އެފްއޭއެމްގެ ރައީސްގެ މަޤާމަށް އިންތިޚާބުވުމާއި ގުޅިގެން އީގަލްސްގެ ވައިސް ޗެއަރމަންކަންކަމުން އަހުމަދު ތާރިޤް އިސްތިއުފާ ދެއްވައިފިއެވެ. މިއަދު އޮތް އެފްއޭއެމްގެ އެކްސްޓްރާ އޯޑިނަރީ ކޮންގްރެސްގައި ނެގި ފެންނަ ނުފެންނަ ވޯޓް ކާމިޔާބުކުރައްވައި، ޤައުމީ ޓީމާއި ނިއުރޭޑިއަންޓްގެ ކުރީގެ ފޯވާޑް އިންތިޚާބުވީ ނަވާރަ ވޯޓް ހޯއްދަވައިގެންނެވެ. ނުފެންނަ ދެފަރާތަކުން ވޯޓްދެއްވިއެވެ. އެފްއޭއެމްގެ އިންތިހާބީ ކޮންގްރެސްގައި ވޯޓް ދިނުމުގެ ހައްގު 24 ފަރާތަކަށް ލިބިފައިވެއެވެ.
ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރާއި އޭނާގެ ޓީމް ފިޔަވައި މަޤާމްތަކަށް ކުރިމަތިލައްވާފައެއްނުވެއެވެ. އެފްއޭއެމްގެ ނައިބް ރައީސްކަމަށް އިންތިޚާބުވީ ގައުމީ ޓީމާއި ނިއުރޭޑިއަންޓްގެ ކުރީގެ ކެޕްޓަން މުހައްމަދު ކަލީމާއި، ގައުމީ ޓީމާއި ވެލެންސިޔާއާއި ނިއުރޭޑިއަންޓްގެ އިތުރުން ވީބީގެ ކުރީގެ ފޯވާޑް އަލީ އުމަރެވެ.
އެފްއޭއެމްގެ އެކްޒެކެޓިވް ކޮމެޓީއަށް އިންތިޚާބުވި އެހެން މެމްބަރުންނަކީ ނޯމަލައިޒޭޝަން ކޮމިޓީގެ ވައިސް ޗެއަރމަން އަދި ޤައުމީ ޓީމްގެ ފިޒީޝަން އަހުމަދު ޝަކީބް، ގިނަ ކުޅިވަރުތަކަކުން ފާހަގަކުރެވޭ ނިއުގެ ބޯޑް މެމްބަރު އައިޝަތު ނާޒިމާ، ނިއުގެ ކުރީގެ ބޯޑް މެންބަރު އަހުމަދު ޒަރީރު، ޓީސީ ސްޕޯޓްސް ކުލަބްގެ މެނޭޖަރ އަހުމަދު އީސާ، ރައްޔިތުން މަޖިލިހުގެ ނައިފަރު ދާއިރާގެ މެމްބަރު އަދި ކްލަބް އީގަލްސްގެ ޗެއަރމަން އަހުމަދު ޝިޔާމްގެ އިތުރުން ޤައުމީ ޓީމަށް ރަން މެޑަލް ހޯދައިދިން ކެޕްޓަން އައްސަދު އަބްދުލްޣަނީއެވެ. އަހުމަދު ތާރިޤް ( ޓޮމް ) އީގަލްސްގެ ޗެއަރމަންކަމުން އިސްތިއުފާދެއްވި ނަމަވެސް އެކްސްކޯއަށް އިންތިޚާބުވި ކްލަބްތަކުގެ ބޯޑްތަކުގައި ހިމެނޭ އެހެން މެމްބަރުން އިސްތިއުފާއެއް ނުދެއްވައެވެ. އިސްތިއުފާ ދިނުން އަޞާޞީ ޤަވާއިދު ލާޒިމެއްވެސް ނުކުރެއެވެ.
ފީފާއިން ދީފައިވާ އެންމެ ފަހުގެ މުއްދަތާއެކު މިއަދު އެފްއެމްގެ އިންތިޚާބު ބޭއްވުމުން ރާއްޖެގެ އެފްއޭއެމް ވަނީ ސަސްޕެންޝަނުން ސަލާމަތްވެފައެވެ.