ލުބްނާނުގެ ދެކުނުގައި އޮތް އަވަށެއް ކަމުގައިވާ ރާމިޔާއަށް އަތްގަދަ ކުރަން ޔަހޫދީ ފައުޖުން މަސައްކަތް ކުރަމުންދާ ކަން އެ ޤައުމުގެ މުޖާހިދުންގެ ޖަމާޢަތް, ޙިޒްބުاللهން ހާމަކޮށްފިއެވެ. ލުބްނާނުގެ މުސްލިމުން ޝަހީދުކޮށް ނެތިކޮށްލަން ސެޕްޓެންބަރު 23ވަނަ ދުވަހު ފެށި ލާއިންސާނީ ޖަރީމާގެ ދަށުން އެ ޤައުމުގެ ދެކުނުގެ ސަރަޙައްދަށް ޔަހޫދީ ފައުޖުގެ ނިރުބަވެރި ސިފައިން އެއްގަމު މަގުން އަރައިގަނެފައި ވަނީ އޮކްޓޫބަރު 1ވަނަ ދުވަހުއެވެ.
ޙިޒްބުاللهން ބުނީ, ޔަހޫދީންގެ ކިބައިން ރާމިޔާ ދިފާޢު ކުރަން އެ ޖަމާޢަތުގެ މުޖާހިދުން ވަރުގަދަ ހަނގުރާމައެއް ކުރަމުންދާ ކަމުގައެވެ. ރާމިޔާއަށް އަތްގަދަ ކުރަން ޔަހޫދީ ފައުޖުން ޢުދުވާން ހިންގަން ފަށާފައި ވަނީ, ލުބްނާނުގެ ދެކުނުގައި އޮތް 23 އަވަށެއް ހުސްކުރުމަށް އެންގުމަށް ފަހުއެވެ. ނަމަވެސް, އެ ސަރަޙައްދުގައި އަދިވެސް އެތައް ހާސް ބަޔަކު ތާށިވެފައި އެބަތިއްބެވެ.
ޔަހޫދީ ފައުޖާ ދެކޮޅަށް ޖިހާދު ކުރަމުންދާ ޙިޒްބުاللهގެ މުޖާހިދުން ވެސް ދަނީ ޒަޔަނިސްޓު ދައުލަތުގެ އަމާޒުތަކަށް ވަރުގަދަ ޙަމަލާތަކެއް ދެމުންނެވެ. އޮކްޓޫބަރު 12ވަނަ ދުވަހު އެކަނިވެސް ޙިޒްބުاللهން ވަނީ އިސްރާއީލުގެ ރަށްތަކާއި ޔަހުދީ ފައުޖުގެ އަމާޒުތަކަށް 320 ރޮކެޓު ޙަމަލާ ދީފައެވެ. އޭގެ ތެރެއިން ގިނަ ރޮކެޓުތައް ދިފާޢުކޮށް ވައްޓައިލާފައިވާނެ ކަމުގައި ޔަހޫދީ ފައުޖުން ބުނި ނަމަވެސް, ޙަމަލާތަކުގައި ޔަހޫދީންގެ ރަށްތަކަށް ބޮޑެތި ގެއްލުންތަކެއް ލިބުނެވެ. އެ ގެއްލުންތަކުގެ ތަފުސީލު ހާމަ ކުރަން ޔަހޫދީން ދަނީ ދެކޮޅު ހަދަމުންނެވެ.
ލުބްނާނުގެ ދެކުނުގެ ސަރަޙައްދުގައި ޤަތުލުޢާންމު ހިންގަމުންދާ ޔަހޫދީ ފައުޖުން, އެ ޤައުމުގައި ހަރަކާތްތެރިވާ އދގެ ސުލްޙަ ބަލަހައްޓާ ފައުޖު (ޔުނިފިލް)ގެ މައި މަރުކަޒަށް އިތުރު ޙަމަލާތަކެއް ދީފައިވާ ކަން އެ ލަޝްކަރުން ވެސް ވަނީ ހާމަކޮށްފައެވެ. އެ ޙަމަލާތަަކުގައި ޔުނިފިލްގެ އިތުރު ސިފައިންގެ މީހަކު ޒަޚަމު ކޮށްލިއެވެ. މިއާ އެކު, ޔަހޫދީ ފައުޖުން ގަސްދުގައި ދީފައިވާ ޙަމަލާތަކުގައި ޒަޚަމު ކޮށްލާފައިވާ ޔުނިފިލްގެ ސިފައިންގެ އަދަދު ވަނީ ފަހަކަށް އުފުލިފައެވެ.
އދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝްގެ އިތުރުން ޔަހޫދީންގެ ހުޅަނގުގެ މަދަދުގާރުން ވަނީ ޔުނިފިލްގެ މައި މަރުކަޒަށް އަމާޒުކޮށް ދީފައިވާ ޙަމަލާތައް އެންމެ ހަރުކަށި އިބާރާތުން ކުށްވެރި ކޮށްފައެވެ. ޔުނިފިލުން ބުނީ, އެ ފައުޖުގެ ސިފައިންނަށް ވަރަށް ނުރައްކާތެރި ހާލަތެއް ކުރިމަތި ކުރުވާފައިވާ ކަމަށާއި, އެ މީހުންގެ ސަލާމަތާއި ރައްކާތެރިކަން ކަށަވަރު ކޮށްދޭން ޖެހޭނެ ކަމުގައެވެ.
މި ކަމާ މެދު ހިތްހަމަނުޖެހުން ފާޅު ކުރުމަށް ފަރަންސޭސިވިލާތުން ވަނީ އެ ޤައުމުގައި ހުންނަ އިސްރާއީލުގެ ސަފީރު ހާޒިރުކޮށް, ސުވާލު ކޮށްފައެވެ. އަދި, ޔުނިފިލްގެ ސިފައިންނަށް ޙަމަލާ ދިނުން ހުއްޓައިލުމަށް ގޮވައިލާފައިވާ މީހުންގެ ތެރޭގައި ޔަހޫދީންގެ އެންމެ ބޮޑު މަދަދުގާރު, އެމެރިކާގެ ރައީސް ޖޯ ބައިޑަން ވެސް ހިމެނެއެވެ. ރަޝިޔާއިން ވެސް ވަނީ އެ ކަމަށް ބާރުއަޅާފައެވެ.
ޔުނިފިލްގެ ފައުޖުގައި 50 ޤައުމެއްގެ ސިފައިން ހިމެނޭއިރު, އޭގެ ތެރޭގައި 10,400 ސިފައިން ހިމެނެއެވެ. އޭގެ ތެރޭގައި އެންމެ ގިނައީ އިޓަލީވިލާތާއި, ފަރަންސޭސިވިލާތާއި, މެލޭޝިޔާއާއި, އިންޑޮނީޝިޔާގެ އިތުރުން އިންޑިޔާގެ ސިފައިންނެވެ. ޔުނިފިލްގެ ސިފައިންގެ ޒިންމާއަކީ ލުބްނާނުގެ އުތުރުގައި އޮތް ލަޔިޠާނީ ކޯރާއި ދެކުނުގައި އޮތް އިސްރާއީލް-ލުބްނާން ސަރަޙައްދީ ރޮނގާ ދެމެދުގައިވާ ބްލޫ ލައިންގެ ނަން ދީފައިވާ ސަރަޙައްދުގެ އަމަން ބެލެހެއްޓުމެވެ.
ޔަހޫދީ ފައުޖުން ދަނީ ލުބްނާނުގެ ވެރިރަށް ބައިރޫތުގެ އިތުރުން އަލް-ބިޤާޢު ވާދީގެ ސަރަޙައްދުތަކަށް ވައިގެ ޙަމަލާތައް އަމާޒު ކުރަމުންނެވެ. ބައިރޫތަށް ދެމުންދާ ޙަމަލާތަކުގައި ޝަހީދު ކޮށްލާފައިވާ މީހުންގެ ތެރޭގައި ޙިޒްބުاللهގެ އިސް ކޮމާންޑަރުން ހިމެނެއެވެ. އޭގެ ތެރޭގައި އެ ޖަމާޢަތުގެ ވެރިޔާ އަލް-ސައްޔިދް ޙަސަން ނަޞްރުالله ވެސް ހިމެނެއެވެ. ޔަހޫދީ ފައުޖުގެ އެންމެ ފަހުގެ ޙަމަލާތައް އަމާޒު ކޮށްފައި ވަނީ ލުބްނާންގެ ދެކުނުގައި އޮތް އަލް-ނަބަޠިއްޔާގެ ބާޒާރަކަށެވެ. ލުބްނާނުގެ ޞިއްޙަތާ ބެހޭ ވުޒާރާއިން ބުނީ އެ ޙަމަލާތަކުގައި އަށް މީހުން ޒަޚަމު ކޮށްލާފައިވާ ކަމުގައެވެ. އެ ޙަމަލާގައި އެ ސަރަޙައްދުގައި ނުރައްކާތެރި އަލިފާނުގެ ހާދިސާއެއް ވެސް ހިނގިއެވެ.
ޔަހޫދީ ފައުޖުން މި ވަގުތު ދަނީ މެދުއިރުމަތީގެ ބާރެއްގެ ގޮތުގައި ބެލެވޭ އީރާނަށް ވެސް ނިރުބަވެރި ޙަމަލާތަކެއް ދިނުމަށް ތައްޔާރުވަމުންނެވެ. ނަން ހާމަކޮށްފައި ނުވާ އެމެރިކާގެ އޮފިޝަލުންތަކެއް ބުނީ, ޔަހޫދީންގެ ޙަމަލާތައް އަމާޒު ކުރާނީ އީރާނުުގެ އަސްކަރީ މަރުކަޒުތަކަށާއި ހަކަތަ އުފައްދާ ވިއުގައަށް ކަމުގައެވެ. މަސްރަޙު ދިރާސާ ކުރާ ފަރާތްތަކުން ބުނީ, އީރާނުގެ ތެޔޮ ވަޅުތަކާއި ތެޔޮ ސާފުކުރާ ކާރުޚާނާތަކުގެ އިތުރުން އެ ޤައުމުގެ ނިއުކްލިޔަރ ޕުރޮގުރާމުގެ ދަށުން ޤާއިމު ކޮށްފައިވާ މަރުކަޒުތަކަށް ވެސް ޔަހޫދީންގެ ޙަމަލާތައް އަމާޒު ކުރާނެ ކަމަށް ބެލެވޭ ކަމުގައެވެ.
ޔަހޫދީންގެ ޖަރީމާތަކާ ގުޅިގެން މެދިއިރުމަތީގައި ލޭއޮހޮރުވުން ބޮޑު ހަނގުރާމައެއް ފެށިދާނެ ކަމުގެ ބިރު އެތައް ގުނައަކަށް ބޮޑުވެފައިވާ މި ދަނޑިވަޅުގައި އެމެރިކާއިން ވެސް ވަނީ ޔަހޫދީންގެ ޙަމަލާތަކުގައި ބައިވެރިވާން ފަށާފައެވެ. މި ގޮތުން, ސޫރިޔާގައި ތިބި އެމެރިކާގެ އިސްތިޢުމާރީ ސިފައިން ވަނީ އެ ޤައުމުގެ އިރުއުތުރުގައި އޮތް ދަޔިރު އަލް-ޒޫރުގެ ވައިގެ ބަނދަރަށް ނިރުބަވެރި ޙަމަލާތަކެއް ދީފައެވެ.
ޔަހޫދީންގެ ޙަމަލާތަކަށް ރައްދު ދިނުމުގެ ގޮތުން ޢިރާޤުގައި ހަރަކާތްތެރިވާ ހަތިޔާރު އެޅި ޖަމާޢަތް, އިސްލާމިކް ރެސިސްޓެންސް އިން ޢިރާޤުން ވަނީ ޔަހޫދީ ފައުޖުގެ އަމާޒުތަކަށް ޑްރޯން ޙަމަލާތަކެއް ދީފައެވެ. އެ ޙަމަލާތައް އަމާޒު ކޮށްފައި ވަނީ ޔަހޫދީން އަތްގަދަ ކޮށްފައިވާ ސޫރިޔާގެ އަލް-ޖޫލާންގެ އުސް ބިންތަކުގައި ޤާއިމު ކޮށްފައިވާ ޔަހޫދީ ފައުޖުގެ އަސްކަރީ މަރުކަޒަކަށެވެ. ކުރިއަށް އޮތް ދުވަސްތަކުގައި ޔަހޫދީ ފައުޖުގެ އަމާޒުތަކަށް އިތުރު ޙަމަލާތައް ދޭނެ ކަމުގެ އިންޒާރު އެ ޖަމާޢަތުން ދިނެވެ.
ސެޕްޓެންބަރު 23ވަނަ ދުވަހުން ފެށިގެން ލުބްނާނުގެ ޢާންމު ރައްޔިތުން ޝަހީދުކޮށް ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ ޢާންމުންގެ ޢަދަދު ވަނީ 2,255އަށް އުފުލިފައެވެ. އޭގެ ތެރޭގައި ގިނަ ޢަދަދެއްގެ އަންހެނުންނާއި ކުޑަކުދިން ހިމެނޭ ކަމުގައި ލުބްނާނުގެ ޞިއްޙަތާ ބެހޭ ވުޒާރާއިން ބުންޏެވެ. އަދި, ޒަޚަމު ކޮށްލާފައިވާ މީހުންގެ ޢަދަދު 10,000އަށް އަރައެވެ. ޔަހޫދީންގެ ޢުދުވާނުގައި ގެދޮރު ނެތިކޮށްލާފައިވާ މީހުންގެ ޢަދަދު 1.2 މިލިޔަނަށް އުފުލިފައިވާއިރު, އދން ބުނީ އޭގެ ތެރެއިން ގިނަ ޢަދަދެއްގެ ބަޔަކު މި ވަގުތު ދިރިއުޅެމުން ދަނީ މަގުތަކުގެ މަތީގައި ކަމުގައެވެ.