ރަޝިޔާގެ ހުޅަނގުގައި އޮތް ކޫރްސްކް ސަރަޙައްދަށް ޔޫކްރެއިންގެ ސިފައިން އެއްގަމު މަގުން އަރައި ހަނގުރާމަ ފުޅާ ކުރުމާ ގުޅިގެން ސުލްޙައަށް ހުރަސް އެޅިފައިވާ ކަމުގައި ރަޝިޔާއިން ބުނެފިއެވެ. ޔޫކްރެއިންގެ ސިފައިން ކޫރްސްކަށް އަރައި ރަށްތަކާއި އަވަށްތަކަށް އަތްގަދަ ކުރަން ފަށާފައި ވަނީ އޮގަސްޓު 6ވަނަ ދުވަހުއެވެ.
އެ ކަމާ ގުޅޭ ގޮތުން ވާހަކަފުޅު ދައްކަވަމުން ރަޝިޔާގެ ރައީސް ވްލަޑިމިޔަރ ޕުޓިންގެ އިސް މުޝީރު, ޔޫރީ އުޝަކޮފް ވިދާޅުވީ ޔޫކްރެއިންގެ އަމަލުތަކާ ގުޅިގެން ސުލްޙައިގެ މަޝްވަރާތައް ބާއްވަން ރަޝިޔާއިން މި ވަގުތު ބޭނުން ނުވާ ކަމުގައެވެ. އަދި, ޔޫކްރެއިނާ އެކު މަޝްވަރާ ކުރަން ރަޝިޔާއިން މި ވަގުތު ބޭނުން ނުވި ނަމަވެސް, ފަހުން މަޝްވަރާތައް ބޭއްވުމުގެ ފުރުޞަތު އޮތް ކަމުގައި ވެސް އޭނާ ވިދާޅުވިއެވެ.
"އެ ކަމާ [ކޫރްސްކް ޙަމަލާތަކާ] ގުޅިގެން މި ވަގުތު އަޅުގަނޑުމެން އެއްވެސް މަޝްވަރާއެއް ބާއްވަން ބޭނުމެއް ނޫން،" އުޝަކޮފް ވިދާޅުވިއެވެ. ޔޫކްރެއިނާ އެކު ސުލްޙައިގެ މަޝްވަރާތަކުގައި ބައިވެރިވާން ތައްޔާރަށް އޮތް ކަމުގައި ޕުޓިން ޖޫން މަހު ވިދާޅުވެފައިވެއެވެ. ނަމަވެސް, ކޫރްސްކް ޢުދުވާނާ ގުޅިގެން އެ ކަމަށް ހުރަސް އެޅިފައިވާ ކަމަަށް މަސްރަޙު ދިރާސާ ކުރާ ފަރާތްތަކުން ގަބޫލު ކުރެއެވެ.
ޕުޓިންގެ ހުށަހެޅުމާ ގުޅޭ ގޮތުން ސުވާލު ކުރުމުން އުޝަކޮފް ވިދާޅުވީ އެ ހުށަހެޅުން ބާޠިލު ކޮށްފައި ނުވާ ކަމުގައެވެ. "ނޫން, އެ ކަން [ހުށަހެޅުން] ބާޠިލު ކޮށްފައެއް ނުވާނެ. ނަމަވެސް, ސުލްޙައިގެ މަޝްވަރާ ކުރަން މިއީ އެންމެ މުނާސަބު ވަގުތެއް ނޫން،" އޭނާ ވިދާޅުވިއެވެ.
އުޝަކޮފް ވިދާޅުވީ, މަޝްވަރާތަކާ ގުޅޭ ގޮތުން ރަޝިޔާއިން މިހާރު ގެންގުޅޭ ޚިޔާލު ފަހުން ބަދަލުވެދާނެ ކަމަށާއި, ނަމަވެސް އެ ކަން ވާނެ ތާރީޚެއް ދަންނަވަން ނޭނގޭ ކަމުގައެވެ. "އަޅުގަނޑަށް ބުނެދޭކަށް ނޭނގޭ. އެއީ, ހަނގުރާމައިގެ މައިދާނާއި ހާލަތާ ގުޅިގެންދާނެ ނިންމުމެއް،" އޭނާ ވިދާޅުވިއެވެ.
ޔޫކްރެއިނުން ކޫރްސްކަށް ޙަމަލާ ދީފައި ވަނީ ސަރަޙައްދީ ރޮނގު ހުރަސްކޮށް އެތަކެއް ހާސް ސިފައިން ރަޝިޔާއަށް ފޮނުވައިގެންނެވެ. މިއީ, ދެވަނަ ބޮޑު ހަނގުރާމައަށް ފަހު, ރަޝިޔާގެ ސިޔާދަތީ މިނިވަން ކަމާއި އިސްތިޤުލާލަށް ބޭރުގެ ބާރަކުން ނުރައްކާ ކޮށްފައިވާ ފުރަތަމަ ފަހަރެވެ. ކޫރްސްކަށް ސިފައިން ފޮނުވައި ރަށްތަކާއި އަވަށްތަކަށް ޔޫކްރެއިންގެ ސިފައިން އަތްގަދަ ކުރަން ފެށުމުން ބައިނަލްއަޤުވާމީ މައިދާނުގައި ރަޝިޔާގެ އަސްކަރިއްޔާގެ އަގު ވެއްޓިގެން ދިޔައެވެ. އަދި, ލަދުގަންނަން ޖެހުނެވެ.
ޔޫކްރެއިނާ އެކު ސުލްޙައިގެ މަޝްވަރާތައް ބާއްވަން ޖޫން މަހު ޕުޓިން ގޮވައިލެއްވި ނަމަވެސް, އޭނާ ވަނީ އެ ކަމަށް ޝަރުޠުތަކެއް ކަނޑައަޅުއްވާފައެވެ. އޭގެ ތެރޭގައި ނޭޓޯގެ މެންބަރު ކަން ހޯދަން ޔޫކްރެއިނުން ކުރަމުންދާ މަސައްކަތްތައް ހުއްޓައިލައި, ރަޝިޔާއިން މިހާރު އަތްގަދަ ކޮށްފައިވާ ޔޫކްރެއިންގެ ސަރަޙައްދުތަކަކީ ރަޝިޔާގެ ބިންތަކެއްގެ ގޮތުގައި ބަލައިގަތުން ހިމެނެއެވެ. ނަމަވެސް, މިއީ ޔޫކްރެއިނުން އެއްބަސްވާން ތައްޔާރަށް އޮތް ޝަރުޠުތަކެއް ނޫނެވެ.
2022ވަނަ އަހަރުގެ ފެބުރުވަރީ މަހުގެ 24ވަނަ ދުވަހު ރަޝިޔާ ސިފައިން ޔޫކްރެއިނަށް އަރައި ފެށި ހަނގުރާމައިގައި އެ ޤައުމުގެ ބިމުން 18 އިންސައްތަ ސަރަޙައްދަކަށް ވަނީ އަތްގަދަ ކޮށްފައެވެ. އޭގެ ތެރޭގައި އިރުމަތީ ދޮންބާސްގެ ލުހާންސްކާއި ދޮންޏެސްކުގެ ބޮޑު ސަރަޙައްދެއްގެ އިތުރުން ދެކުނުގައި އޮތް ޒަޕޮރީޜިޔާގެ ބައެއް ހިސާބުތައް ވެސް ހިމެނެއެވެ. ޔޫކްރެއިންގެ އެންމެ ދެކުނުން އޮތް ކްރައިމިޔާއަށް ރަޝިޔާ ސިފައިން އަތްގަދަ ކޮށްފައި ވަނީ 2014ވަނަ އަހަރުއެވެ.