އެމްޕޮކްސް (މަކުނުވިދުރި ނުވަތަ މަންކީޕޮކްސް) ޖެހިފައިވާ މީހަކު ފިލިޕީންސުން ފެނިއްޖެއެވެ. އެއީ މިދަޔަ އަހަރުގެ ޑިސެމްބަރު މަހުގެ ފަހު އެ ޤައުމުން އެމްޕޮކްސް ޖެހިފައިވާ މީހެއް ފެނުނު ފުރަތަމަ ފަހަރެވެ.
ފިލިޕީންސްގެ ޞިއްޙަތާބެހޭ ވުޒާރާއިން ބުނެފައިވާ ގޮތުގައި ބަލި ޖެހިފައިވަނީ އުމުރުން 33 އަހަރުގެ ފިލިޕީންސް ފިރިހެނަކަށެވެ. އޭނާ ޤައުމުން ބޭރަށް ދަތުރުކުރި ކަމުގެ އެއްވެސް ލިޔެކުމެއް ނެތް ކަމަށާއި އެނާއަށް ޖެހިފައި ވަނީ އެމްޕޮކްސްގެ ކޮން ބާވަތެއްތޯ ބެލުމަށް ތަހްލީލުތައް ހަދާފައިވާ ކަމަށް އެ އިދާރާއިން ބުނެއެވެ.
އެފްރިކާގެ ޤައުމުތަކުގައި ފެތުރެމުންދާ އެމްޕޮކްސް ވައިރަސް ދުނިޔޭގެ އެކި ކަންކޮޅުތަކަށް ފެތުރިދާނެ ކަމަށް ބަލައި ދުނިޔޭގެ ޞިއްޙަތު ޖަމުޢިއްޔާއިން ވަނީ މި މަހުގެ 14 ވަނަ ދުވަހު ދުނިޔޭގައި ޢާންމު ޞިއްޙަތުގެ ނުރައްކަލުގެ ހާލަތު އިޢުލާނު ކޮށްފައެވެ. އެފްރިކާ ސެންޓަރސް ފޯ ޑިޒީޒް ކޮންޓްރޯލް އެންޑް ޕްރިވެންޝަން (އެފްރިކާ ސީޑީސީ)ން ވަނީ, އެފްރިކާގައި ވެސް ޢާންމު ޞިއްޙަތުގެ ނުރައްކަލުގެ ޙާލަތު އިޢުލާނު ކޮށްފައެވެ.
ހަލުވިކަމާއެކު އެމްޕޮކްސް ފެތުރެމުންދާ ދަނޑިވަޅެއްގައި އެ ބަލީގެ އައު ބާވަތެއް ވެސް ވަނީ ފެނިފައެވެ. އޮގަސްޓް 15 ދުވަހު ސްވިޑެނުން ފެނުނު އައު ވޭރިއަންޓާއެކު އެފްރިކާ ބައްރުން ބޭރުގައި ބަލި ފެތުރެން ފަށާފައިވާކަން ވަނީ ކަށަވަރުކުރެވިފައެވެ. އެއާ އެކު ޔޫރަޕިއަން ސެންޓަރ ފޯ ޑިޒީޒް ކޮންޓްރޯލް އެންޑް ޕްރިވެންޝަން (އީސީޑީސީ)ން ވިލާތުގައި އެމްޕޮކްސްގެ ނުރައްކަލުގެ ހާލަތު މެދުމިނަށް މަތިކުރިއެވެ. އަދި, ބަލި ފެތުރެމުންދާ ސަރަޙައްދުތަކަށް ދަތުރު ކުރުމަށް ފަހު އެނބުރި އަންނަ މީހުން ޓެސްޓު ކުރުމަށް މެންބަރު ޤައުމުތަކަށް އެންގިއެވެ.
އޮގަސްޓް 16 ވަނަ ދުވަހު ޕާކިސްތާނުން ވެސް ވަނީ އެމްޕޮކްސް ބަލި ޖެހިފައިވާ މީހަކު ފެނިގެން ރިޕޯޓުކޮށްފައެވެ. އޭނާ އަކީ ގަލްފުގެ ޤައުމަކަށް ދަތުރު ކުރުމަށްފަހު އަނބުރާ ޤައުމަށް އައި މީހެއް ކަމަށް ޕާކިސްތާނުގެ އިދާރާތަކުން ބުނެއެވެ. ޕާކިސްތާނުން ފެނިފައި ވަނީ ބަލީގެ ކޮން ބާވަތެއް ކަމެއް އަދި ދެނެގަނެވިފައެއް ނުވެއެވެ.
ކުރިއަށް އޮތް ހަފުތާތަކުގައި ދުނިޔޭގެ އެކި ކަންކޮޅުތަކުން ބަލި ޖެހިފައިވާ މީހުން ދެނެގަނެވޭނެ ކަމަށް ބެލެވޭ ކަމަށް ދުނިޔޭގެ ޞިއްޙަތު ޖަމުޢިއްޔާއިން ވަނީ ބުނެފައެވެ. ނަމަވެސް, އެ ކަމާ ގުޅިގެން އެއްވެސް ޤައުމަކަށް ދަތުރު ކުރުން މަނާ ކުރުން ފަދަ ފިޔަވަޅުތައް އަޅަން ޖެހޭ ކަމަށް އެ އިދާރާއިން ގަބޫލެއް ނުކުރެއެވެ.
އެމްޕޮކްސް ޢާންމު ގޮތެއްގައި ފެންނަނީ އެފްރިކާ ބައްރުގެ މެދުތެރެއާއި ހުޅަނގުގެ ޤައުމުތަކުގައެވެ. ނަމަވެސް, 2022ވަނަ އަހަރު އެ ބަލި ދުނިޔޭގެ އެކި ކަންކޮޅުތަކުގައި ހަލުވިކަމާ އެކު ފެތުރެން ފެށިއެވެ. އަދި, 70އަށްވުރެ ގިނަ ޤައުމުން އެ ބަލި ޖެހިފައިވާ މީހުން ދެނެގަނެވުނެވެ.
އެމްޕޮކްސަކީ ސްމޯލްޕޮކްސްގެ ވައިރަހުގެ ޢާއިލާއަށް ނިސްބަތްވާ ވައިރަހެކެވެ. އެމްޕޮކްސް ޖެހިފައިވާ މީހުންގެ ފުށުން ފެންނަ ބައެއް އަލާމާތްތަކުގެ ތެރޭގައި ހުންއައުމާއި ހީކެރުވުމާއި, ހަށިގަނޑުގައި ރިއްސުން ހިމެނެއެވެ. އަދިބައެއް މީހުންގެ މޫނާއި އަތާއި މޭމަތީގެ އިތުރުން ލަދުވެތި ގުވަނަން ހުންނަ ހިސާބުގައި ދޮސްގަނެފައިވާ ބޮޑެތި ފޮޅުތަކެއް ނަގައެވެ.