ހެއިޓީގައި އަމަން ބެލެހެއްޓުމަށް ހަރަކާތްތެރިވަމުންދާ ބައިނަލްއަޤުވާމީ ފުލުހުންގެ ފައުޖުގައި ބައިވެރި ކުރުމަށް އިތުރު ފުލުހުން ފޮނުވާނެ ކަން ކެންޔާއިން ހާމަކޮށްފިއެވެ. ހެއިޓީގައި އަމަންއަމާން ކަން ދެމެހެއްޓުމަށް ހަރަކާތްތެރިވަމުންދާ ބައިނަލްއަޤުވާމީ ފުލުހުންގެ ފައުޖު, މަލްޓިނޭޝަނަލް ސެކިޔުރިޓީ ސަޕޯޓް (އެމްއެސްއެސް)ގައި ކެންޔާއިން ދަނީ އިސް ދައުރެއް އަދާ ކުރަމުންނެވެ.
އެ ފައުޖުގައި ބައިވެރި ކުރުމަށް އިތުރު ފުލުހުން ފޮނުވަން ތައްޔާރުވަމުންދާ ކަން އިޢުލާނު ކުރައްވާފައި ވަނީ ކެންޔާގެ ރައީސް ވިލިޔަން ރޫތޯއެވެ. ކެންޔާއަށް ދަތުރުފުޅެއް ކުރައްވަމުން ގެންދަވާ ހެއިޓީގެ ބޮޑުވަޒީރު ގެރީ ކޮނިއްޔީއާ އެކު ބޭއްވެވި ބައްދަލު ކުރެއްވުމެއްގައި ވާހަކަފުޅު ދައްކަވަމުން ރޫތޯ ވިދާޅުވީ ކުރިއަށް އޮތް ނޮވެންބަރު މަހު ކެންޔާއިން އިތުރު 600 ފުލުހުން ހެއިޓީއަށް ފޮނުވާނެ ކަމުގައެވެ.
ސުލްޙަ ބަލަހައްޓާ ފުލުހުންގެ ބައިނަލްއަޤުވާމީ ފައުޖެއް ހެއިޓީއަށް ފޮނުވާފައި ވަނީ އެ ޤައުމުގައި ހަރަކާތްތެރިވާ ކުށްކުރާ ގުރޫޕުތަކުން ނުރައްކާތެރި ޙަމަލާތަކެއްދީ, ވެރިރަށް ޕޯ-ޣޯ-ޕްރާންސްގެ ބޮޑު ސަރަޙައްދަކަށް އަތްގަދަ ކުރުމާ ގުޅިގެންނެވެ. ހުސްވި ހަފުތާގައި ވެސް ކުށްކުރާ ގުރޫޕުތަކުން ވަނީ ދަނޑުވެރިކަން ކުރާ ބަޔަކު ދިރިއުޅޭ ސަރަޙައްދަކަށް ޙަމަލާތަކެއްދީ, ޢާންމުންގެ 115 މީހުން މަރައިލާފައެވެ. އަދި, އެ ގުރޫޕުތަކުން ދަނީ އެ ޤައުމުގެ އިތުރު ސަރަޙައްދުތަކަށް އަތްގަދަ ކުރަމުންނެވެ.
ހެއިޓީގައި އެމްއެސްއެސްގެ ފައުޖެއް ޤާއިމު ކުރަން އދން ނިންމާފައި ވަނީ ޖޫން މަހުއެވެ. އެ ލަޝްކަރުގައި ބައިވެރި ކުރުމަށް 2,900 ފުލުހުން ފޮނުވަން 10 ޤައުމަކުން ވަނީ ވަޢުދުވެފައެވެ. ނަމަވެސް, އެ ފައުޖުގައި މި ވަގުތު ހަރަކާތްތެރިވަމުން ދަނީ އެންމެ 430 ފުލުހުންނެވެ. އޭގެ ތެރެއިން 400 ފުލުހުން ފޮނުވާފައި ވަނީ ކެންޔާއިންނެވެ. ރޫތޯ ވިދާޅުވީ, އެ ފައުޖުގައި ބައިވެރި ކުރުމަށް ފޮނުވަން ނިންމާފައިވާ އިތުރު 600 ފުލުހުން މިހާރު ވެސް ތަމްރީނުތައް ފުރިހަމަ ކުރަމުންދާ ކަމުގައެވެ.
ރޫތޯއާ އެކު ބޭއްވެވި ބައްދަލުވުމުގައި ކޮނިއްޔީ ވަނީ އެމްއެސްއެސްގެ ލަނޑުދަނޑިތައް ހާސިލު ކުރުމުގައި ކެންޔާއިން ފޯރުކޮށްދެމުންދާ އެހީތެރިކަން ފާހަގަ ކުރައްވައި, ރޫތޯއަށް ޝުކުރު އަދާކުރައްވާފައެވެ. އަދި, ކުށްކުރާ ގުރޫޕުތަކުން އެންމެ ފަހުން ދީފައިވާ ޙަމަލާތައް ހުއްޓުވަން ކެންޔާގެ ފުލުހުން ކާމިޔާބު އޮޕަރޭޝަނެއް ހިންގާފައިވާ ކަން އޭނާ ފާހަގަ ކުރެއްވިއެވެ.
އދން ބުނީ, ކުށްކުރާ ގުރޫޕުތަކުން ޕޯ-ޣޯ-ޕްރާންސްގެ ބޮޑު ސަރަޙައްދަކަށް ވެރިވެގަތުމާ ގުޅިގެން 700,000އަށްވުރެ ގިނަ މީހުންނަށް އަމިއްލަ ވަޒަން ދޫކޮށް ރައްކާތެރި ހިސާބުތަކަށް ހިޖުރަކުރަން މަޖުބޫރުވި ކަމުގައެވެ. އަދި, ހެއިޓީގައި ހައިހޫނުގައި ޖެހިފައިވާ މީހުންގެ ޢަދަދު ފަސް މިލިޔަނަށް އުފުލިފައިވާ ކަމުގައެވެ.
ހުސްވި ސެޕްޓެންބަރު މަހު އދން ވަނީ ހެއިޓީގައި އިތުރު އެެއް އަހަރު ދުވަހުގެ މުއްދަތަކަށް އެމްއެސްއެސްގެ ފައުޖުން ހަރަކާތްތެރިވުމުގެ ހުއްދަ ދީފައެވެ. ހެއިޓީއަށް އދގެ ސުލްޙަ ބަލަހައްޓާ ފައުޖުގެ ސިފައިން ފޮނުވަން އެމެރިކާއިން ދަނީ މަސައްކަތް ކުރަމުންނެވެ. ނަމަވެސް, ޗައިނާއާއި ރަޝިޔާއިން ވަނީ އެ ހުށަހެޅުމަށް އިންކާރު ކޮށްފައެވެ.