ލުބްނާންގެ ދެކުނުގެ ސަރަޙައްދުތަކުގައި އެ ޤައުމުގެ މުޖާހިދުންގެ ޖަމާޢަތް, ޙިޒްބުاللهން ހިންގާ އަސްކަރީ ހަރަކާތްތަކަށް ނިމުމެއް ގެނައުމަށް ފިޔަވަޅުތަކެއް އަޅަން އެ ޤައުމުގެ ސަރުކާރުން ނިންމައިފިއެވެ. މި ކަން ހާމަކުރައްވަމުން ލުބްނާންގެ ވަގުތީ ބޮޑުވަޒީރު ނަޖީބު މީޤާތީ ވިދާޅުވީ, ލަޔިޠާނީ ކޯރުގެ ދެކުނުގެ ސަރަޙައްދުތަކުގައި ޙިޒްބުاللهން ހިންގަމުންދާ އަސްކަރީ ހަރަކާތްތައް ނިމުމަކަށް ގެނައުމާ ގުޅޭ ގޮތުން އދގެ ސަލާމަތީ މަޖިލީހުން 2006ވަނަ އަހަރު ފާސްކޮށްފައިވާ ޤަރާރު ތަންފީޒު ކުރަން ސަރުކާރުން ތައްޔާރަށް އޮތް ކަމުގައެވެ.
އޭނާ ވިދާޅުވީ, އދގެ ސަލާމަތީ މަޖިލީހުގެ 1701 ނަންބަރު ޤަރާރުގެ ދަށުން, ލަޔިޠާނީ ކޯރުގެ ދެކުނުން އޮތް ސަރަޙައްދުތަކުގައި އަމަން ބަލަހައްޓަން ލުބްނާންގެ އަސްކަރިއްޔާގެ ސިފައިން ފޮނުވަން ސަރުކާރުން ނިންމާފައިވާ ކަމުގައެވެ. އެއީ, ލުބްނާންގެ ދެކުނުގެ ސަރަޙައްދީ ރޮނގާ 30 ކިލޯމީޓަރު ދުރުގައި އޮތް ސަރަޙައްދެކެވެ. 1701 ނަންބަރު ޤަރާރު ފާސްކޮށްފައި ވަނީ, ޙިޒްބުاللهގެ މުޖާހިދުންނާއި ޔަހޫދީ ފައުޖާ ދެމެދު ކުރަމުން ދިޔަ ހަނގުރާމަ ހުއްޓުމަކަށް ގެނައުމަށެވެ.
"ލުބްނާންގައި އަޅުގަނޑުމެން މި ތިބީ [ސަލާމަތީ މަޖިލީހުގެ ޤަރާރު ނަންބަރު] 1701 ތަންފީޒު ކުރަން ތައްޔާރަށް, އަދި ޙަމަލާ ބަދަލު ކުރުން ހުއްޓައިލުމާ އެކު, ލުބްނާންގެ ދެކުނުގެ ސަރަޙައްދުތަކަށް, ލަޔިޠާނީ ކޯރުގެ ދެކުނަށް, އަސްކަރިއްޔާގެ ސިފައިން ފޮނުވައި, ޒިންމާތައް ހަވާލު ކުރަން ތައްޔާރަށް،" މީޤާތީ ވިދާޅުވިއެވެ.
ޙިޒްބުاللهގެ އަސްކަރީ ހަރަކާތްތައް ނިމުމަކަށް ގެންނަން ފިޔަވަޅުތަކެއް އަޅަން ލުބްނާންގެ ސަރުކާރުން ނިންމާފައި މި ވަނީ, ޔަހޫދީ ފައުޖުގެ ހައްދުފަހަނަ އެޅި ސިފައިން ސެޕްޓެންބަރު 23ވަނަ ދުވަހުން ފެށިގެން ލުބްނާންގެ ޢާންމުންނާ ދެކޮޅަށް ލާއިންސާނީ ޖަރީމާތަކެއް ހިންގަމުންދާ ދަނޑިވަޅެއްގައެވެ. އަދި, އަސްކަރީ ޓޭންކުފަހަރާ އެކު އެއްގަމު މަގުން ލުބްނާންގެ ދެކުނުގެ ރަށްތަކަށް އަރައިގަނެ, ޢުުދުވާންތައް ފުޅާ ކޮށްފައިވާ ވަގުތެއްގައެވެ.
ލުބްނާންގެ ޞިއްޙަތާ ބެހޭ ވުޒާރާއިން ބުނީ, ސެޕްޓެންބަރު 23ވަނަ ދުވަހުން ފެށިގެން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ ޢާންމުންގެ ޢަދަދު 1,030އަށް އުފުލިފައިވާ ކަމުގައެވެ. އޭގެ ތެރޭގައި ގިނަ ޢަދަދެއްގެ އަންހެނުންނާއި މައުސޫމު ކުޑަކުދިން ހިމެނެއެވެ. ފާއިތުވި 24 ވަރަކަށް ގަޑިއިރުގެ ތެރޭގައި ޝަހީދު ކޮށްލާފައިވާ މީހުންގެ ޢަދަދު 95އަށް އަރައެވެ. ޔަހޫދީ ފައުޖުގެ ޢުދުވާންތަކުގައި ޒަޚަމު ކޮށްލާފައިވާ މީހުންގެ ޢަދަދު 6,300އަށް އުފުލިފައިވާއިރު, ސުންނާފަތި ކޮށްލާފައިވާ އިމާރާތްތަކުގެ ދަށުން ޝަހީދު ކޮށްލާފައިވާ އިތުރު މީހުންގެ ހަށިތައް ދަނީ ފެންނަމުންނެވެ.
މީޤާތީ ވިދާޅުވީ, ފާއިތުވި ދެ އަހަރު ހުސްކޮށް އޮތް ލުބްނާންގެ ރައީސް ކަމުގެ މަޤާމަށް ބޭފުޅަކު އިންތިޚާބު ކުރުމާ ގުޅޭ ގޮތުން އެ ޤައުމުގެ ޤާނޫނު ހަދާ މަޖިލީހުގެ ރައީސް ނަބީހު ބައްރިއްޔާ އެކު ފުޅާ ދާއިރާއެއްގައި މަޝްވަރާ ކުރައްވާފައިވާނެ ކަމުގައެވެ. އަދި, ޙިޒްބުاللهއާއި ޔަހޫދީންނާ ދެމެދު ޙަމަލާތައް ބަދަލު ކުރުން ހުއްޓައިލުމުން, ރިޔާސީ އިންތިޚާބު ބޭއްވުމުގެ ތައްޔާރީތައް ކުރަން ފަށަށް ދެ ބޭފުޅުން އެއްބަސްވެ ވަޑައިގަންނަވާފައިވާ ކަމުގައެވެ. އަދި, އިންތިޚާބަށް ޤާނޫނު ހަދާ މަޖިލީހުން ހުރަސް ނާޅާނެ ކަމުގެ ޔަގީން ކަން ލިބިފައިވާ ކަމުގައި ވެސް މީޤާތީ ވިދާޅުވިއެވެ.
އދގެ ސަލާމަތީ މަޖިލީހުން 1701 ނަންބަރު ޤަރާރު ފާސް ކޮށްފައި ވަނީ 2006ވަނަ އަހަރު ޙިޒްބުاللهގެ މުޖާހިދުންނާއި ޔަހޫދީންނާ ދެމެދު ފެށި ހަނގުރާމައާ ގުޅިގެންނެވެ. އެ ޤަރާރުގެ ދަށުން ލުބްނާންގެ ދެކުނުގެ ސަރަޙައްދުތަކުގައި އަމަންއަމާން ކަމާއި ސުލްޙަ ބެލެހެއްޓުމުގެ ޒިންމާ މަތިކޮށްފައި ވަނީ ލުބްނާންގެ އަސްކަރިއްޔާގެ އިތުރުން އދގެ ސުލްޙަ ބަލަހައްޓާ ފައުޖަކަށެވެ.