ހަތަރު އަހަރު ކްލަބް ވޮލީގައި އެއް ޓީމަކަށް ކުޅުމަށްފަހު އަޝްފާޤް އާދަމްއާއި، އިސްމާއީލް ސާޖިދު ދެ ކްލަބަކަށް ކުޅެން ފަށައިފިއެވެ.
ރާއްޖޭގެ ވޮލީގައި މިހާތަނަށް އުފެދުނު އެންމެ މޮޅު ޕެއާރއަކީ އަޝްފާގް އާދަމްއާއި އިސްމާޢީލް ސާޖިދުގެ ޕެއާރއެވެ. އިންޑޯ މުބާރާތުގައި އެކުގައި ކުޅެމުން އަންނަތާ ހަތަރު އަހަރު އަދި ބީޗް ވޮލީގައި އެކުގައި ކުޅެމުން އަންނަތާ އަށް އަހަރު ވެފައިވާ މިދެކުޅުންތެރިން މިވަނީ ދެ ކްލަބަކަށް ކުޅެން ފަށާފައެެވެ. މިހާރު ކުރިއަށްދާ ވޮލީބޯޅަ އެސޯސިއޭޝަންކަޕްގައި ދެކުޅުންތެރިން ފެންނާނީ ދެ ކްލަބްގެ ޖަރޒީގައެވެ. ދެ ކުޅުންތެރިން މަސައްކަތްކުރާނީ ދެޓީމަކަށް ކާމިޔާބީ ހޯދައިދޭށެވެ. ރާއްޖޭގެ އެންމެ މޮޅު ވޮލީ ބޯޅަ ކުޅުންތެރިޔާ އިސްމާޢީލް ސާޖިދުގެ ކްލަބަކީ މޯލްޑިވިއަންއެވެ. އޭނާއެކު ހަތަރު އަހަރު އެއް ކްބަލަކަށް ކުޅެފައިވާ، ސާޖިދު އެންމެ ރަނގަޅަށް ދަންނަ އަޝްފާގް އާދަމް މިހާރު ކުޅެމުންދަނީ ޕޮލިސް ކުލަބަށެވެ. ދެކުޅުންތެރިން ދެ ކްލަބަކަށް ކުޅުމުން ވޮލީ މުބާރާތުގެ ފޯރި ގަދަވި ނަމަވެސް އެކަން ވެފައިވަނީ ދެ ކުޅުންތެރިންނަށް އުނދަގޫ ނިންމުމަކަށެވެ. ދެ ކޯޓްގައި ދެ ކުޅުންތެރިން އިދިކޮޅަށް ކުން ވެފައިވަނީ އުނދަގޫ ކަމަކަށެވެ. އަޝަފާގް އާދަމް ( އައްކަޅޭ ) ބުނީ މިހާތަނަށް ރާއްޖޭގައި އުފެދުނު އެންމެ މޮޅު ވޮލީ ކުޅުންތެރިއަކީ އިސްމާޢީލް ސާޖިދުކަމަށެވެ. މިފާއިތުވެދިޔަ، ހަތަރުވަރަކަށް އަހަރު އެކުގައި ގިނަ މަސައްކަތްތަކެއް ކުރެވި، ގިނަ ކާމިޔާބީތަކެއްވެސް މިދެ ކުޅުންތެެރިންވަނީ ހާސިލްކޮށްފައެވެ. އަޝްފާގް ބުނީ ޓީމް ކިތަންމެ ބަލިވެފައި އޮތް ނަމަވެސް ސާޖިދު ހުރެއްޖެނަމަ، އިތުރު ހިތްވަރެއް ލިބޭކަމަށެވެ. މެޗުން މޮޅުވާނެކަމުގެ ސަތޭކަ ޕަސެންޓް ޔަޤީންކަން އަބަދުވެސް އޮންނަކަމަށެވެ.
img:http://s4.psmnews.mv/images/660x400/14683392676207.jpg|އަޝްފާގް އާދަމްއާ އިސްމާޢީލް ސާޖިދު (ފޮޓޯ: ރެޑްބުލް)
ފުރަތަމަ އެއްކޮށް ކުޅެންފެށިއިރު، މިހާހިސާބަށް އާދެވޭނެކަމަށް އުއްމީދު ނުކުރާކަމަށާއި، ނަމަވެސް ޕެއާރއެއް ގޮތުގައި މަސައްކަތް ކުރެވިދާނެކަމަށް އަބަދުވެސް ގަބޫލް ކުރެވުނުކަމަށެވެ. އަޝްފާގް ބުނީ މިހާ ދުވަހު އެއްކޮށް މަސައްކަތް ކުރެވުމުން، ސާޖިދުއަށް ކުރެވޭ އިތުބާރުވަރަށް ބޮޑުކަމަށާއި، އަބަދުވެސް ބޯޅަތައް ނިންމާނެކަމުގެ ޔަޤީންކަން އޮންނަކަމަށެވެ.
ބީޗް ވޮލީ މުބާރާތުގައި މިދެ ކުޅުންތެރިން ވަނީ ވިދިވިދިގެން އަށް އަހަރު ތަށި ހޯދާފައެވެ. ބީޗްގައި މިއީ މިހާތަނަށް ރާއްޖޭގައި އުފެދު އެންމެ މޮޅު ޕެއާރއެވެ.
ވޮލީ އެސޯސިއޭޝަންގެ ނައިބް ރައީސް އިލްޔާސް އަހުމަދު ވިދާޅުވީ މިދެ ކުޅުންތެރިންނަކީ ރާއްޖޭގައި މިހާތަނަށް އުފެދުނު އެންމެ މޮޅު ކުޅުންތެރިންގެ ތެރެއިން ދެ ކުޅުންތެރިންކަމަށެވެ. އިސްމާޢީލް ސާޖިދުއަކީ ރާއްޖޭގައި މިހާރު ހުރި އެންމެ ބާރަށް ސޮޓްޖަހާ ކުޅުންތެރިޔާއެވެ. އަދި އަޝްފާޤަކީ ރާއްޖޭގައި މިހާރު ހުރި އެންމެ މޮޅު ރިސީވަރއެވެ.
ހަމައެކަނި މިދެކުޅުންތެރިންގެ ގުޅުން ފެންނަނީ ވޮލީ ކޯޓްމަތީގައި އެކަންޏެއްނޫނެވެ. ކޯޓުން ބޭރުގައިވެސް މިދެ ކުޅުންތެރިންނަކީ ޕެއާއެކެވެ. ރާއްޖެއިން ބޭރަށް ވޮލީ ޓީމު ކުރާ ދަތުރުތަކުގައިވެސް މި ދެކުޅުންތެެރިންނަކީ ރޫމް ޕާޓްނަރުންނެވެ.
img:http://s3.psmnews.mv/images/660x400/14683392852742.jpg|އަޝްފާގް އާދަމްއާ އިސްމާޢީލް ސާޖިދު (ފޮޓޯ: ރެޑްބުލް)
އިސްމާޢީލް ސާޖިދުއާއި އަޝްގާފް އާދަމް އެއްކޮށް ހޯދާފައިވާ ކާމިޔާބީއަށް ބަލާއިރު މިދިޔަ އަަހަރު މިދެ ކުޅުންތެރިން ކުޅެފައިވަނީ މޯލްޑިވިއަންއަށެވެ. މޯލްޑިވިއަންއާއެކު ޤައުމީ މުބާރާތް، އެސޯސިއޭޝަން ކަޕް އަދި ލީގުގެ ދެވަނަ ހޯދިއެވެ.
ދެހާސް ސާދަވަނަ އަަހަރު އެސޯސިއޭޝަން ކަޕާއި، ޤައުމީ މުބާރާތުގެ ދެވަނަ ހޯދާ، ދެހާސް ސާދަވަނަ އަހަރު ވޮލީ ލީގުގެ ޗެންޕިއަންކަން ހޯދިއެވެ.
ޤައުމީ ބީޗް ވޮލީ މުބާރާތުގައި ފާއިތުވި އަަށް އަހަރުވެސް ޗެންޕިއަންކަން ހޯދީ މިދެ ކުޅުންތެރިންނެވެ.
img:http://s1.psmnews.mv/images/660x400/14683393035511.jpg|އަޝްފާގް އާދަމްއާ އިސްމާޢީލް ސާޖިދު (ފޮޓޯ: ރެޑްބުލް)
އަދި މިއަހަރު މެލޭޝިޔާގައި އޮތް ވޮލީ މުބާރާތުން ރާއްޖެ ދެވަނަ ހޯދިއިރު މިދެ ކުޅުންތެރިންގެ ހިއްސާ ބޮޑުކަންވެސް ފާހަގަކޮށްލެވެއެވެ. މިދެ ކުޅުންތެރިންނާއެކު ގިނަ ފަހަރަށް އެއް ޓީމަކުން ފެންނަ ސެޓަރު އިޝާން މުޙައްމަދުވެސް މިފަހަރު ފެންނާނީ ވަކި ޓީމަކުންނެވެ. ރާއްޖޭގެ އެންމެ މޮޅު ކުޅުންތެރިން އެކި ޓީމްތަކަށް ބެހި، ޞަރަހައްދުގެ މޮޅު ކުޅުންތެރިން ޓީމްތަކަށް ކުޅެމުން ދިއުމަކީ މިފަހަރުގެ މުބާރާތުގެ ފޯރި އެތައް ތަނަކުން ގަދަވެގެންދާނެ ސަބަބަކަށެވެ.