ޖަޕާނުގެ ބޮޑުވަޒީރު ފުމިޔޯ ކިޝިދާ އިސްތިޢުފާ ދެއްވަން ނިންމަވާފައިވާ ކަން އިޢުލާނު ކުރައްވައިފިއެވެ. އިސްތިޢުފާ ދެއްވަން ކިޝިދާ ނިންމަވާފައި ވަނީ ސިޔާސީ މައިދާނުގައި ހައިޖާނު ބޮޑުވެ, ދިރިއުޅުމުގެ ޚަރަދުތަކާއި ތަކެތީގެ އަގުތައް އުފުލުމުން ރައްޔިތުންގެ މެދުގައި ކަންބޮޑުވުން އިތުރުވެފައިވާ ދަނޑިވަޅެއްގައެވެ. އަންނަ މަހު އިސްތިޢުފާ ދެއްވާނެ ކަން ކިޝިދާ އިޢުލާނު ކުރައްވާފައި ވަނީ ވެރިކަމުގެ ތިން އަހަރަށް ފަހުއެވެ.
"ޢާންމުންގެ އިތުބާރު ނެތި, ނުގަބޫލުގައި ސިޔާސީ މައިދާން ރަނގަޅަކަށް ނުހިނގާނެ. ބަރު ހިތަކާ އެކު އަޅުގަނޑު އިސްތިޢުފާ ދޭން ނިންމީ ރައްޔިތުންގެ އިހުސާސްތަކާ މެދު ވިސްނުމަށް ފަހު. އަދި, ސިޔާސީ މައިދާން އިސްލާހު ކުރަން ގިނަ ބަޔަކު ބާރު އަޅަމުންދާތީ،" އޭނާގެ ލިބަރަލް ޑިމޮކްރެޓިކް ޕާޓީ (އެލްޑީޕީ)ގެ ވެރިޔާގެ މަޤާމަށް އިތުރު ދައުރަކަށް ވާދަ ނުކުރައްވާނެ ކަން އިޢުލާނު ކުރައްވައި ކިޝިދާ ވިދާޅުވިއެވެ.
ކިޝިދާގެ ބަދަލުގައި ޕާޓީގެ ރައީސް ކަމުގެ މަޤާމަށް އައު ބޭފުޅަކު އިންތިޚާބު ކުރުމަށް ވެރިކަން ކުރާ އެލްޑީޕީން އަންނަ ސެޕްޓެންބަރު މަހު އިންތިޚާބެއް ބާއްވާނެއެވެ. އަދި, ކިޝިދާގެ ބަދަލުގައި ބޮޑުވަޒީރު ކަމުގެ މަޤާމާ ދެން ހަވާލުވެ ވަޑައިގަންނަވާނީ, އެލްޑީޕީގެ ރައީސް ކަމުގެ އިންތިޚާބު ކާމިޔާބު ކުރައްވާ ބޭފުޅެކެވެ.
ޖަޕާނުގެ ބޮޑުވަޒީރު ކަމުގެ މަޤާމާ ކިޝިދާ ހަވާލުވެ ވަޑައިގަތީ 2021ވަނަ އަހަރުއެވެ. ނަމަވެސް, އޭނާއާ މެދު ޢާންމުންގެ މެދުގައި އޮތް އިތުބާރު ގެއްލެން ފަށާފައި ވަނީ, އެލްޑީޕީއާއި ޔުނިފިކޭޝަން ޗަރޗާ ގުޅުންތަކެއް އޮތް ކަމުގެ ތުހުމަތުތައް ފެންމަތިވުމާ ގުޅިގެންނެވެ. އެއަށް ފަހު, އެލްޑީޕީން ސިއްރު ކޮށްފައިވާ ފައިސާތަކެއްގެ މައްސަލަ ފެންމަތިވުމާ ގުޅިގެން ކިޝިދާގެ ސަރުކާރަށް އޮތް ތާޢީދު އިތުރަށް ދަށްވިއެވެ.
އުފުލެމުންދާ ދިރިއުޅުމުގެ ޚަރަދުތަކާއި ތަކެތީގެ އަގުތަކާ އެއްވަރަށް ސަރުކާރު މުވައްޒަފުންނަށް މުސާރައިގެ ކުރިއެރުންތައް ލިބިފައި ނުވުމަކީ ވެސް ޢާންމުންގެ މެދުގައި އޮތް ބޮޑު ކަންބޮޑުވުމެކެވެ. އެހެންކަމުން, ކިޝިދާގެ ބަދަލުގައި ވެރިކަމާ ދެން ހަވާލުވެ ވަޑައިގަންނަވާނެ ބޭފުޅެއްގެ އެންމެ ބޮޑު ޒިންމާއަކަށް ވާނީ, ސަރުކާރާ މެދު ގެއްލިފައިވާ އިތުބާރު އައު ކުރުމެވެ. އޭގެ އިތުރުން, ޗައިނާއާ ދެމެދު އުފެދިފައިވާ ނުތަނަވަސް ކަން ހައްލު ކުރަން ވެސް ޖެހިވަޑައިގަންނަވާނެއެވެ.
ކިޝިދާއަކީ ފަހުގެ ތާރީޚެއްގައި ޖަޕާނުގައި އަށްވަނައަށް އެންމެ ދިގު މުއްދަތެއްގައި ވެރިކަން ކުރައްވާފައިވާ ބޮޑުވަޒީރެވެ. އޭނާގެ ސަރުކާރާ މެދު ޢާންމުންގެ މެދުގައި އިތުބާރު ގެއްލިފައި އޮތް ނަމަވެސް, ޢާންމުންގެ މާލީ ހާލަތު ރަނގަޅު ކޮށްދިނުމަށް އޭނާގެ ސަރުކާރުގައި ހަރުދަނާ ފިޔަވަޅުތަކެއް އަޅާފައިވެއެވެ. އޭގެ ތެރޭގައި މުސާރައިގެ ކުރިއެރުންތައް ދިނުން ހިމެނެއެވެ.
ކޮވިޑް-19ގެ ބަލިމަޑުކަމާ ގުޅިގެން ކުރިމަތިވި މާލީ ދަތިކަމުން އަރައިގަތުމަށް އެހީތެރިކަން ފޯރުކޮށް ދިނުމުގެ ގޮތުން އޭނާގެ ސަރުކާރުން ބޮޑު ޚަރަދެއް ކޮށްފައިވާ ކަން ވެސް ފާހަގަ ކޮށްލެވެއެވެ. އަދި, ޖަޕާނުގެ އިޤުތިޞާދީ ހާލަތު ހަރުދަނާ ކުރުމަށް އޭނާ އަޅުއްވާފައިވާ ހަރުދަނާ ފިޔަވަޅުތަކުގެ ތެރެއިން ބޭންކް އޮފް ޖަޕާން (ބީއޯޖޭ)ގެ ވެރިޔާގެ މަޤާމަށް ތަޢުލީމީ އަދި ޤާބިލު ބޭފުޅެއް ކަމުގައިވާ ކަޒުއޯ އުއޭދާ ޢައްޔަން ކުރެއްވުން ހިމެނެއެވެ.
ކިޝިދާއަކީ ސުލްޙައަށް އިސްކަން ދެއްވި ބޮޑުވަޒީރެއްގެ ގޮތުގައި ވެސް ފާހަގަ ކުރެވުނެވެ. ނަމަވެސް, ދެވަނަ ބޮޑު ހަނގުރާމައަށް ފަހު ޖަޕާނުގެ އަސްކަރިއްޔާގެ ބާރުވެރި ކަމާއި ގާބިލު ކަން އިތުރު ކުރުމަށް އެންމެ ބޮޑު ހޭދައެއް ކުރައްވާފައި ވަނީ ވެސް އޭނާއެވެ. އޭނާގެ ސަރުކާރުގައި އަސްކަރިއްޔާއަށް ހޭދަ ކުރާ ބަޖެޓު ދެގުނައަށް އިތުރު ކުރައްވާފައިވެއެވެ. އެއީ, އިރުމަތީ އޭޝިޔާގެ ސަރަޙައްދަށް ބާރާއި ނުފޫޒު ފޯރުވަން ޗައިނާއިން ކުރަމުންދާ މަސައްކަތްތަކާ ދެކޮޅަށް އޭނާ އަޅުއްވާފައިވާ ފިޔަވަޅެއްގެ ގޮތުގައި މަސްރަޙު ދިރާސާ ކުރާ ފަރާތްތަކުން ދެކެއެވެ.
އޭގެ އިތުުރުން, ދެކުނު ކޮރެޔާއާ ދެމެދު އުފެދިފައިވާ ޒަމާންވީ ހަތުރުވެރިކަމާއި ނުތަނަވަސް ކަން ހައްލު ކުރެއްވުމަށް ވެސް އޭނާ ހަރުދަނާ މަސައްކަތްތަކެއް ކުރެއްވިއެވެ. އެއާ އެކު, ދެ ޤައުމުގެ ދެމެދުގައި އޮތް ގުޅުންތައް ރަނގަޅުވެ, ސަރަޙައްދީ ސަލާމަތާ ގުޅޭ ކަންކަމުގައި އެކުގައި މަސައްކަތް ކުރަން ފެށިއެވެ.
ކިޝިދާގެ ބަދަލުގައި އެލްޑީޕީގެ ރައީސް ކަމުގެ މަޤާމަށް ބޭފުޅަކު އިންތިޚާބު ކުރުމަށް ބާއްވާ އިންތިޚާބުގައި ވާދަ ކުރައްވާނެ ކަމަށް ބެލެވޭ ބައެއް ކެނޑިޑޭޓުންގެ ތެރޭގައި ކުރީގެ ދިފާޢީ ވަޒީރު ޝިގެރު އިޝިބާ, މިހާރުގެ ޚާރިޖީ ވަޒީރު ޔޯކޮ ކަމިކަވާ, ޑިޖިޓަލް ދާއިރާގެ ވަޒީރު ތަރޯ ކޯނޯ އަދި ކުރީގެ ތިމާވެއްޓާ ބެހޭ ވަޒީރު ޝިންޖިރޯ ކޮއިޒުމީ ހިމެނެއެވެ.