ބަންގްލަދޭޝްގެ ސިޔާސީ ޕާޓީއެއް ކަމުގައިވާ ޖަމާޢަތު އަލް-އިސްލާމީ ޕާޓީ އުވައިލަން ކުރީގެ ބޮޑުވަޒީރު ޝައިޚް ޙަސީނާގެ ސަރުކާރުން ނިންމާފައިވާ ނިންމުން ބާޠިލު ކޮށްފިއެވެ. ޙަސީނާގެ ސަރުކާރުން ޖަމާޢަތު އަލް-އިސްލާމީއާއި އެ ޕާޓީއާއި ގުޅުން އޮތް ގުރޫޕުތައް އުވައިލަން ނިންމާފައި ވަނީ ނިރުބަވެރި ކަމަށް ހިތްވަރު ދިނުމާއި, ނިރުބަވެރި ޖަމާޢަތްތަކަށް ވާގިވެރިވުމުގެ ތުހުމަތުގައެވެ.
ޙަސީނާގެ ސަރުކާރުން ބުނީ, އޭނާގެ ސަރުކާރާ ދެކޮޅަށް ޖުލައި މަހުން ފެށިގެން ކުރަމުން ދިޔަ މުޒާހަރާތަކުގެ ތެރެއިން ހަމަނުޖެހުން ހިންގަން ޖަމާޢަތު އަލް-އިސްލާމީން މަސައްކަތް ކޮށްފައިވާ ކަމުގައެވެ. އެ ޕާޓީ އުވައިލާފައި ވަނީ ނިރުބަވެރިކަމާ ދެކޮޅު ޤާނޫނުގެ ދަށުންނެވެ. ނަމަވެސް ޙަސީނާގެ ވެރިކަން ވެއްޓުމާ ގުޅިގެން ބަންގްލަދޭޝްގައި އެކުލަވައިލާފައިވާ ވަގުތީ ސަރުކާރުން ބުނީ, ޖަމާޢަތު އަލް-އިސްލާމީއާއި, އެ ޕާޓީއާއި ގުޅިފައިވާ ގުރޫޕުތަކާއި ނިރުބަވެރި ޖަމާޢަތްތަކާ އެއްވެސް ގުޅުމެއް އޮތް ކަން ސާބިތު ކުރެވޭނެ ހެއްކެއް ފެންނަން ނެތް ކަމުގައެވެ.
ނިރުބަވެރި ޖަމާޢަތްތަކާ ގުޅުން އޮތް ކަމަށް ޙަސީނާގެ ސަރުކާރުން ކޮށްފައިވާ ތުހުމަތުތައް ޖަމާޢަތު އަލް-އިސްލާމީ ޕާޓީން ވެސް ދޮގު ކުރެއެވެ. އަދި, ޙަސީނާގެ ސަރުކާރާ ދެކޮޅަށް ހަމަނުޖެހުން ހިންގަން މުޒާހަރާތަކުގެ ބައިވެރިންނަށް ހިތްވަރު ދީފައި ނުވާނެ ކަމުގައި ވެސް އެ ޕާޓީން ބުންޏެވެ. އަދި, އެ ޕާޓީ އުވައިލުމަކީ ޣައިރު ދުސްތޫރީ ޢަމަލެއް ކަމަށް ވެސް އެ ޕާޓީން ސިފަ ކުރެއެވެ.
ބަންގްލަދޭޝްގެ ކޮލެޖުތަކާއި ޔުނިވަރސިޓީތަކުގައި މަތީ ތަޢުލީމު ހާސިލު ކުރަމުންދާ ދަރިވަރުން ޙަސީނާގެ ސަރުކާރާ ދެކޮޅަށް ބޮޑެތި ސިލްސިލާ މުޒާހަރާއެއް ފަށާފައި ވަނީ ޖުލައި މަހުގެ މެދު ތެރޭގައެވެ. މުޒާހަރާތައް ރޫޅައިލަން ޙަސީނާގެ ސަރުކާރުން ވަނީ ފުލުހުން ލައްވައި ބާރުގެ ބޭނުން ކުރުވާފައެވެ. ފުލުހުންނާއި މުޒާހަރާގެ ބައިވެރިންނާ ދެމެދު ހިނގި ކުރިމަތިލުންތަކުގައި 300އެއްހާ މީހުން މަރުވެ, އެތަކެއް ހާސް ބަޔަކު ޒަޚަމުވިއެވެ. މުޒާހަރާތަކުގެ ޕްރެޝަރާ ގުޅިގެން އިސްތިޢުފާ ދެއްވުމަށް ޙަސީނާ ޤައުމު ދޫކޮށް އިންޑިޔާއަށް ވަޑައިގަންނަވާފައި ވަނީ އޮގަސްޓު 5ވަނަ ދުވަހުއެވެ.