ރަޝިޔާގެ ކޫރްސްކް ސަރަޙައްދަށް އަރައި, ބައެއް އަވަށްތަކަށް އަތްގަދަ ކޮށްފައިވާ ޔޫކްރެއިންގެ ފައުޖުތަކަށް އަމާޒުކޮށް ރަޝިޔާ ސިފައިން ވަރުގަދަ ޙަމަލާތަކެއް ދޭން ފަށައިފިއެވެ. ކޫރްސްކް ސަރަޙައްދަށް މީގެ ހަފުތާއެއްހާ ދުވަސް ކުރިން އެރި ޔޫކްރެއިންގެ ފައުޖުތަކުން ވަނީ ސޫޖްދާ ކައިރީގައި އޮންނަ 28 އަވަށަކަށް އަތްގަދަ ކޮށްފައެވެ. ޔޫކްރެއިނުން ހިފާފައިވާ ބިމުގެ ސަރަޙައްދުގެ ބޮޑުމިން 1,000 އަކަ ކިލޯމީޓަރަށް އަރައެވެ.
ރަޝިޔާގެ އަސްކަރިއްޔާއިން ބުނީ, އެ ޤައުމަށް އަރައިގަނެފައިވާ ޔޫކްރެއިންގެ ފައުޖުތަކާ ދެކޮޅަށް އަސްކަރީ މަތިންދާބޯޓާއި, ޑްރޯންގެ އިތުރުން މިސައިލް ޙަމަލާތައް އަމާޒު ކުރަމުންދާ ކަމުގައެވެ. ރަޝިޔާގެ އަސްކަރިއްޔާގެ އިސް ކޮމާންޑަރެއް ބުނީ, ކޫރްސްކުގެ ރަށްތަކަށް އަތްގަދަ ކުރަމުންދާ ޔޫކްރެއިންގެ ސިފައިން ހުއްޓުވާފައިވާނެ ކަމުގައެވެ. އެއީ, ރަޝިޔާގެ ސަރަޙައްދަށް އަރައި ޔޫކްރެއިނުން މިހާތަނަށް ދީފައިވާ އެންމެ ބޮޑު އަދި އެންމެ ނުރައްކާތެރި ޙަމަލާތަކެވެ.
ކޫރްސްކް ސަރަޙައްދަށް އަރައި ޔޫކްރެއިނުން ދީފައިވާ ޙަމަލާތަކަކީ ބޮޑު ޖަރީމާއެއްގެ ގޮތުގައި ރަޝިޔާގެ ރައީސް ވްލަޑިމިޔަރ ޕުޓިން ވަނީ ސިފަ ކުރައްވާފައެވެ. އެއީ, ރަޝިޔާއާ މަޝްވަރާ ކުރުމުގައި ކުރިއެރުންތަކެއް ހޯދަން ޔޫކްރެއިނުން ހިންގާފައިވާ އަމަލެއް ކަމުގައި ވެސް ޕުޓިން ވިދާޅުވިއެވެ. އަދި, ކޫރްސްކަށް ސިފައިން ފޮނުވާފައި ވަނީ ހުޅަނގުގެ ބާރުތަކުގެ އެހީތެރިކަމާ އެކުގައި ކަމަށް އޭނާ ތުހުމަތު ކުރެއްވިއެވެ.
ކޫރްސްކްގެ ސަރަޙައްދީ ގަވަރުނަރު އަލެކްސީ ސިމިޔިރްނޯފް ވިދާޅުވީ, ކޫރްސްކްގެ 28 އަވަށަކަށް ޔޫކްރެއިންގެ ސިފައިން ވެރިވެގަނެފައިވާ ކަމުގައެވެ. އަދި, 12 ކިލޯމީޓަރު ދިގު, 40 ކިލޯމީޓަރު ފުޅާ ސަރަޙައްދެއްގައި ޔޫކްރެއިންގެ ފައުޖުން ހަރަކާތްތެރިވަމުންދާ ކަމުގައެވެ. އެ ސަރަޙައްދުތަކުގައި ދިރިއުޅޭ 200,000އެއްހާ މީހުން މިހާރު ވަނީ ރައްކާތެރި ހިސާބުތަކަށް ބަދަލު ކޮށްފައެވެ. އަދި, އިތުރު މީހުން ސަލާމަތް ކުރަން ރަޝިޔާއިން ދަނީ މަސައްކަތް ކުރަމުންނެވެ. އޭގެ އިތުރުން, ރަޝިޔާ-ޔޫކްރެއިން ސަރަޙައްދީ ރޮނގު ކައިރީގައި އޮންނަ ބިޔެލްގޮރޮދުގެ ރައްޔިތުން ރައްކާތެރި ހިސާބުތަކަށް ބަދަލު ކުރުމުގެ މަސައްކަތް ވެސް ވަނީ ފަށާފައެވެ.
ރަޝިޔާ-ޔޫކްރެއިންގެ ހަނގުރާމައިގެ މަޢުލޫމާތު ފަތުރާ ރަޝިޔާގެ ބްލޮގަރުން ބުނީ ކޫރްސްކް ސަރަޙައްދުގައި ޔޫކްރެއިންގެ އެތަކެއް ހާސް ސިފައިން ބަރުހަތިޔާރާއި އަސްކަރީ އުޅަނދުފަހަރުގައި ހަރަކާތްތެރިވަމުންދާ ކަމުގައެވެ. އަދި, އެޔޫކްރެއިންގެ ފައުޖުތަކާ ކުރިމަތިލުމަށް ރަޝިޔާއިން އެ ސަރަޙައްދަށް ގިނަ ޢަދަދެއްގެ ސިފައިންނާއި ބަރުހަތިޔާރު ފޮނުވާފައިވާ ކަމަށާއި, ޔޫކްރެއިންގެ ފައުޖުތަކާ ދެމެދު ވަރުގަދަ ކުރިމަތިލުންތަކެއް ހިނގަމުންދާ ކަމުގައެވެ.
ރަޝިޔާގެ ދިފާޢީ ވުޒާރާއިން ބުނީ ޔޫކްރެއިންގެ 35 އަސްކަރީ ޓޭންކާއި, ސިފައިން އުފުލާ 31 އުޅަނދާއި, 18 އިންފެންޓްރީ އުޅަނދުގެ އިތުރުން ސިފައިން އުފުލާ އެހެން މަރުކާތަކުގެ 179 އުޅަނދަށް ޙަމަލާދީ ހަލާކު ކޮށްލާފައިވާނެ ކަމުގައެވެ. "ރަޝިޔާގެ ސަރަޙައްދަށް އަރައިގަނެފައިވާ ޔޫކްރެއިންގެ ފައުޖުތައް މިހާރު ވަނީ ކޮންޓްރޯލް ކުރެވިފައި،" ރަޝިޔާގެ އަސްކަރިއްޔާގެ އިސް އޮފިސަރެއް ކަމުގައިވާ މޭޖަރ ޖެނެރަލް އަޕްތީ އަލައުއްދީނޮފް ވިދާޅުވިއެވެ. "ރޭވުންތައް ނާކާމިޔާބުވެއްޖެ ކަން އެ މީހުންނަށް [ޔޫކްރެއިންގެ ސިފައިންނަށް] އެނގިއްޖެ."
ކޫރްސްކަށް އަރާފައިވާ ޔޫކްރެއިންގެ ސިފައިން ފަހަަތަށް ޖެއްސުމުގެ މަސައްކަތް ފަށާފައިވާ ކަމުގައި ރަޝިޔާގެ އަސްކަރިއްޔާ ބުނި ނަމަވެސް, ސޫޖްދާ މި ވަގުތު އޮތީ ކޮން ޤައުމެއްގެ ސިފައިންގެ ބާރުގެ ދަށުގައި ކަން ކަށަވަރު ކުރެވިފައެއް ނުވެއެވެ. ސޫޖްދާއަކީ ވިލާތުގެ ޤައުމުތަކަށް ރަޝިޔާގެ ގޭސް ފޯރުކޮށްދޭން ބޭނުން ކުރާ މައި މަރުކަޒެކެވެ.
ޕުޓިން ވިދާޅުވީ ރަޝިޔާއަށް އަރައިގަނެފައިވާ ޔޫކްރެއިންގެ ފައުޖުތައް ބަލިކޮށް, އެ ޤައުމުން ބާލާނެ ކަމުގައެވެ. އަދި, އެ ސަރަޙައްދަށް އިތުރު ސިފައިން ފޮނުވުމުގެ މަސައްކަތް ހަލުވިކަމާ އެކު ކުރަމުންދާ ކަމުގައެވެ. ނަމަވެސް, ޔޫކްރެއިންގެ ފައުޖުން ސަރަޙައްދީ ރޮނގު ހުރަސްކޮށް ރަޝިޔާއަށް އަރައިގަނެ, ކުއްލި ޙަމަލާތަކެއް ދިނުމާ ގުޅިގެން ރަޝިޔާއަށް ސިހުން ގެނުވިއެވެ. އަދި, އެއީ ޕުޓިން އަށް ކުރިމަތިލައްވަން ޖެހުނު ވަރަށް ބޮޑު ވެއްޓުމެއްގެ ގޮތުގައި މަސްރަޙު ދިރާސާ ކުރާ ފަރާތްތަކުން ގަބޫލު ކުރެއެވެ.
އެއީ, 1941ވަނަ އަހަރުގެ ޖޫން މަހު ދެވަނަ ބޮޑު ހަނގުރާމައިގެ ތެރެއިން ނާޒީ ޖަރުމަނީގެ ސިފައިން ރަޝިޔާއަށް އަރައި ދިން ޙަމަލާތަކަށް ފަހު, ރަޝިޔާގެ ސިޔާދަތީ މިނިވަން ކަން ދިފާޢު ކުރަން އެ ޤައުމަށް ހަނގުރާމަ ކުރަން ޖެހުނު ފުރަތަމަ ފަހަރެވެ.
ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވިދާޅުވީ, ކޫރްސްކަށް ދީފައިވާ ޙަމަލާއަކީ ޔޫކްރެއިންގެ މިނިވަންކަމާއި ސިޔާދަތު ހިމާޔަތް ކުރުމަށް އަޅާފައިވާ މުހިންމު ފިޔަވަޅެއް ކަމުގައެވެ. އަދި, އެ ސަރަޙައްދަށް ސިފައިން ފޮނުވައި ހަނގުރާމަ ފެށުމުގެ މައިގަނޑު އެއް އަމާޒަކީ, އެ ސަރަޙައްދުގައި ތިބި ރަޝިޔާގެ ފައުޖުތަކުން ޔޫކްރެއިންގެ ސޫމީ ސަރަޙައްދަށް ދެމުންދާ ޙަމަލާތަކަށް ހުއްޓުމެއް ގެނައުން ކަމުގައެވެ. ޖޫން 1ން ފެށިގެން ރަޝިޔާއިން ސޫމީ ސަރަޙައްދަށް 2,100އަށްވުރެ ގިނަ ޙަމަލާ ދީފައިވާ ކަމުގައި ވެސް އޭނާ ވިދާޅުވިއެވެ.
2022ވަނަ އަހަރުގެ ފެބުރުވަރީ މަހުގެ 24ވަނަ ދުވަހު ޔޫކްރެއިނަށް ސިފައިން ފޮނުވައި ރަޝިޔާއިން ހަނގުރާމަ ފެށުމުން ޔޫކްރެއިންގެ ސިޔާދަތީ މިނިވަން ކަން ދިފާޢު ކުރުމުގައި އެ ޤައުމަށް އެންމެ ބޮޑު އެހީތެރިކަމެއް ފޯރުކޮށްދެމުން ދަނީ އެމެރިކާއާއި ނޭޓޯގެ މެންބަރުންނެވެ. ނަމަވެސް, ހުޅަނގުން ބުނީ, ކޫރްސްކަށް ސިފައިން ފޮނުވައި, ހަނގުރާމައިގެ އޮއިވަރު މުޅިން ބަދަލު ކޮށްލަން ރާވާފައިވާ ކަމުގެ މަޢުލޫމާތު ޔޫކްރެއިނުން އެއްވެސް ވަރަކަށް ހިއްސާ ކޮށްފައި ނުވާ ކަމުގައެވެ.