ދަނޑުވެރިކަމުގެ އާމްދަނީ އިތުރުކުރުމަށް ޤައުމީ ލެބޯޓަރީ މުހިންމު ދައުރެއް އަދާކުރާނެ: ވަޒީރު ޑރ.ރަމީލާ
-
ލެބޯޓަރީގެ މަސައްކަތް ހަވާލުކޮށްފައިވަނީ 1 އަހަރު ތެރޭ ނިންމާގޮތަށް
-
މިލެބޯޓަރީ ތަރައްޤީކުރަނީ 4 ދާއިރާއަކަށް
-
އެއީ، ސޮއިލް ޓެސްޓިން އާއި، ޓީޝޫކަލްޗަރ އާއި ޕްލާންޓް ޕެތޮލަޖީގެ އިތުރުން، އެންޓަމޮލަޖީ
ފުވައްމުލައް ސިޓީގައި ޤާއިމުކުރާ ދަނޑުވެރިކަމުގެ ޤައުމީ ލެބޯޓަރީއަކީ އެ ސިނާޢަތުން ލިބޭ އާމްދަނީ އިތުރުކުރުމުގައި މުހިންމު ދައުރެއް އަދާކުރާނެ ތަނަކަށް ވެގެންދާނެކަމަށް ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. ޢާއިޝަތު ރަމީލާ ވިދާޅުވެއްޖެއެވެ.
ވަޒީރު މިހެން ވިދާޅުވީ، ފުވައްމުލައް ސިޓީގައި ޤާއިމުކުރާ ދަނޑުވެރިކަމުގެ ޤައުމީ ލެބޯޓަރީގެ މަސައްކަތް ބަޔަކާ ޙަވާލުކުރުމުގެ އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައެވެ.
ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. ޢާއިޝަތު ރަމީލާ ވިދާޅުވީ، ދަނޑުވެރިކަމުގެ ލެބޯޓަރީއެއްގެ މުހިންމުކަން ފާހަގަކުރެވެނީ ދަނޑުވެރިންގެ ދަނޑުތަކަށް ބަލިޖެހޭ ހާލަތްތަކުގައި ނުވަތަ ދަނޑުވެރިންގެ މަސައްކަތުން އެކަށީގެންވާ ނަތީޖާ ނުނެރެވޭ ދަނޑިވަޅުތަކުގައި ކަމަށެވެ.
ވަޒީރު ފާހަގަކުރެއްވި ގޮތުގައި ގަސްތަކަށް އެކި ބާވަތުގެ ބަލިޖެހި ހަލާކުވަމުންދާ ކޮންމެ ފަހަރަކު، ޤައުމުގައި މިފަދަ ލެބޯޓަރީއެއް ޤާއިމުވެފައި ނެތުމުގެ ސަބަބުން ކުރިމަތިވާ ގޮންޖެހުންތައް އިޙްސާސްކުރެވޭކަމަށެވެ.
ވަޒީރު ވިދާޅުވީ، މިފަދަ ލެބޯޓަރީއެއް ޤާއިމުވުމަކީ ދަނޑުވެރިކަމުގެ ދާއިރާގައި މަސައްކަތްކުރާ ފަރާތްތަކަށް އެކަށީގެންވާ ނަފާ ލިބުމަށް މަގުފަހިކޮށްދޭނެ ކަމެއްކަމަށެވެ.
މީގެ އިތުރުން، ރުއްގަހަށް ޖެހޭ ބަލިތައް ދިރާސާކުރުމަށް މިހާރު ރާއްޖޭގައި އެކަށީގެންވާ ވަސީލަތްތައް ނެތުމުގެ ސަބަބުން، މިފަދަ ދިރާސާތައް ކުރުމަށް ބޭރު ޤައުމުތަކަށް ފޮނުވަން ޖެހި، ގިނަ ޚަރަދުތަކެއް ކުރަންޖެހޭ ކަމަށް ވަޒީރު ފާހަގަކުރެއްވިއެވެ.
"މިފަދަ ލެބޯޓަރީއެއް ޤާއިމްވެގެން އައުމަކީ އަސްލު ދަނޑުވެރިކަން ކުރާ ފަރާތްތަކަށް އެ ފަރާތްތަކުން ކުރާ މަސައްކަތުގެ ފުރިހަމަ މަންފާ ލިބުމަށް އެހީތެރިވާނެކަމެއް. ރާއްޖެއިން ބޭރަށް ފޮނުވައިގެން މިގޮތަށް ޓެސްޓުތައް ހެދުމަށް ދިމާވުމަކީ ދަނޑުވެރިން ކުރާ މަސައްކަތަށް ވަރަށް ބޮޑު ގޮންޖެހުންތަކެއް ކުރިމަތި ވެގެން ދާކަމެއް." ވަޒީރު ވިދާޅުވިއެވެ.
ދަނޑުވެރިކަމާއި ދިރޭތަކެއްޗާއި ބެހޭ ވަޒީރު ޑރ. އާއިޝަތު ރަމީލާ ވިދާޅުވީ، މި ސަރުކާރުން މަސައްކަތްކުރަނީ ދަނޑުވެރިކަމަކީ ޤައުމުގެ އިޤްތިޞާދަށް ފައިދާހުރި އަދި ދެމެހެއްޓެނިވި ދާއިރާއެއްގެ ގޮތުގައި ކުރިއެރުވުމަށް ކަމަށެވެ. އަދި ދަނޑުވެރިންނަކީ ޤައުމުގެ އިޤްތިޞާދީ ތަރައްޤީގައި އިސް ދައުރެއް އަދާކުރާ ބައެއްގެ ގޮތުގައި ހެދުމަށް މަސައްކަތް ކުރަމުންދާ ކަމުގައިވެސް ވަޒީރު ފާހަގަކުރެއްވިއެވެ.
ވަޒީރު ޑރ. ރަމީލާ ވިދާޅުވީ، ދަނޑުވެރިކަމަކީ އެހެނިހެން ވަޒީފާތަކެކޭ އެއްފަދައިން އާމްދަނީ ހޯދުމަށް ކުރެވޭ މަސައްކަތެއްގެ ގޮތުގައި ކަނޑައެޅުމަށް ސަރުކާރުން ކުރަމުންދާ މަސައްކަތުގައި، ޤައުމީ ލެބޯޓަރީއަކީ މުހިންމު ދައުރެއް އަދާކުރާނެ ތަނަކަށް ވެގެންދާނެކަމަށެވެ. މި ލެބޯޓަރީގެ ސަބަބުން ދަނޑުވެރިކަމުގެ ދާއިރާއަށް ފާހަގަކުރެވޭ ކުރިއެރުންތަކެއް ލިބިގެންދާނެކަން ވަޒީރު ފާހަގަކުރެއްވިއެވެ.
ފުވައްމުލައް ސިޓީގައި ޤާއިމްކުރާ ދަނޑުވެރިކަމުގެ ޤައުމީ ލެބޯޓަރީގެ މަސައްކަތް ހަވާލުކޮށްފައިވަނީ ވެންޒާރ ކޮމްޕެނީ ޕްރައިވެޓް ލިމިޓެޑާއެވެ. މިއީ ދަނޑުވެރިކަމުގެ 4 ދާއިރާއަކަށް އަމާޒުކޮށްގެން ތަރައްޤީކުރާ ތަނެކެވެ. އެއީ، ސޮއިލް ޓެސްޓިންއާއި، ޓީޝޫކަލްޗަރއާއި ޕްލާންޓް ޕެތޮލަޖީގެ އިތުރުން، އެންޓަމޮލަޖީއެވެ.
ދަނޑުވެރިކަމުގެ ޤައުމީ ލެބޯޓަރީ ޢިމާރާތް އެޅުމަށް 11 މިލިޔަން ރުފިޔާ ސަރުކާރުން ޚަރަދު ކުރާއިރު، މި ލެބޯޓްރީއަށް ބޭނުންވާ އިކުއިޕްމަންޓްތައް މިހާރުވަނީ ގަނެ ފުވައްމުލަކަށް ސަޕްލައި ކޮށް ނިންމާފައެވެ. އަދި ލެބޯޓްރީއަށް ބޭނުންވާ މުވައްޒަފުން އައްޔަންކޮށް ތަމްރީން ކުރުމަށް ވާންޖެހޭ އެންމެހާ ތައްޔާރީތައްވެސް ވަނީ ވެވިފައެވެ. އަދި ލެބޯޓްރީއަށް ބޭނުންވާ އާލާތްތައް ހޯދާފައިވަނީ ޖަޕާން ސަރުކާރުގެ ހިލޭއެހީގައި ޔޫއެންޑީޕީން ކުރިއަށް ގެންދާ ޕްރޮޖެކްޓް ފޮރ ޑިވެލޮޕިންގ ސަސްޓެއިނަބަލް އިކޮނޮމީއިންނެވެ. މި ފެސިލިޓީގައި ހިމެނޭ އެހެން ލެބޯޓްރީތަކަށް ބޭނުންވާ އާލާތްތައް ހޯދާފައިވަނީ އިންޓަނޭޝަނަލް ފަންޑް ފޮރ އެގްރިކަލްޗަރ ޑިވެލޮޕްމަންޓްގެ އެހީގައި ކުރިއަށް ގެންދާ މޯލްޑިވްސް އެގްރި ބިޒްނަސް ޕްރޮގްރާމްއިންކަމަށް ދަނޑުވެރިކަމާބެހޭ ވުޒާރައިން ވިދާޅުވިއެވެ.