ފަލަސްޠީނުގެ ޣައްޒާގެ މުސްލިމުން ޝަހީދުކޮށް ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާން ހުއްޓުވުމާ ގުޅޭ ގޮތުން މިޞްރުގެ ވެރިރަށް ޤާހިރާގައި ފަށާފައިވާ މަޝްވަރާ ބައްދަލުވުންތަކުގައި ބައިވެރިވާން ޣައްޒާގައި ވެރިކަން ކުރާ ޙަމާސް ޖަމާޢަތުން ވަފުދެއް ފޮނުވައިފިއެވެ. މިޞްރާއި ޤަޠަރު ގުޅިގެން ވިލަރެސް ކުރާ މަޝްވަރާތަކުގައި ބައިވެރިވެ ވަޑައިގަންނަވަން ޙަމާސުން ފޮނުވާފައިވާ ވަފުދުގައި އިސްކޮށް ހުންނެވީ އެ ޖަމާޢަތުގެ އިސްވެރިއެއް ކަމުގައިވާ ޚަލީލް އަލް-ޙައްޔާއެވެ.
ޤާހިރާގައި އޮގަސްޓު 22ގައި ފެށި މަޝްވަރާތަކުގައި މިޞްރާއި ޤަޠަރާއި އެމެރިކާގެ އިތުރުން ޔަހޫދީންގެ ނެގޯޝިއޭޓަރުން ދަނީ ބައިވެރިވަމުންނެވެ. ޙަމާސުން ބުނީ, ޖުލައި 2ވަނަ ދުވަހު އެ ޖަމާޢަތުން އެއްބަސްވެފައިވާ ކަންކަމުގެ މައްޗަށް ބިނާކޮށް ޔަހޫދީންނާ އެކު އެއްބަސްވުމެއް އެކުލަވައިލަން މިހާރު ވެސް ތައްޔާރަށް އޮތް ކަމުގައެވެ. ޙަމާސްގެ އިސް އޮފިޝަލެއް ކަމުގައިވާ ޢިއްޒަތު އަލް-ރަޝަޤު ވިދާޅުވީ, އެއީ މޭ 31ވަނަ ދުވަހު އެމެރިކާގެ ރައީސް ޖޯ ބައިޑަން ހުށަހަޅުއްވާފައިވާ ސުލްޙައިގެ މަގުޗާޓަށް ބިނާ ކޮށްފައިވާ އެއްބަސްވުމެއް ކަމުގައެވެ.
ޖުލައި މަހު ކުރި މަޝްވަރާތަކުގައި ޙަމާސުން ވަނީ އެ ޖަމާޢަތުން ރަހީނު ކޮށްފައިވާ އަސީރުން, ވަކި މަރުޙަލާތަކަކަށް ބަހައިލައިގެން މިނިވަން ކުރަން އެއްބަސްވެފައެވެ. ޙަމާސްގެ އިސް އޮފިޝަލެއް ކަމުގައިވާ މަޙްމޫދު މަރްދާވީ ވިދާޅުވީ, ޤާހިރާއަށް ވަފުދެއް ފޮނުވި ނަމަވެސް, އެ ޖަމާޢަތުން މަޝްވަރާތަކުގައި ސީދާ ބައިވެރިވާނެ ކަމަށް ނުބެލެވޭ ކަމުގައެވެ.
ހުސްވި ހަފުތާގައި ޤަޠަރުގެ ވެރިރަށް ދަވްޙާގައި ބޭއްވި ބައްދަލުވުންތަކަށް އެމެރިކާއިން ވަނީ އައު ހުށަހެޅުންތަކެއް ހުށަހަޅާފައެވެ. އަދި, އެމެރިކާގެ ޚާރިޖީ ވަޒީރު އެންތަނީ ބްލިންކަން ދާދި ފަހުން މެދުއިރުމައްޗަށް ކުރެއްވި ދަތުރުފުޅެއްގައި, ޒަޔަނިސްޓު އިސްރާއީލަށް ވަޑައިގަންނަވައި, އެ ހުށަހެޅުންތަކަށް ޔަހޫދީންގެ ރުހުން ހޯއްދެވިއެވެ. އެއިރު ޙަމާސުން ބުނީ, އެމެރިކާގެ އައު ހުށަހެޅުންތައް ބިނާ ކޮށްފައި ވަނީ ޔަހޫދީންގެ ނިރުބަވެރި ބޮޑުވަޒީރު ބެންޖަމިން ނަތަންޔާހޫ ބޭނުންވާ ކަންކަން ހިމަނައިގެން ކަމުގައެވެ. ނަމަވެސް, ހުށަހެޅުންތަކަށް ދެކޮޅު ހަދާފައެއް ނެތެވެ.
އެމެރިކާއިން ބުނީ, އައު ހުށަހެޅުތައް ބިނާ ކޮށްފައި ވަނީ ކުރިން ވެސް މުޖާހިދުންނާއި ޔަހޫދީންނާ ދެމެދު އެއްބަސްވެފައިވާ ކަންކަމަށް ބިނާކޮށް ކަމުގައެވެ. އަދި, އައު ހުށަހެޅުންތަކުގެ ބޭނުމަކީ, މުޖާހިދުންނާއި ޔަހޫދީންނާ ދެމެދު މި ވަގުތު ޚިޔާލު ތަފާތުވުން އުފެދިފައިވާ މައްސަލަތަކަށް ހައްލުތަކެއް ހޯދަން މަގު ކޮށައިދިނުން ކަމުގައެވެ.
މި ވަގުތު ދެ ފަރާތުގެ ދެމެދުގައި އެންމެ ބޮޑަށް ދެބަސްވުން އުފެދިފައިވާ މައްސަލަތަކުގެ ތެރޭގައި ޣައްޒާއާއި މިޞްރު ގުޅޭ ސަރަޙައްދީ ރޮނގު, ފިލަޑެލްފިޔާ ކޮރިޑޯއާ މެދު އަމަލު ކުރާނެ ގޮތެއް ހިމެނެއެވެ. ޔަހޫދީން ބޭނުން ވަނީ, މިހާރު ވެސް އެ މީހުން އަތްގަދަ ކޮށްފައިވާ ސަރަޙައްދީ ރޮނގުގެ ބާރުތައް ޢުދުވާން ހުއްޓައިލުމަށް ފަހު ވެސް ދެމެހެއްޓުމަށެވެ. ނަމަވެސް, ޙަމާސުން ދަނީ އެ ކަމާ ދެކޮޅު ހަދަމުންނެވެ.
މީގެ އިތުރުން, އަސީރުން ބަދަލު ކުރުމުގައި ދެ ފަރާތުގެ މެދުގައި ވަނީ ދެބަސްވުންތައް އުފެދިފައެވެ. ޙަމާސުން ބުނީ, ޖުލައި 2ގައި އެއްބަސްވެފައިވާ ތާވަލާ އެއްގޮތަށް އަސީރުން މިނިވަން ކުރަން އެ ޖަމާޢަތުން ތައްޔާރަށް އޮތް ކަމުގައެވެ. ނަމަވެސް, ހައްދުފަހަނަ އެޅި ނަތަންޔާހޫ ބޭނުން ވަނީ, މިހާރު އެއްބަސްވުމުގައިވާ ޢަދަދުތަކަށް އުނިއިތުރު ގެންނާށެވެ. އަދި, ޢުދުވާން ހުއްޓައިލުމަށް ފަހު, ޣައްޒާގެ ރައްޔިތުންނަށް އެ ސަހަރުގެ ތެރޭގައި ދަތުރު ކުރުމަށް ހުރަސް އަޅަން ވެސް ޔަހޫދީން ދަނީ މަސައްކަތް ކުރަމުންނެވެ.
ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 40,334އަށް އުފުލިފައެވެ. އޭގެ ތެރޭގައި 16،000އަށްވުރެ ގިނަ ޢަދަދަކަށް މައުސޫމު ކުޑަކުދިން ހިމެނެއެވެ. އަދި، ޔަހޫދީ ފައުޖުން ސުންނާފަތި ކޮށްލާފައިވާ އިމާރާތްތަކުގެ ދަށުގައި އިތުރު 10،000އަށްވުރެ ގިނަ މީހުންގެ ހަށިތައް ތާށިވެފައިވާ ކަމުގައި ޣައްޒާގެ އޮފިޝަލުން ގަބޫލު ކުރެއެވެ. ޔަހޫދީންގެ ރަޙުމު ކުޑަ ޙަމަލާތަކުގައި ޒަޚަމު ކޮށްލާފައިވާ މީހުންގެ ޢަދަދު ވަނީ 93,356އަށް އުފުލިފައެވެ.