައި ވަނީ ފަލަސްޠީނުގައި ވެރިކަން ކުރާ ޙަމާސް ޖަމާޢަތުގެ ސިޔާސީ ގޮފީގެ ވެރިޔާ އިސްމާޢީލް ހަނިއްޔާ ޝަހީދު ކޮށްލުމާ ގުޅިގެންނެވެ.
ހަނިއްޔާ ޝަހީދު ކޮށްލާފައި ވަނީ އީރާނުގެ ވެރިރަށް ތަހްރާނަށް ދިން ނިރުބަވެރި ޙަމަލާއެއްގައެވެ. ޔަހޫދީ ފައުޖުން އީރާނުގެ ސިޔާދަތީ މިނިވަން ކަމަށް އަރައިގަނެ, ޤައުމީ ސަލާމަތާއި އީރާނުގެ ޢާންމު ރައްޔިތުންގެ ފުރާނައަށް ނުރައްކާ ކޮށްފައިވާ ކަމަށް އެ ޤައުމުން ގަބޫލު ކުރެއެވެ. ހަނިއްޔާގެ އިތުރުން ޔަހޫދީ ފައުޖުން ވަނީ ލުބްނާންގެ ވެރިރަށް ބައިރޫތަށް ޙަމަލާދީ އެ ޤައުމުގެ މުޖާހިދުންގެ ޖަމާޢަތް, ޙިޒްބުاللهގެ އަސްކަރީ ގޮފީގެ ކޮމާންޑަރު ފުޢާދު ޝުކްރު ވެސް ޝަހީދު ކޮށްލާފައެވެ.
ކަރބީ ވިދާޅުވީ, އެ ކަމުގެ ބަދަލު ހިފުމުގެ ގޮތުން އީރާނާއި އެކްސިސުން ޔަހޫދީންނަށް އަމާޒުކޮށް ދީފާނެ ޙަމަލާއަކުން ޔަހުދީން ދިފާޢު ކޮށްދޭން އެމެރިކާއިން ތައްޔާރަށް އޮތް ކަމުގައެވެ. މި ގޮތުން, މެދުއިރުމަތީގައި ހަރަކާތްތެރިވަމުންދާ އެމެރިކާގެ ލަޝްކަރުގެ ޢަދަދު އިތުރުކޮށްފައިވާނެ ކަމުގައި އޭނާ ވިދާޅުވިއެވެ. ބަދަލު ހިފުމުގެ ގޮތުން އީރާނާއި އެކްސިސުން ދީފާނެ ޙަމަލާއަކާ މެދު އެމެރިކާއިން ކަންބޮޑުވާ ކަމުގައި ވެސް އޭނާ ވިދާޅުވިއެވެ.
"ބަދަލު ހިފުމުގެ ގޮތުން އީރާނާއި އެކްސިސުން ދީފާނެ ޙަމަލާއަކާ މެދު ޔަހޫދީންގެ ކިބައިގައި އޮތް ކަންބޮޑުވުން އަޅުގަނޑުމެން ވެސް ހިއްސާ ކުރަން. މި ހަފުތާގެ ތެރޭގައި ވެސް ޙަމަލާތަކެއް ދީފާނެ ކަމަށް ބެލެވޭ. ޙަމަލާއަކަށް އަޅުގަނޑުމެން ތައްޔާރީ ހާލަތެއްގައި އޮންނަން ޖެހޭ،" ކަރބީ ވިދާޅުވިއެވެ.
ޔަހޫދީންގެ ޙިމާޔަތާއި ރައްކާތެރިކަން ކަށަވަރު ކޮށްދިނުމަށް އެމެރިކާއިން ވަނީ އަސްކަރީ މަނަވަރުތަކާއި ގައިޑެޑް-މިސައިލް އުފުލާ ސަބްމެރިންތައް މެދުއިރުމައްޗަށް ފޮނުވާފައެވެ. އެމެރިކާގެ ދިފާޢީ ވަޒީރު ލޮއިޑް އޮސްޓިން ވަނީ, މި ވަގުތު ދެކުނު ޗައިނާ ކަނޑުގައި އޮތް އަސްކަރީ މަތިންދާބޯޓު އުފުލާ މަނަވަރު, ޔޫއެސްއެސް އެބްރަހަމް ލިންކަނާއި, އެ އުޅަނދާ އެކު ދަތުރު ކުރާ ސްޓްރައިކް ގުރޫޕުގެ މަނަވަރުތަކާއި ސަބްމެރިންތައް މެދުއިރުމައްޗަށް ފޮނުވަން އަމުރު ކުރައްވާފައެވެ. އަދި, މެދުއިރުމަތީގެ ޤައުމުތަކުގައި ގާއިމު ކޮށްފައިވާ އެމެރިކާގެ އިސްތިޢުމާރީ ސިފައިންގެ އަސްކަރީ މަރުކަޒުތަކަށް އިތުރު އަސްކަރީ މަތިންދާބޯޓުތައް ވެސް ވަނީ ފޮނުވާފައެވެ.
ދާދި ފަހުން ޔަހޫދީން ވެރިވެގަނެފައިވާ ސޫރިޔާގެ އަލް-ޖޫލާންގެ އުސް ބިންތަކަށް މުޖާހިދުންގެ ޖަމާޢަތަކުން ދީފައިވާ ނުރައްކާތެރި ރޮކެޓް ޙަމަލާތަކާ ގުޅިގެން ޔަހޫދީން ވަނީ ރައްކާތެރި ކަމުގެ ފިޔަވަޅުތައް ހަރުދަނާ ކުރަން ފަށާފައެވެ. އަދި, ހަނިއްޔާ ޝަހީދު ކޮށްލުމާ ގުޅިގެން އީރާނާއި އެކްސިސުން ދީފައިވާ އިންޒާރާ އެކު, ޔަހޫދީން ވަނީ ބިރުން ތެޅިފޮޅެން ފަށާފައެވެ. އަދި, ދިފާޢީ ކަންކަން ހަރުދަނާކޮށް, މުޖާހިދުން ދީފާނެ ޙަމަލާއަކަށް ތައްޔާރުވުމުގެ ގޮތުން ރައްކާތެރި ކަމުގެ ފިޔަވަޅުތައް އަޅަން ފަށާފައެވެ.
"އޭޕްރިލް މަހު ދިން ފަދަ އިތުރު ޙަމަލާތަކަކުން އިސްރާއީލަށް ދިފާޢުވާން ޖެހޭ ހާލަތު ދެކެން އަޅުގަނޑުމެން ބޭނުމެއް ނޫން. ނަމަވެސް, އެ ހާލަތު އަލުން މެދުވެރިވެއްޖެ ނަމަ, އެ މީހުންގެ [ޔަހޫދީންގެ] ޙިމާޔަތާއި ރައްކާތެރިކަން ކަށަވަރު ކޮށްދޭން އަޅުގަނޑުމެން ތެދުވާނަން،" ކަރބީ ވިދާޅުވިއެވެ.
މެދުއިރުމަތީގެ ޤައުމުތަކުގެ މެދުގައި ޔަހޫދީންނާ މެދު އޮތް ނަފުރަތު އިތުރުވެ, ހަނިއްޔާއާއި ޝުކްރު ޝަހީދު ކޮށްލުމުން ޔަހޫދީން ބިރުވެރިކަމެއްގެ ތެރެއަށް ވެއްޓުނު ނަމަވެސް, ޣައްޒާގެ މުސްލިމުން ޝަހީދުކޮށް ނެތިކޮށްލަން ހިންގަމުންދާ ލާއިންސާނީ ޢުދުވާން ހުއްޓުމަކަށް ގެންނަން ޔަހޫދީން އަދިވެސް ދަނީ ދެކޮޅު ހަދަމުންނެވެ. ފާއިތުވި 24 ވަރަކަށް ގަޑިއިރުގެ ތެރޭގައި ވެސް ޔަހޫދީ ފައުޖުން ވަނީ ޣައްޒާގެ އެންމެ ދެކުނުން އޮތް ޚާން ޔޫނިސަށް ރަޙުމު ކުޑަ ޙަމަލާތަކެއްދީ 10 މީހުން ޝަހީދު ކޮށްލާފައެވެ. އޭގެ ތެރޭގައި ގިނައީ ކުށެއް ނެތް އަންހެނުންނާއި މައުސޫމު ކުޑަކުދިންނެވެ.
2023 އޮކްޓޫބަރު 7ން ފެށިގެން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 39,897އަށް އުފުލިފައެވެ. އޭގެ ތެރޭގައި 16،000އަށްވުރެ ގިނަ ޢަދަދަކަށް މައުސޫމު ކުޑަކުދިން ހިމެނެއެވެ. އަދި، ޔަހޫދީ ފައުޖުން ސުންނާފަތި ކޮށްލާފައިވާ އިމާރާތްތަކުގެ ދަށުގައި އިތުރު 10،000އަށްވުރެ ގިނަ މީހުންގެ ހަށިތައް ތާށިވެފައިވާ ކަމުގައި ޣައްޒާގެ އޮފިޝަލުން ގަބޫލު ކުރެއެވެ. ޔަހޫދީންގެ ރަޙުމު ކުޑަ ޙަމަލާތަކުގައި ޒަޚަމު ކޮށްލާފައިވާ މީހުންގެ ޢަދަދު ވަނީ 92,152އަށް އުފުލިފައެވެ.