ޒަޔަނިސްޓު ދައުލަތުގެ ސަރުކާރަކީ ލާއިންސަނީ ޤަތުލުޢާންމުތައް ހިންގަމުންދާ ޚުދުމުޚްތާރު ސަރުކާރެއް ކަމަށް ބުނެ, އެ ޤައުމާ ގުޅުން ކަނޑައިލަން ނިކަރާގުއާއިން ނިންމައިފިއެވެ. މެދުތެރޭ އެމެރިކާ ބައްރުގެ ޤައުމެއް ކަމުގައިވާ ނިކަރާގުއާއިން ޔަހޫދީންނާ ގުޅުން ކަނޑައިލަން ނިންމާފައި މި ވަނީ, މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޖަރީމާތަކާ ގުޅިގެންނެވެ.
ފަލަސްޠީނުގެ ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ލާއިންސާނީ ޢުދުވާނެއް ހިންގަން ފަށާފައި ވަނީ މީގެ އަހަރެއްހާ ދުވަސް ކުރިންނެވެ. އެ ޢުދުވާނުގެ ދަށުން ޔަހޫދީ ފައުޖުގެ ނިރުބަވެރި ސިފައިން ވަނީ ޣައްޒާއިން 42,000އަށްވުރެ ގިނަ މީހުން ޝަހީދު ކޮށްލާފައެވެ. ޔަހޫދީ ފައުޖުން ލުބްނާނުގެ މުސްލިމުންނާ ދެކޮޅަށް ޖަރީމާތައް ހިންގަން ފަށާފައި ވަނީ ސެޕްޓެންބަރު މަހުގެ 23ވަނަ ދުވަހުއެވެ. އެ ޢުދުވާނުގައި ވެސް މިހާތަނަށް 2,000އަށްވުރެ ގިނަ މީހުން ޝަހީދު ކޮށްލާފައިވެއެވެ.
ނިކަރާގުއާގެ ސަރުކާރުން ނެރުނު ބަޔާނެއްގައި ބުނީ, އިސްރާއީލާ އެކު ބާއްވަމުން ދިޔަ ގުޅުންތައް ކަނޑައިލަން ނިންމާފައި ވަނީ ފަލަސްޠީނުގެ ސަރަޙައްދުތަކުގައި ހިންގަމުންދާ ލާއިންސާނީ ޖަރީމާތައް ހުއްޓައިލަން ޔަހޫދީން ދެކޮޅު ހަދަމުންދާތީ ކަމުގައެވެ. ޣައްޒާ ޢުދުވާން ފެށި ފަހުން އެއް އަހަރު ދުވަސް ފާއިތުވުމާ ދިމާކޮށް, ނިކަރާގުއާގެ ޤާނޫނު ހަދާ މަޖިލީހުން ވަނީ ޔަހޫދީންނާ ދެކޮޅަށް ފިޔަވަޅުތަކެއް އެޅުމަށް އެ ޤައުމުގެ ސަރުކާރަށް ގޮވައިލައި ޤަރާރެއް ފާސްކޮށްފައެވެ.
ނިކަރާގުއާގެ ސަރުކާރުން ބުނީ, ފަލަސްޠީނުގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޤަތުލުޢާންމު ލުބްނާނުގެ ސަރަޙައްދުތަކަށް ފުޅާކޮށްފައިވާއިރު, ސޫރިޔާއާއި ޔަމަނުގެ އިތުރުން އީރާނުގެ ރައްޔިތުންނާ ދެކޮޅަށް ޔަހޫދީ ފައުޖުގެ ޖަރީމާތައް ފުޅާ ކުރުމުގެ ފުރުޞަތު ބޮޑު ކަމުގައެވެ. ފަލަސްޠީނާއި ލުބްނާނުގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޖަރީމާތަކާ ގުޅިގެން މެދުއިރުމަތީގައި ލޭއޮހޮރުވުން ބޮޑު ހަނގުރާމައެއް ފެށުމުގެ ފުރުޞަތު ވެސް ވަނީ އެތައް ގުނައަކަށް އިތުރުވެފައެވެ.
ނިކަރާގުއާގެ ރައީސް ދަނިއެލް އޮރްތޭގާގެ ސަރުކާރަކީ މެދުއިރުމަތީގެ ބާރެއްގެ ގޮތުގައި ބެލެވޭ އީރާނާ އެކު ގާތް ގުޅުންތަކެއް ބާއްވަމުންދާ ސަރުކާރެކެވެ. ފަލަސްޠީނާއި ލުބްނާނުގެ ރައްޔިތުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާންތަކުގެ ތެރެއިން ޔަހޫދީ ފައުޖުން ދާދިފަހުން އީރާނުގެ ވެރިރަށް ތަހްރާނަށް ވެސް ނިރުބަވެރި ޙަމަލާތަކެއް ދިނެވެ.
ޖުލައި 31ވަނަ ދުވަހު ދިން ޙަމަލާގައި ޔަހޫދީ ފައުޖުން ވަނީ ޣައްޒާގައި ވެރިކަން ކުރާ ޙަމާސް ޖަމާޢަތުގެ ސިޔާސީ ގޮފީގެ ކުރީގެ ވެރިޔާ އިސްމާޢީލް ހަނިއްޔާ ޝަހީދު ކޮށްލާފައެވެ. އަދި, ލުބްނާނުގެ ވެރިރަށް ބައިރޫތަށް ސެޕްޓެންބަރު 27ވަނަ ދުވަހު ދިން ޙަމަލާތަކެއްގައި އެ ޤައުމުގެ މުޖާހިދުންގެ ޖަމާޢަތް, ޙިޒްބުاللهގެ ވެރިޔާ އަލް-ސައްޔިދް ޙަސަން ނަޞްރުالله ވެސް ވަނީ ޝަހީދު ކޮށްލާފައެވެ. އެ ޙަމަލާގައި އީރާނުގެ ބާރުގަދަ އިސްލާމީ އިންޤިލާބީ ލަޝްކަރު (އައިއާރްޖީސީ)ގެ ކޮމާންޑަރުގެ ނައިބު ޢައްބާސް ނިލްފުރޫޝާން ވެސް ޝަހީދު ކޮށްލިއެވެ.
އެ ޙަމަލާތަކުގެ ބަދަލު ހިފުމުގެ ގޮތުން އޮކްޓޫބަރު 1ވަނަ ދުވަހު އީރާނުން ވަނީ ޒަޔަނިސްޓު ދައުލަތުގެ ރަށްތަކާއި ޔަހޫދީ ފައުޖުގެ އަމާޒުތަކަށް 180އެއްހާ ބެލިސްޓިކް މިސައިލް ބޭނުން ކޮށްގެން ނުރައްކާތެރި ޙަމަލާތަކެއް ދީފައެވެ. އެ ޙަމަލާތަކުގައި ޔަހޫދީންނަށް ބޮޑެތި ގެއްލުންތަކެއް ލިބުނު ނަމަވެސް, ގެއްލުންތަކުގެ ތަފުސީލު ހާމަ ކުރަން ޔަހޫދީން ދަނީ ދެކޮޅު ހަދަމުންނެވެ. އަދި, ބަދަލު ހިފުމުގެ ގޮތުން އީރާނަށް ނިރުބަވެރި ޙަމަލާތަކެއް ދިނުމަށް ޔަހޫދީން ދަނީ ތައްޔާރުވަމުންނެވެ. އީރާނުގެ ތެޔޮ ވަޅުތަކާއި ތެޔޮ ސާފުކުރާ ކާރުޚާނާތަކުގެ އިތުރުން ނިއުކްލިޔަރ ޕުރޮގުރާމުގެ ދަށުން ޤާއިމު ކޮށްފައިވާ މަރުކަޒުތަކަށް ޔަހޫދީންގެ ނިރުބަވެރި ޙަމަލާތައް އަމާޒު ކުރާނެ ކަމަށް ބެލެވޭ ކަމުގައި މަސްރަޙު ދިރާސާ ކުރާ ފަރާތްތަކުން ޤަަބޫލު ކުރެއެވެ.