ތުރުކީވިލާތާއި ރަޝިޔާގެ އަސްކަރިއްޔާ ގުޅިގެން ސޫރިޔާގެ އިރުއުތުރުގައި އޮންނަ ސަރަޙައްދީ ރޮނގު ބެލެހެއްޓުމުގެ މަސައްކަތް އަލުން ފަށައިފިއެވެ. އެ ކަން ހާމަ ކޮށްފައި ވަނީ ތުރުކީވިލާތުގެ ދިފާޢީ ވުޒާރާއިންނެވެ. މީގެ ކުރިން ވެސް, އެ ދެ ޤައުމުން ގުޅިގެން ވަނީ ސޫރިޔާގެ އިރުއުތުރު ސަރަޙައްދީ ރޮނގުގައި ފޯރިމެރުމުގެ ޙަރަކާތްތަކެއް ހިންގާފައެވެ. ނަމަވެސް, އެ ޙަރަކާތްތައް މެދުކަނޑައިލާފައި ވަނީ ސަލާމަތީ ސަބަބުތަކާ ގުޅިގެންނެވެ.
ތުރުކީވިލާތުގެ ދިފާޢީ ވުޒާރާއިން ބުނީ އޮޕަރޭޝަން ޕީސް ސްޕްރިންގގެ ނަމުގައި ހިންގާ އޮޕަރޭޝަން އަލުން ފެށުމާ އެކު, އެ ޤައުމާއި ރަޝިޔާގެ އަސްކަރީ އުޅަނދުފަހަރާއި ސިފައިން 24 ގަޑިއިރު އެ ސަރަޙައްދުގައި ފޯރިމަރަމުންދާނެ ކަމުގައެވެ. ހުސްވި އަހަރުގެ އޮކްޓޫބަރު މަހު ފޯރިމެރުމުގެ ޙަރަކާތްތައް މެދުކަނޑައިލަން ޖެހުނު އަސްލު ސަބަބު ހާމަކޮށްފައެއް ނެތެވެ. ނަމަވެސް, އެ ޙަރަކާތްތައް މެދުކަނޑައިލުމުގެ ކުރިން އެ ސަރަޙައްދުގައި 344 ފަހަރު ތުރުކީވިލާތާއި ރަޝިޔާގެ ގުޅިފައިވާ ލަޝްކަރަކުން ޕެޓްރޯލް ކޮށްފައިވާ ކަމުގައި ތުރުކީވިލާތުން ހާމަކުރިއެވެ.
2019ވަނަ އަހަރު ތުރުކީވިލާތުން ސޫރިޔާގެ ސަރުކާރާ ދެކޮޅަށް ހަތިޔާރު އުފުލާފައިވާ ޖަމާޢަތްތަކާ ގުޅިގެން އޮޕަރޭޝަން ޕީސް ސްޕްރިންގގެ ނަމުގައި އަސްކަރީ ޙަރަކާތެއް ފަށާފައި ވަނީ, އެ ސަރަޙައްދުގައި ހަރަކާތްތެރިވަމުންދިޔަ ކުރުދީންގެ ހަތިޔާރު އެޅި ޖަމާޢަތްތަކާ ދެކޮޅަށެވެ. އެ ޙަރަކާތުގެ ބޭނުމަކީ ކުރުދީން ހިމެނޭ ހަތިޔާރު އެޅި ޖަމާޢަތް, ސީރިޔަން ޑިމޮކްރެޓިކް ފޯސަސް (އެސްޑީއެފް)ގެ ހަނގުރާމަވެރިން ފަހަތަށް ޖެއްސުމެވެ.
ރަޝިޔާއިން ވެސް ވަނީ އެ އަހަރު ތުރުކީވިލާތުގެ އަސްކަރީ ޙަރަކާތެއްގައި ބައިވެރިވެފައެވެ. ދެ ޤައުމުގެ ދެމެދުގައި އެ ކަމަށް އެއްބަސްވެފައި ވަނީ ތުރުކީވިލާތުގެ ރައީސް ރަޖަބް ޠައްޔިބް އުރްދުޣާނާއި ރަޝިޔާގެ ރައީސް ވްލަޑިމިޔަރ ޕުޓިންއާ ދެމެދު ބޭއްވި މަޝްވަރާތަކަށް ފަހުއެވެ. އެ ޙަރަކާތުގެ މައިގަނޑު އަމާޒަކީ ސޫރިޔާގެ އިރުއުތުރުގައިވާ ސަރަޙައްދުތަކުގައި ސުލްޙައާއި ހަމަޖެހުން ގާއިމު ކުރުން ކަމުގައި ތުރުކީވިލާތުން ބުންޏެވެ. އަދި, ނިރުބަވެރި ޖަމާޢަތްތައް ހުއްޓުވުން ވެސް އެ ޙަރަކާތުގެ އަމާޒުތަކުގެ ތެރޭގައި ހިމެނެއެވެ.
ސޫރިޔާގެ އިތުރުން ޢިރާޤުގައި ޙަރަކާތްތެރިވާ ކުރުދީ ހަނގުރާމަވެރިންނާ ދެކޮޅަށް ވެސް ތުރުކީވިލާތުން ދަނީ އަސްކަރީ ޙަރަކާތެއް ހިންގަމުންނެވެ. އެ ޙަރަކާތުގެ ދަށުން ތުރުކީވިލާތުގެ ވައިގެ ސިފައިން ވަނީ ޢިރާޤުގެ އުތުރުގެ ސަރަޙައްދުތަކަށް ވަރުގަދަ ވައިގެ ޙަމަލާތަކެއް ދީފައެވެ. ނިރުބަވެރިކަމާ ދެކޮޅަށް މަސައްކަތް ކުރާ ޢިރާޤުގެ އިދާރާއިން ބުނީ, ތުރުކީވިލާތުގެ ޑްރޯން ޙަމަލާތަކުގައި ހަނގުރާމަވެރިންގެ ތިން މީހުން މަރައިލާފައިވާ ކަމުގައެވެ.
ޢިރާޤުން ބުނީ, ތުރުކީވިލާތުގެ ޑްރޯން ޙަމަލާތައް އަމާޒު ކޮށްފައި ވަނީ ކުރްދިސްތާން ވަރކަރސް ޕާޓީ (ޕީކޭކޭ)ގެ ހަނގުރާމަވެރިންތަކެއް ދަތުރު ކުރަމުން ދިޔަ އުޅަނދަކަށް ކަމުގައެވެ. އެ ޙަމަލާ ދީފައި ވަނީ ޢިރާޤުގެ އުތުރުގައި އޮންނަ އަލް-ސުލައިމާނިއްޔާގައެވެ.
އެ ޙަމަލާގައި ޕީކޭކޭގެ އިސް އޮފިޝަލަކާއި އޭނާގެ ހަށިފާރަވެރިޔާ މަރައިލާފައިވާ ކަމުގައި ޢިރާޤުގެ ކައުންޓަރ-ޓެރެރިޒަމް އިދާރާއިން ހާމަކުރިއެވެ. ނަމަވެސް, ވަކިވެގަނެފައިވާ ކުރުދީން ޢިރާޤުގައި ދިރިއުޅޭ ސަރަޙައްދު, ޢިރާޤީ ކުރުދިސްތާނުގެ ބޮޑުވަޒީރުގެ ނައިބު ޤުއްބާދު ޠާލިބާނީ ވަނީ އެ ކަން ދޮގު ކޮށްފައެވެ. އޭނާ ބުނީ, ޑްރޯން ޙަމަލާގައި މަރުވެފައި ވަނީ ދެ ނޫސްވެރިން ކަމުގައެވެ.
ޕީކޭކޭއަކީ, ތުރުކީވިލާތުގެ އިތުރުން އެމެރިކާއާއި ވިލާތުގެ އިއްތިހާދުން ނިރުބަވެރި ޖަމާޢަތެއްގެ ގޮތުގައި ކަނޑައަޅާފައިވާ ޖަމާޢަތެކެވެ. އެ ޖަމާޢަތުން ތުރުކީވިލާތުގެ ސަރުކާރާ ދެކޮޅަށް ހަތިޔާރު އުފުލާފައި ވަނީ 1984ވަނަ އަހަރުއެވެ. އަދި, އޭގެ ފަހުން އެ ޖަމާޢަތުން ދަނީ ތުރުކީވިލާތުގެ ސަރުކާރާއި އަސްކަރިއްޔާގެ އިތުރުން ޢާންމު ރައްޔިތުންނަށް އަމާޒުކޮށް ނިރުބަވެރި ޙަމަލާތައް ދެމުންނެވެ. އެ ޖަމާޢަތުގެ އަމާޒަކީ ތުރުކީވިލާތުގެ އިރުދެކުނުގެ ސަރަޙައްދުތަކުގައި ކުރުދީންގެ މިނިވަން ދަޢުލަތެއް ގާއިމު ކުރުމެވެ. ޕީކޭކޭއާއި ތުުރުކީވިލާތުގެ އަސްކަރިއްޔާއާ ދެމެދު ބަދަލު ކުރަމުންދާ ޙަމަލާތަކުގައި މަރުވެފައިވާ މީހުންގެ ޢަދަދު 40,000އަށް އަރައެވެ.