ހުޅުމާލެ ފޭސް 3 ހިއްކުން ހުއްޓުމެއް ނެތި ކުރިއަށްދޭ: އެޗްޑީސީ

ހުޅުމާލޭ ތިންވަނަ ފިޔަވަހި ހިއްކުމުގެ މަސައްކަތް ހުއްޓުމެއް ނެތި ކުރިއަށްދާކަމަށް ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީން ވިދާޅުވެއްޖެއެވެ.

ހުޅުމާލޭ ތިންވަނަ ފިޔަވަހި ހިއްކުމުގެ މަޝްރޫޢުއަކީ މާލެ ސަރަޙައްދުން ގޯތި ދޫކުރުމަށް ފެށި "ބިންވެރިޔާ" މަޝްރޫޢުގެ ދަށުން ހުޅުމާލެއިން ދޫކުރުމަށް ކަނޑައެޅި ގޯތިތައް ދިނުމަށް ހިއްކާ ސަރަޙައްދެކެވެ. އެ މަސައްކަތް ފެށީ މިދިޔަ އަހަރުގެ ސެޕްޓެމްބަރު މަހުގެ 22ވަނަ ދުވަހުއެވެ.

މި މަޝްރޫޢުގެ ދަށުން 3 ސަރަޙައްދަކަށް ބަހާލައިގެން ޖުމްލަ 63 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. މީގެތެރެއިން "ސައިޓް އޭ"ގައި ހިމެނޭ 10 ހެކްޓަރުގެ މަސައްކަތް ވަނީ ނިމިފައެވެ. އެކި ސަބަބުތަކާހުރެ މި މަޝްރޫޢުގެ މަސައްކަތް ދެފަހަރެއްގެ މަތިން މަޑުޖެހުނެވެ.

ހައުސިން ޑިވެލޮޕްމަންޓް ކޯޕަރޭޝަން، އެޗް.ޑީ.ސީން ޕީއެސްއެމް ނިއުސްއަށް މަޢުލޫމާތު ޙިއްސާކުރަމުން ވިދާޅުވީ، ބިން ހިއްކުމާއި ގުޅުންހުރި މަސައްކަތްތައް މިހާރު ހުއްޓުމެއް ނެތި ބާރަށް ކުރިއަށްދާކަމަށެވެ. މިދުވަސްވަރު ވެލި އެޅުމުގެ މަސައްކަތް ކުރިއަށް ނުދިޔަނަމަވެސް، ބާކީ ހިމެނޭ ސަރަޙައްދަށް ވެލިއެޅުމަށް ބައުންޑް ވޯލްއާއި އެއާއި ގުޅޭ އެހެނިހެން މަސައްކަތްތައް މިހާރުވެސް ކުރިއަށްދާކަމަށް އެޗްޑީސީން މަޢުލޫމަތުދެއްވައެވެ.

އެ މަސައްކަތް ނިމުނުހާ އަވަހަކަށް އޭރިއާ 2 ގެ ބާކީ ހިމެނޭ ސަރަޙައްދަށް ވެލި އަޅާނެކަމަށް އެ ކޯރޕަރޭޝަނުން ވިދާޅުވެއެވެ.

މިވަގުތު މަސައްކަތް ކުރިއަށްދާ "ސައިޓް ބީ"ގައި ޖުމްލަ 29 ހެކްޓަރުގެ ބިން ހިއްކާނެއެވެ. އޭގެއިން ބޮޑު ބައެއްގެ މަސައްކަތް މިހާރު ވަނީ ނިމިފައެވެ.

އެޗްޑީސީން ވިދާޅުވީ ބާކީ ހިމެނޭ ސަރަޙައްދަށް ވެލި އެޅުމުގެ މަސައްކަތް ވަރަށް އަވަހަށް ފަށާނެކަމަށެވެ. މި މަޝްރޫޢު، މަސައްކަތުގެ ޓައިމްލައިނާ އެއްގޮތަށް ކުރިއަށްދާކަމުގެ ޔަޤީންކަން އެޗް.ޑީ.ސީއިން ވަނީ ދެއްވާފައެވެ.

އެންމެ ފަހު ސަރަޙައްދު "ސައިޓް ސީ"ގައި ހިއްކަން ހަމަޖެހިފައިވަނީ 24 ހެކްޓަރުގެ ބިމެވެ. އެޗް.ޑީ.ސީން ކަނޑައަޅާފައިވާ ޓައިމްލައިނަށް ބަލާއިރު މިއަހަރުގެ ނިޔަލަށް ބިން ހިއްކުމުގެ މަޝްރޫޢު ނިންމުމަށް ވަނީ ކަނޑައަޅާފައެވެ.

3 ވަނަ ފިޔަވަހީގައި ބޯހިޔާވަހިކަމަށް ބިން ދޫކުރުމުގެ އިތުރުން ގިނަ ޚިދުމަތްތަކާއި ވަސީލަތްތައް ތަރައްޤީކުރުމަށް ހަމަޖެހިފައިވާކަމަށް އެޗް.ޑީ.ސީން ވިދާޅުވެއެވެ. އެގޮތުން މިފިޔަވަހިވެސް ތަރައްޤީކުރާނީ މަގުތަކާއި ބްރިޖްގެ އިތުރުން ޕާކްތަކާއި، ކުޅިވަރާއި މުނިފޫހިފިލުވުމުގެ ހަރަކާތްތަކަށްވެސް ގިނަ ފުރުޞަތުތައް ފަހިވާނެގޮތައްކަން އެކޯރޕަރޭޝަނުން ފާހަގަކުރައްވައެވެ.

ބޯހިޔާވަހިކަމުގެ ސިޔާސަތުގެ ދަށުން މާލެ ސަރަޙައްދުން ބަންޑާރަގޯތި ދޫކުރުމަށް ހިންގާ ބިންވެރިޔާ ސްކީމުން ގޯއްޗަށް ހުޅުވާލި ފުރުޞަތުގައި ޝަރުޠު ހަމަވި 19،639 މީހުންނަށް ގޯތި ލިބުނެވެ. އެއީ 9،001 ގޯއްޗެވެ. މީގެ ތެރެއިން 1،351 ގޯތި ދޫކުރަނީ ހުޅުމާލެއިންނެވެ.