އިންޑިޔާގެ އިރުމަތީ ކަލްކަތާގައި އަންހެން ޑޮކްޓަރެއް ރޭޕުކޮށް މަރައިލުމުން އެ ޤައުމުގެ އެކި ކަންކޮޅުތަކުގައި ފަށާފައިވާ މުޒާހަރާތަކާ އެކު, ހަސްފަތާލުތަކާއި ކުލިނިކުތަކުގައި ފަރުވާ ދިނުން މެދުކަނޑައިލައި ބަންދު ކޮށްފިއެވެ. އެ ތަންތަނުން ކުއްލި ހާލަތްތަކުގެ ޚިދުމަތްތައް ނޫން އެހެން ހުރިހާ ޚިދުމަތްތަކެއް މެދުކަނޑައިލާފައި ވަނީ ޞިއްޙީ ޚިދުތްތެރިން 24 ގަޑިއިރުގެ އިހުތިޖާޖެއް ފެށުމުންނެވެ.
ކަލްކަތާގެ މެޑިކަލް ކޮލެޖެއްގައި ޓްރެއިނީއެއްގެ ގޮތުގައި ވަޒީފާ އަދާ ކުރަމުން ދިޔަ 31 އަހަރުގެ ޑޮކްޓަރުގެ ހަށިގަނޑު ފެނިފައި ވަނީ އޮގަސްޓު 9ވަނަ ދުވަހުއެވެ. އޭނާ މަރައިލާފައި ވަނީ ރޭޕު ކުރުމަށް ފަހުގައި ކަމަށް ކަލްކަތާގެ ފުލުހުން ހާމަ ކުރިއެވެ. އެ ކަމުގައި ގިނަ ޢަދަދެއްގެ ބަޔަކު ބައިވެރިވި ކަމަށް ވެސް ބެލެވެއެވެ. ޑޮކްޓަރުގެ މަރުގެ ތުހުމަތުގައި ހައްޔަރު ކޮށްފައި ވަނީ ފުލުހުންގެ އިދާރާގައި ވޮލަންޓިޔަރެއްގެ ގޮތުގައި މަަސައްކަތް ކުރާ މީހެކެވެ.
ޑޮކްޓަރުގެ މަރާ ގުޅިގެން އިންޑިޔާގެ އެކި ކަންކޮޅުތަކުގައި ކުރަމުންދާ މުޒާހަރާތަކާ އެކު ފަށާފައިވާ އިހުތިޖާޖުގައި މިލިޔަނަކަށް ވުރެ ގިނަ ޑޮކްޓަރުން ބައިވެރިވާނެ ކަމަށް ބެލެވެއެވެ. އެއާ އެކު, ދުނިޔޭގެ އެންމެ އާބާދީ ބޮޑު ޤައުމުގެ ޞިއްޙީ ފަރުވާގެ ނިޒާމަށް ބުރޫއަރައި ވަނީ ހުއްޓިފައެވެ. އިހުތިޖާޖު ހުއްޓައިލައި ޚިދުމަތްތައް އަލުން ފެށުމަށް ސަރުކާރާއި ކަމާ ގުޅޭ އިދާރާތަކުން ދަނީ އިހުތިޖާޖުގެ ބައިވެރިންނަށް ބާރު އަޅަމުންނެވެ.
އިންޑިޔާގެ އެކި ކަންކޮޅުތަކުގައި ޚިދުމަތްދޭ ޑޮކްޓަރުންނާއި, ޑޮކްޓަރު ކަން ކިޔަވަމުންދާ ދަރިވަރުން އިހުޖާޖު ފަށާފައި ވަނީ އިންޑިޔާ ގަޑިން ހެދުނު 6 ޖެހިއިރެވެ. އެންމެ ގިނަ ޑޮކްޓަރުން ހިމެނޭ ޖަމުޢިއްޔާ, އިންޑިއަން މެޑިކަލް އެސޯސިއޭޝަން (އައިއޭއެމު)ން ބުނީ, ހަސްފަތާލުތަކާއި ކުލިނިކުތަކުގައި ސަރޖަރީ ފަދަ ޚިދުމަތް ދިނުމުގެ އިތުރުން ބަލި މީހުން ބެލުމުގެ ޚިދުމަތްތައް މެދުކަނޑައިލާފައިވާ ކަމުގައެވެ.
ޑޮކްޓަރުގެ މަރާ ގުޅިގެން ފެށި މުޒާހަރާއާއި އިހުތިޖާޖަށް އެއްބާރުލުން ދޭނެ ކަމުގައި ކަލްކަތާ އޮންނަ ހުޅަނގު ބަންގާލް ސްޓޭޓުގެ ސަރުކާރުން ވަނީ ހާމަ ކޮށްފައެވެ. އަދި, ޑޮކްޓަރުގެ މަރުގެ ތަޙުޤީޤު އަވަސްކޮށް, އެ ކަމުގައި ޒިންމާވާ މީހުންނަށް ހަރުކަށި އަދަބު ދިނުމަށް އެ ސްޓޭޓްގެ ޗީފް މިނިސްޓަރު މަމްތާ ބޭނަރްޖީ ވަނީ ގޮވައިލައްވާފައެވެ. ޑޮކްޓަރު ރޭޕުކޮށް މަރައިލުމުގެ އަމަލު ހިންގާފައިވާ އާރްޖީ ކާރް މެޑިކަލް ކޮލެޖުގެ ކައިރީގައި ފުލުހުން ވަނީ ރައްކާތެރި ކަމުގެ ފިޔަވަޅުތައް ވެސް ވަރުގަދަ ކޮށްފައެވެ.
މުޒާހަރާއާއި އިހުތިޖާޖާ ގުޅިގެން ބަލި މީހުންނަށް ބޮޑެތި ތަކުލީފުތަކެއް ކުރިމަތިވެފައިވާ ކަމުގައި އޯލް އިންޑިޔާ އިސްޓިޓިއުޓް އޮފް މެޑިކަލް ސައިންސަސްގެ އޮފިޝަލެއް ކަމުގައިވާ ޑރ ޕްރަބާސް ރަންޖަން ޓްރިޕާތީ ވިދާޅުވިއެވެ. އޮޅީސާ ސްޓޭޓްގެ ހަސްފަތާލުގައި ޑޮކްޓަރަށް ދެއްކުމަށް ގިނަ ޢަދަދެއްގެ ބަލި މީހުން ކިޔޫގައި ޖެހެމުންދާ ކަމަށާއި, އެ ހަސްފަތާލުތަކުގައި ވަޒީފާ އަދާ ކުރާ ގިނަ ޑޮކްޓަރުން ވެސް އިހުތިޖާޖު ކުރަމުންދާ ކަމުގައި އޭނާ ވިދާޅުވިއެވެ. އޭގެ އިތުރުން, އަމިއްލަ ފަރާތްތަކުން ހިންގާ ކުލިނިކުތަކުން ވެސް ވަނީ ޚިދުމަތްތައް މެދުކަނޑައިލާފައެވެ.
ޑޮކްޓަރުގެ މަރާ ގުޅިގެން ކުރަމުންދާ މުޒާހަރާގެ ބައިވެރިން ގޮވައިލަމުން ދަނީ އަނިޔާއިން އަންހެނުން ސަލާމަތް ކުރުމަށް ހަރުދަނާ ފިޔަވަޅުތަކެއް އެޅުމަށެވެ. "މި ޤައުމުގައި ޕްރޮފެޝަނަލް ދާއިރާގައި ވަޒީފާ އަދާ ކުރާ ގިނަ މީހުންނަކީ އަންހެނުން. އެ މީހުންގެ ސަލާމަތާއި ރައްކާތެރި ކަން ކަށަވަރު ކޮށްދިނުމަށް އެތަކެއް ފަހަރަކު އާދޭސް ކުރެވިއްޖެ،" އައިއެމްއޭގެ ރައީސް އާރްވީ އަޝޯކް ވިދާޅުވިއެވެ.
ކަލްކަތާގެ އާރްޖީ ކާރް މެޑިކަލް ކޮލެޖުގެ ޓްރެއިނީ ޑޮކްޓަރެއްގެ މަރާ ގުޅިގެން އިންޑިޔާގެ މައި ތަޙުޤީޤީ އިދާރާ, ސެންޓްރަލް ބިޔުރޯ އޮފް އިންވެސްޓިގޭޝަން (ސީބީއައި)ން ވަނީ ތަޙުޤީޤު ފަށާފައެވެ. އަދި, އެ ތަޙުޤީޤުގެ ދަށުން އެ ކޮލެޖުގައި ތަޢުލީމު ހާސިލު ކުރަމުންދާ ގިނަ ޢަދަދެއްގެ ދަރިވަރުންނާ ސުވާލު ކޮށްފައިވާ ކަމުގައި ކަލްކަތާގެ ފުލުހުން ހާމަ ކުރިއެވެ. ސީބީއައިން ސުވާލު ކޮށްފައިވާ މީހުންގެ ތެރޭގައި އެ ކޮލެޖުގެ ޕްރިންސިޕަލް ވެސް ހިމެނެއެވެ.
2012ވަނަ އަހަރު ވެރިރަށް ނިއު ދެއްލީގައި 23 އަހަރުގެ އަންހެން ދަރިވަރެއް ރޭޕުކޮށް މަރައިލުމާ ގުޅިގެން އިންޑިޔާގެ ޖިނާޢީ އަދުލުގެ ނިޒާމު މުރާޖަޢާކޮށް, އަންހެނުންނާ މެދު އަނިޔާވެރި ކުށްތައް ހިންގާ މީހުންނަށް ހަރުކަށި އަދަބު ދިނުމަށް އިސްލާހުތަކެއް ގެނެސްފައިވެއެވެ. ނަމަވެސް, މަސްރަޙު ދިރާސާ ކުރާ ފަރާތްތަކުން ބުނީ, އެ ބަދަލުތަކާ އެކު ވެސް, އަންހެނުންނަށް ކުރިމަތިވެފައިވާ ނުރައްކާތެރި ހާލަތަށް އެއްވެސް ބަދަލެއް އައިސްފައި ނުވާ ކަމުގައެވެ.
އިންޑިޔާގެ ޞިއްޙީ ދާއިރާގައި ވަޒީފާ އަދާކުރާ ޑޮކްޓަރުންނާއި ޞިއްޙީ ޚިދުމަތްތެރިންގެ މެދުގައި އޮތް އެންމެ ބޮޑު ކަންބޮޑުވުންތަކުގެ ތެރޭގައި ގިނަ ވަގުތު ވަޒީފާ އަދާ ކުރަން ޖެހުމާއި, ވަޒީފާގެ މާހައުލުގައި ރައްކާތެރިކަން ނެތުން ފާހަގަ ކުރެވެއެވެ. އަދި, އެކަށީގެންވާ ވަރުގެ އާމްދަނީއެއް ނުލިބޭއިރު, ޞިއްޙީ ޚިދުމަތްތެރިންގެ ފުރާނައަށް ނުރައްކާވާ ފަދަ ގިނަ ހާދިސާތަކެއް ހިނގަމުންދާ ކަމުގައި އެ މީހުން ބުނެއެވެ. ތަފާސްހިސާބުތަކުން ފެންނަ ގޮތުގައި 2022ވަނަ އަހަރު އަންހެނުންނަށް އަނިޔާ ދިނުމުގެ މައްސަލަތަކާއި, އަންހެނުންނާ ދެކޮޅަށް ހިންގާ ކުށްތަކުގެ ޢަދަދު, އޭގެ ކުރީ އަހަރާ އަޅައިބަލާއިރު 4 އިންސައްތަ އިތުރުވިއެވެ.