ފަތުރުވެރިކަމުގެ މަޝްހޫރި މަންޒިލެއްކަމަށްވާ ތައިލޭންޑްގެ ފުކެޓްގައި ހިނގި ބިންގަނޑު ކަނޑައިގެން ދިއުމުގެ ޙާދިޘާއެއްގައި 13 މީހުން މަރުވެއްޖެއެވެ. ފުކެޓަށް ކުރި ބޯ ވިއްސާރައިގެ ސަބަބުން ކުރިމަތިވި އެ ޙާދިޘާގައި މީހުން ސަލާމަތްކުރުމަށް ކުރި މަސައްކަތްތައް ހުއްޓާލާފައި ވަނީ އާދިއްތަ ދުވަހުއެވެ.
ފުކެޓްގެ ގަވަރުނަރު ސޮފޮން ސުވައްނަރަތު ވިދާޅުވި ގޮތުގައި ބިންގަނޑު ކަނޑައިގެން ގޮސްފައި ވަނީ ފުކެޓްގެ މަޝްހޫރު ސަރަޙައްދެއް ކައިރިންނެވެ. އެ ޙާދިޘާގައި މަރުވި 13 މީހުންގެ ތެރޭގައި ރަޝިއާގެ ދެ މަފިރިންނާއި ތައިލޭންޑްގެ ދެ މީހުން ހިމެނޭކަމަށް ގަވަރުނަރު ވިދާޅުވިއެވެ. އަދި ބާކީ ނުވަ މީހުންނަކީ އެ ޤައުމުގައި މަސައްކަތްކުރަމުން ދިޔަ މިޔަންމާ ބައެއް ކަމަށް ފުކެޓްގެ ގަވަރުނަރު ވިދާޅުވިއެވެ.
އެ ޙާދިޘާގައި 20 މީހުންނަށް ވަނީ އެކިވަރުގެ އަނިޔާތައް ލިބިފައެވެ. އަދި 209 ގޭބީސީއަކަށް ވަނީ ގެއްލުންވެފައެވެ. އެ ޙާދިސާގައި ލިބުނު ގެއްލުންތައް ސާފުރުކުރުމުގެ މަސައްކަތް ފުކެޓްގެ ކަމާ ގުޅުންހުރި އިދާރާތަކުން މިހާރު ވަނީ ފަށާފައެވެ. އަދި މަރުވި މީހުންގެ ޢާއިލާތަކަށް އެ ކަން އަންގަމުންދާ ކަމަށް ފުކެޓްގެ ގަވަރުނަރު މަޢުލޫމާތު ދެއްވިއެވެ.