އިންޑިޔާގެ ބޭސް އުފައްދާ ކާރުހާނާއެއްގައި ރޯވެ 17 މީހުން މަރުވެއްޖެއެވެ. ރޯވެފައި ވަނީ އަންދްރަ ޕްރަދޭޝްގެ އަނަކަޕައްލީ ސަރަހައްދުގައި އެސިއެންޝިއާ އެޑްވާންސްޑް ސައިންސެސްގެ ބޭސް އުފައްދާ ކާރުހާނާއެއްގައެވެ. ކާރުހާނާގައި ރޯވެފައި ވަނީ ކެމިކަލް ރިއެކްޓަރެއްގައި ރޯވެ ގޮވުމުގެ ސަބަބުންނެވެ.
އެ ހާދިސާގައި 17 މީހުން މަރުވެ 40 މީހުންނަށް އެކިވަރުގެ އަނިޔާތައް ލިބިފައިވާކަމަށް އަންދްރަ ޕްރަދޭޝްގެ ސަރަޙައްދީ ސަރުކާރުން މައުލޫމާތު ދެއެވެ. އެ ހާދިސާއަކީ ފަހުގެ ތާރީޚެއްގައި އިންޑިޔާގައި ހިނގި އެ ފަދަ އެންމެ ނުރައްކާތެރި ހާދިސާއެވެ. ކާރުހާނާގައި ތާށިވެފައި ތިބި މީހުން ސަލާމަތްކުރުމަށް ގިނަ އިރުތަކެއް ވަންދެން މަސައްކަތް ކުރަން ޖެހުނެވެ.
އެ ހާދިސާ ހިނގަން މެދުވެރި ސަބަބު ދެނެގަތުމުގެ މަސައްކަތްތައް ދަނީ ކުރަމުންނެވެ. އެ ގޮތުން އެއީ މީހެއްގެ އިހުމާލެއްގެ ސަބަބުން ހިނގި ކަމެއްތޯ ކަށަވަރުކުރުމަށް ކާރުހާނާގައި މަސައްކަތްކުރާ މީހުންނާ ދަނީ ސުވާލުކުރަމުންނެވެ.
އެ ހާދިސާގައި މަރުވި މީހުންގެ އާއިލާތަކަށް އިންޑިޔާގެ ބޮޑުވަޒީރު ނަރެންދްރަ މޯދީ ވަނީ ތައުޒިޔާ ވިދާޅުވެފައެވެ. އިންޑީޔާއަކީ ދުނިޔޭގެ ބޭސްފިހާރައިގެ ގޮތުގައި މަޝްހޫރުވެފައިވާ ޤައުމެކެވެ. އެ ޤައުމުގައި ބޭސް އުފައްދާ އެތައް ސަތޭކަ ކާރުހާނާއެއް ހުރެއެވެ.
މިދިޔަ އަހަރު ވެސް އަނަކަޕައްލީގައި ހުރި ކާރުހާނާއެއްގައި ރޯވެ ދެ މީހަކު ވަނީ މަރުވެފައެވެ.