ރަޝިޔާގެ އިރުމަތީ އައްސޭރިފަށުގައި އޮންނަ ކަމްޗާތުކާ ސަރަޙައްދަށް ރިކްޓަރ މިންގަނޑުން 7.2ގެ ބާރުގަދަ ބިންހެލުމެއް އައިސްފިއެވެ. ބިންހެލުންތައް ދިރާސާ ކުރާ ވިލާތުގެ މަރުކަޒު, ޔޫރަޕިއަން މެޑިޓެރޭނިޔަން ސައިސްމޮލޮޖިކަލް ސެންޓަރ (އީއެމްއެސްސީ)ން ބުނީ ބިންހެލުން އައިސްފައި ވަނީ ކަމްޗާތްކާގެ އައްސޭރިފަށުން 51 ކިލޯމީޓަރު ފުނަށް ކަމުގައެވެ.
ބިންހެލުމާ ގުޅިގެން އެެމެރިކާގެ ނޭޝަނަލް ސުނާމީ ވޯނިންގ ސެންޓަރުން ވަނީ ސުނާމީއެއް އުފެދިފާނެ ކަމުގެ އިންޒާރު ކޮށްފައެވެ. ނަމަވެސް, ކުއްލި ހާލަތްތަކާ ބެހޭ ރަޝިޔާގެ ވުޒާރާއިން ބުނީ ސުނާމީއެއްގެ ނުރައްކާތެރިކަން ނެތް ކަމުގައެވެ. ބިންހެލުމާ ގުޅިގެން އެ ސަރަޙައްދަށް ރިކްޓަރ މިންގަނޑުން 3.9އާއި 5އާ ދެމެދުގެ ލޮޅުންތަކެއް އަރާފައިވާ ކަމުގައި ވެސް އެ ވުޒާރާއިން ހާމަކުރިއެވެ.
ބިންހެލުމުގެ ކުޑަ ވަގުތުކޮޅެއް ފަހުން ކަމްޗާތުކާ ސަރަޙައްދުގައި އޮންނަ ޕިއެތްރާޕާވްލޮކްސް-ކަމްޗަތުސްކީގައި އޮންނަ އަލިފާން ފަރުބަދައެއް ގޮވަން ފަށާފައިވެއެވެ. ޝިވިއުލޫޗް އަލިފާން ފަރުބަދަ އޮންނަނީ ޕިއެތްރާޕާވްލޮކްސް-ކަމްޗަތުސްކީއާ 280 މޭލު ދުރުގައެވެ. ޕިއެތްރާޕާވްލޮކްސް-ކަމްޗަތުސްކީއަކީ 180,000އެއްހާ މީހުންގެ އާބާދީއެއް ދިރިއުޅޭ ސަރަހައްދެކެވެ.
ރަޝިޔާގެ ދަޢުލަތުގެ މީޑިޔާއިން ބުނީ, އަލިފާން ފަރުބަދައިން އަރަމުންދާ ދުމާއި އަޅި 8 ކިލޯމީޓަރު މައްޗަށް ފެތުރިފައިވާ ކަމުގައެވެ. އަލިފާން ފަރުބަދައިން ދިޔާ އަލިފާން ވެސް ދަނީ ފައިބަމުންނެވެ. އަލިފާން ފަރުބަދަ ގޮވަން ފެށުމާއި ބިންހެލުމާ ގުޅުމެއް އޮތް ކަމަށް ބެލެވުނު ނަމަވެސް, ބިންހެލުމުގައި އެއްވެސް ރަށަކަށް ގެއްލުން ލިބިފައެއް ނެތެވެ. ނަމަވެސް, އެއްވެސް ޢުމްރަނީ ވަސީލަތަކަށް ގެއްލުން ލިބިފައިވޭތޯ ބެލުމަށް ކުއްލި ހާލަތްތަކާ ބެހޭ ވުޒާރާއިން މިހާރު ދަނީ ދިރާސާ ކުރަމުންނެވެ.