ރަޝިޔާއިން އަނެއްކާވެސް ޔޫކްރެއިނަށް އަމާޒުކޮށް ބެލިސްޓިކް މިސައިލް ޙަމަލާއެއް ދީފިއެވެ. ޔޫކްރެއިންގެ ވެރިރަށް ކީވަށް އަމާޒުކޮށް ދިން އެ ޙަމަލާއަކީ މި މަހު ޔޫކްރެއިނަށް ދިން ތިން ވަނަ ބެލިސްޓިކް މިސައިލް ޙަމަލާއެވެ.
ޢިބްތިދާއީ ތަފާސްހިސާބުތަކާ ހަވާލާދީ ޔޫކްރެއިންގެ އަސްކަރިއްޔާއިން މަޢުލޫމާތުދޭ ގޮތުގައި މިމަހު ރަޝިޔާއިން ފޮނުވި ގިނަ މިސައިލްތަކެއް ވަނީ އަމާޒަށް ވާސިލުވުމުގެ ކުރިން ވައްޓާލާފައެވެ. އާދިއްތަ ދުވަހުގެ ޙަމަލާއަކީ މިމަހުގެ ތިން ވަނަ ބެލިސްޓިކް ޙަމަލާކަން ފާހަގަކޮށް ޔޫކްރެއިން އަސްކަރިއްޔާއިން ބުނީ މިފަދަ ކޮންމެ ޙަމަލާއަކަށް ފަހު ދެ ވަނަ ޙަމަލާ ދިނުމަށް ހަ ދުވަހުގެ މުއްދަތެއް ނަގާކަމަށެވެ. އަދި ރަޝިޔާއިން ބޭނުން ކުރަމުންދަނީ އުތުރު ކޮރިއާއިން އުފައްދާފައިވާ ބެލިސްޓިކް މިސައިލްކަމަށް ޔޫކްރެއިނުން ތުހުމަތު ކުރެއެވެ.
ރަޝިއާއިން ޔޫކްރެއިނަށް އެންމެ ފަހުން ދިން ވައިގެ ޙަމަލާތަކުގެ ތެރެއިން، އެ ޤައުމުގެ އެކި ސަރަޙައްދު ތަކުން ފަސް ޑްރޯންއާއި އަށް މިސައިލް ވައްޓާލައިފައި ވާނެ ކަމަށް ވެސް ޔޫކްރެއިން އަސްކަރިއްޔާއިން ބުނެއެވެ. އާދިއްތަ ދުވަހުގެ ހެނދުނު ރަޝިޔާއިން ޔޫކްރެއިނަށް އަމާޒުކޮށް ފޮނުވާލީ ތިން ބެލިސްޓިކް މިސައިލާއި ތިން ކްރޫސް މިސައިލާއި ދެ އެއަރ ކްރާފްޓް މިސައިލެވެ. ޔޫކްރެއިން އަސްކަރިއްޔާއިން ބުނީ އޭގެ ތެރެއިން ފަސް މިސައިލް ވައްޓާލެވުނު ކަމަށާއި އަނެއް ތިން މިސައިލް އަމާޒަށް ވާސިލުނުވާ ކަމަށެވެ.
އެ ޙަމަލާތަކުގައި އެއްވެސް މީހަކަށް އަނިޔާވެފައިވާކަމުގެ ރިޕޯޓެއް ނުލިބޭކަމަށް ޔޫކްރެއިންގެ އޮފިޝަލުން ބުނެއެވެ. އެހެން ނަމަވެސް އިމާރާތްތަކަށް އެކިވަރުގެ ގެއްލުން ލިބިފައިވާކަމަށް ވަނީ ރިޕޯޓުކޮށްފައެވެ.
ޔޫކްރެއިންގެ ރައީސް ވޮލޮޑިމީރް ޒެލެންސްކީ ވަނީ ރަޝިޔާއިން އެ ޤައުމުގެ އާންމުން ދިރިއުޅޭ އިމާރާތްތަކަށް އަމާޒުކޮށް ޙަމަލާ ދެނީ ގަސްތުގައި މީހުންގެ ހިއްތަކުގައި ބިރުވެރިކަން އުފައްދަންކަމަށް ވިދާޅުވާ ވިދާޅުވުން އަނެއްކާވެސް ތަކުރާރުކުރައްވާފައެވެ. އަދި މި ނިމުނު ހަފުތާ އެކަނިވެސް ރަޝިއާއިން އެ ޤައުމަށް 40 މިސައިލް ޙަމަލާއާއި 750 ބޮމުގެ ޙަމަލާ އަދި 200 ޑްރޯން ޙަމަލާ ދީފައިވާކަމަށް ޒެލެންސްކީ ވިދާޅުވެއެވެ.
ރަޝިޔާއިން އަސްކަރީ ޙަރަކާތެއްގެ ނަމުގައި ޔޫކްރެއިނަށް އަރައި ހަމަލާދޭން ފަށާފައި ވަނީ 2022 ވަނަ އަހަރުގެ ފެބްރުއަރީ މަހުގެ 24 ވަނަ ދުވަހުއެވެ. ދެ އަހަރަށް ވުރެ ގިނަ މުއްދަތަކަށް ހަނގުރާމަ ދިގުދެމިގެން ގޮސްފައިވާ އިރު، ޔޫކްރެއިންގެ އިރުއުތުރުގެ 18 އިންސައްތަ ސަރަހައްދު މިހާރު އޮތީ ރަޝިއާގެ އަތް ދަށުގައެވެ. ހުޅަނގުގެ އެހީއާއެކު ރަޝިޔާއާ ހަނގުރާމަ ކުރަމުންދާ ޔޫކްރެއިނުން ވަނީ މި މަހުގެ ހަ ވަނަ ދުވަހު ސަރަހައްދީ ރޮގު ހުރަސްކޮށް ރަޝިޔާގެ ކްރޫސްކަށް އަރައިގަނެފައެވެ.