ބަންގްލަދޭޝް ސަރުކާރާ ދެކޮޅަށް ކުރި މުޒާހަރާތައް ރޫޅައިލުމުގައި އިންސާނީ ޙައްޤުތަކަށް އަރައިގަނެފައިވާ ކަމަށް ކުރެވޭ ތުހުމަތުތައް ތަޙުޤީޤު ކުރުމުގައި އދން އެހީތެރިކަން ފޯރުކޮށްދޭން ފަށައިފިއެވެ. އެ ޤައުމުގެ ކުރީގެ ބޮޑުވަޒީރު ޝައިޚް ޙަސީނާގެ ސަރުކާރާ ދެކޮޅަށް ކުރި މުޒާހަރާތައް ރޫޅައިލުމުގައި ފުލުހުން ބާރުގެ ބޭނުން ކުރުމާ ގުޅިގެން ހިނގި ކުރިމަތިލުންތަކުގައި 300އަށްވުރެ ގިނަ މީހުން މަރުވިއެވެ. އަދި, އެތަކެއް ހާސް ބަޔަކު ޒަޚަމުވިއެވެ.
މުޒާހަރާތައް އިންތިޒާމު ކޮށްފައި ވަނީ ކޮލެޖުތަކާއި ޔުނިވަރސިޓީތަކުގައި ތަޢުލީމު ހާސިލު ކުރާ ދަރިވަރުންނެވެ. މުޒާހަރާތައް ރޫޅައިލުމުގެ ތެރޭގައި އެ ދަރިވަރުންނާއި ޢާންމުންގެ އިންސާނީ ޙައްޤުތަކަށް ފުލުހުން އަރައިގަނެފައިވާ ކަމަށް ކުރެވޭ ތުހުމަތުތައް ތަޙުޤީޤު ކުރުމުގައި އެހީތެރިކަން ފޯރުކޮށްދޭން އދގެ ޓީމެއް ވެރިރަށް ދާކާއަށް ދަތުރު ކުރާނެއެވެ. އަދި, ބަންގްލަދޭޝްގައި ވެރިކަން ކުރާ ވަގުތީ ސަރުކާރާ ބައްދަލު ކުރާނެއެވެ.
ހުސްވި ޖުލައި މަހު ފެށި މުޒާހަރާތަކުގެ ބައިވެރިން އަޑު އުފުލާފައި ވަނީ ސަރުކާރު ވަޒީފާތަކަށް މީހުން ޢައްޔަން ކުރުމުގައި އަމަލު ކުރަމުން ދިޔަ ކޯޓާ ނިޒާމު އުވައިލުމަށް ގޮވައިލައެވެ. ނަމަވެސް, މުޒާހަރާތައް ރޫޅައިލަން ފުލުހުން ބާރުގެ ބޭނުން ކުރުމާ ގުޅިގެން މުޒާހަރާގެ ބައިވެރިން ޝައިޚް ޙަސީނާގެ އިސްތިޢުފާއަށް ގޮވަން ފެށިއެވެ. އަދި, މުޒާހަރާގެ ބައިވެރިން ދާކާގައި ހުންނަ ބޮޑުވަޒީރުގެ ރަސްމީ ގަނޑުވަރުކޮޅު ހިސާރު ކުރަން އުޅުމުން, ޙަސީނާ ވަނީ ފިއްލަވައިގެން ޤައުމު ދޫކޮށް ވަޑައިގަންނަވާފައެވެ.
ޤައުމު ދޫކޮށް ޙަސީނާ އިންޑިޔާއަށް ވަޑައިގެންނެވުމުން ބަންގްލަދޭޝްގެ ބާރުގަދަ އަސްކަރިއްޔާއިން ވަނީ އޭނާ އިސްތިޢުފާ ދެއްވާފައިވާ ކަން އިޢުލާނު ކޮށްފައެވެ. ނަމަވެސް, ޙަސީނާގެ ފަރާތުން ވަނީ އެ ކަން ފަހުން ދޮގު ކޮށްފައެވެ. ޙަސީނާގެ ސަރުކާރު ވެއްޓުމުން, އެ ޤައުމުގައި ވަގުތީ ސަރުކާރެއް އެކުލަވައިލައި, އެ ސަރުކާރުގެ އިސް މުޝީރު ކަމުގެ މަޤާމަށް ނޮބެލް ސުލްޙައިގެ އިނާމު ހާސިލު ކުރައްވާފައިވާ މުޙައްމަދު ޔޫނުސް ވަނީ ޢައްޔަން ކޮށްފައެވެ.
ދާކާގައި ހުންނަ އދގެ އޮފީހުން ބުނީ, އިންސާނީ ޙައްޤުތަކާ ބެހޭ އދގެ ކޮމިޝަނަރުގެ އޮފީހުގެ ޓީމުން ސެޕްޓެންބަރު މަހުގެ 22ން 29އަށް ދާކާއަށް ޒިޔާރަތް ކުރާނެ ކަމުގައެވެ. "އެ ވަފުދުގެ މައިގަނޑު މަޤުޞަދަކަށް ވާނީ އިންސާނީ ޙައްޤުތައް ޙިމާޔަތްކޮށް ކުރިއެރުވުމުގައި އިސްކަންދޭން ޖެހޭ ކަންކަން ދެނެގަތުމުގައި އެހީތެރިކަން ފޯރުކޮށްދިނުން. މިއީ, ތަޙުޤީޤެއް ނޫން. ނަމަވެސް, ނިމިދިޔަ ހަމަނުޖެހުންތަކުގައި އިންސާނީ ޙައްޤުތަކަށް އަރައިގަނެފައިވާ ހާދިސާތައް ތަޙުޤީޤު ކުރުމަށް އެހީތެރިކަން ފޯރުކޮށްދެވޭނެ،" އދގެ އޮފީހުން ބުންޏެވެ.
އދގެ އޮފީހުގެ ޓީމުގައި އިސްކޮށް ހުންނެވީ އެ އޮފީހުގެ އޭޝިޔާ ޕެސިފިކް ސަރަޙައްދީ އޮފީހުގެ ވެރިޔާ ރޯރީ މަންގޮވެންއެވެ. އޭނާ ވަނީ ދާކާއަށް ވަޑައިގަންނަވައި, ބަންގްލަދޭޝްގެ ޚާރިޖީ ވަޒީރު މަސްޢޫދު ބިން މޮމެންއާ ބައްދަލު ކުރައްވާފައެވެ. އަދި, ހާލަތު ދެނެގަތުމަށް އިންސާނީ ޙައްޤުތަކާ ބެހޭ އދގެ ހައި ކޮމިޝަނަރުގެ އޮފީހުގެ ވަފުދެއް ކުރިއަށް އޮތް ހަފުތާތަކުގައި ދާކާއަށް ދަތުރު ކުރާނެ ކަމުގައި އެ ރަށުގައި ހުންނަ އދގެ އޮފީހުން ހާމަކުރިއެވެ.
އިންސާނީ ޙައްޤުތަކާ ބެހޭ އދގެ ހައި ކޮނިޝަނަރު, ފޮލްކަރ ތުރްކު ދާދި ފަހުން ވަނީ ބަންގްލަދޭޝްގެ ވަގުތީ ސަރުކާރުގެ މޫޝީރު ޔޫނުސަށް ފޯނުން ގުޅުއްވައި މަޝްވަރާ ކުރައްވާފައެވެ. އަދި, ބަންގްލަދޭޝްގެ ދަރިވަރުންނާ ދެކޮޅަށް ފުލުހުން ހިންގާފައިވާ އަމަލުތައް ތަޙުޤީޤު ކުރާނެ ކަން އޭނާ ޔޫނުސް އަރިހުގައި ދަންނަވާފައިވާ ކަން އޭނާގެ އޮފީހުން ހާމަކުރިއެވެ.