ތައިލެންޑުގެ އައު ބޮޑުވަޒީރު ކަމުގެ މަޤާމަށް ޕޭޓޮންގޓާން ޗިނަވާތު އިންތިޚާބު ކޮށްފިއެވެ. 37 އަހަރުގެ ޕޭޓޮންގޓާނަކީ, ފިޔު ތައި ޕާޓީގެ ބާނީ އަދި ކުރީގެ ބޮޑުވަޒީރު ތަކްސިން ޗިނަވާތުގެ ދަރިކަނބަލުންނެވެ. ސިޔާސީ މައިދާނާ އަލަށް ގުޅިވަޑައިގަތް ޕޭޓޮންގޓާން ބޮޑުވަޒީރު ކަމުގެ މަޤާމަށް އިންތިޚާބު ކޮށްފައި ވަނީ ޤާނޫނު ހަދާ މަޖިލީހުން ނެގި ވޯޓެއްގައެވެ.
ތައިލެންޑުގެ ބޮޑުވަޒީރު ކަމުގެ މަޤާމަށް އައު ބޭފުޅަކު އިންތިޚާބު ކޮށްފައި ވަނީ, އެ މަޤާމުގައި ހުންނެވި ފިޔު ތައި ޕާޓީގެ ސެއްތާ ތަވީސިން ޤާނޫނުއަސާސީއާ ޚިލާފުވެފައިވާ ކަމަށް ކަނޑައަޅައި އެ މަޤާމުން ދުރު ކުރުމުންނެވެ. ބޮޑުވަޒީރު ކަމުގެ މަޤާމުން ސެއްތާ ދުރު ކޮށްފައި ވަނީ ތައިލެންޑުގެ ދުސްތޫރީ ކޯޓުންނެވެ. އޭނާ މަޤާމުން ދުރު ކޮށްފައި ވަނީ, ޤާނޫނު އަސާސީގައި ބަޔާން ކޮށްފައިވާ ޝަރުޠުތައް ފުރިހަމަ ނުވާ, އަދި އަޚުލާޤީ މިންގަނޑުތަކަށް ނުފެތޭ ބޭފުޅަކު އޭނާގެ ކެބިނެޓަށް ޢައްޔަން ކުރެއްވުމުގެ ކުށް ސާބިތުވާ ކަމަށް ކަނޑައަޅައެވެ.
ޕޭޓޮންގޓާނަކީ ތައިލެންޑުގެ ބޮޑުވަޒީރު ކަމުގެ މަޤާމަށް އިންތިޚާބު ކޮށްފައިވާ ދެވަނަ އަންހެން ބޭފުޅާއެވެ. އަދި, ބޮޑުވަޒީރު ކަމުގެ މަސްއޫލިއްޔަތުތަކާ ހަވާލުވެ ވަޑައިގަންނަވާ އެންމެ ޒުވާން ބޭފުޅާއެވެ. އޭނާއަކީ, އެ މަޤާމު އަދާ ކުރައްވާ ޗިނަވާތު ޢާއިލާގެ ތިންވަނަ ބޭފުޅާއެވެ. އޭނާގެ ކުރިން އެ މަޤާމު ފުރުއްވާފައިވާ ބޭފުޅުންގެ ތެރޭގައި ބައްޕާފުޅު ތަކްސިނާއި ބޮޑުދައިތާފުޅު ޔިންގލަކް ޗިނަވާތު ހިމެނި ވަޑައިގަންނަވައެވެ.
އައު ބޮޑުވަޒީރެއް އިންތިޚާބު ކުރުމަށް ޤާނޫނު ހަދާ މަޖިލީހުގައި ނެގި ވޯޓުގައި ޕޭޓޮންގޓާނަށް 319 މެންބަރުންގެ ތާޢީދު ލިބުނެވެ. އެއީ, މަޖިލީހުގެ ތިންބައިކުޅަ ދެބައި އަޣުލަބިއްޔަތެވެ. ޕޭޓޮންގޓާނަކީ މީގެ ކުރިން ސަރުކާރުގެ އެއްވެސް މަޤާމެއް އަދާ ކުރައްވާފައިވާ ބޭފުޅެއް ނޫނެވެ. ނަމަވެސް, ބޮޑުވަޒީރު ކަމުގެ މަޤާމަށް އޭނާގެ ނަން ހުށަހަޅުއްވާފައި ވަނީ އޭނާގެ ބައްޕާފުޅު ތަކްސިން ކަމަށް ބެލެވެއެވެ.
ބޮޑުވަޒީރު ކަމުގެ މަޤާމުގައި ޕޭޓޮންގޓާނަަށް އެންމެ ފުރަތަމަ ވެސް ކުރިމަތިލައްވަން ޖެހިވަޑައިގަންނަވާނެ އެންމެ ބޮޑު ގޮންޖެހުން ގުޅިފައި ވަނީ ތައިލެންޑަށް ކުރިމަތިވެފައިވާ އިޤުތިޞާދީ ދަތިތަކުން އަރައިގަނެ, ދަށްވެފައިވާ އިޤުތިޞާދީ ދުވެލި ހަލުވި ކުރައްވާނެ މަގެއް ހޯއްދެވުމުގައެވެ. އޭނާ ބޮޑުވަޒީރު ކަމުގެ މަޤާމާ ހަވާލުވެ ވަޑައިގަންނަވާފައި ވަނީ, ފިއު ތައި ޕާޓީއަށް އޮތް ތާޢީދު ފަނޑުވެ, އެ ޕާޓީއާ ދެކޮޅު ސިޔާސީ ހަރަކާތްތަކުން ކުރިއެރުންތަކެއް ހޯދަމުންދާ ދަނޑިވަޅެއްގައެވެ.
ބޮޑުވަޒީރު ކަމުގެ މަޤާމަށް ޕޭޓޮންގޓާން އިންތިޚާބު ކުރުމަކީ ޗިނަވާތު ޢާއިލާއިން އަޅާފައިވާ ގޯސް ފިޔަވަޅެއްގެ ގޮތުގައި މަސްރަޙު ދިރާސާ ކުރާ ބައެއް ފަރާތްތަކުން ގަބޫލު ކުރެއެވެ. "ޗިނަވާތު ޢާއިލާއިން އަޅާފައި އެ ވަނީ ރިސްކު [ގެއްލުން] ބޮޑު ފިޔަވަޅެއް. ތަކްސިންގެ ދަރިކަނބަލުން ނެރެފައި އެ ވަނީ އިދިކޮޅުން ދިއްކޮށްފައިވާ ބަޑިތަކުގެ ކުރިމައްޗަށް. އެއީ, ނާޒުކު މަޤާމެއް،" މަސްރަޙު ދިރާސާ ކުރައްވާ ބޭފުޅެއް ކަމުގައިވާ ނަޓާޕޯން ބޫމަހާކޫން ވިދާޅުވިއެވެ.
ސެއްތާގެ ވެރިކަމަށް އަހަރު ނުފުރެނީސް ދުސްތޫރީ ކޯޓުން އޭނާގެ ސަރުކާރު ވައްޓަައިލުމުން, އެ މަޤާމާ ހަވާލުވެ ވަޑައިގެންނެވި ޕޭޓޮންގޓާނަަށް ކުރިމަތިލައްވަން ޖެހިވަޑައިގަންނަވާނެ ޢަދާވަތްތެރިކަން ސާފުވާ ކަމުގައި މަސްރަޙު ދިރާސާ ކުރާ ފަރާތްތަކުން ދެކެއެވެ. ފިޔު ތައި ޕާޓީއާއި ތައިލެންޑުގެ ޝާހީ އަސްކަރިއްޔާއާ ދެމެދު އުފެދިފައި އޮތް ޒަމާންވީ ޢަދާވާތްތެރި ކަމުގެ ތެރެއިން, އަސްކަރިއްޔާއިން އަޑީގައި އޮވެ ހިންގި ބަޣާވާތްތަކުގައި މީގެ ކުރިން ވެސް އެ ޕާޓީގެ ދެ ސަރުކާރެއް ވައްޓައިލާފައިވާ ކަން ފާހަގަ ކޮށްލަން ޖެހެއެވެ.
ތައިލެންޑުގެ ދުސްތޫރީ ކޯޓުން ދާދި ފަހުން މޫވް ޕޯވަރޑް ޕާޓީ (އެމްއެފްޕީ) އުވައިލާފައިވާ ކަން ވެސް ފާހަގަ ކޮށްލަން ޖެހެއެވެ. އެއީ, އެންމެ ފަހުން ބޭއްވި ޢާންމު އިންތިޚާބުގައި ޤާނޫނު ހަދާ މަޖިލީހުގައި އެންމެ ގިނަ ދާއިރާއިން ގޮނޑި ކާމިޔާބު ކުރި ޕާޓީއެވެ. އެމްއެފްޕީ އުވައިލުމުން އެ ޕާޓީގެ މެންބަރުން ވަނީ ޕީޕަލްސް ޕާޓީގެ ނަމުގައި އައު ޕާޓީއެއް އުފައްދާފައެވެ.