ޔުއެފާ ނޭޝަންސް ލީގުގައި ރޭ ރިޕަބްލިކް އޮފް އަޔަލަންޑާ ދެކޮޅަށް ކުޅުނު މެޗު 2-0 ގެ ނަތީޖާއަކުން ކާމިޔާބުކޮށް، ގްރީސްއިން މި މުބާރާތުގެ ހުރިހާ މެޗަކުން މޮޅުވުމުގެ ރިކޯޑު ދަމަހައްޓައިފިއެވެ.
މި މެޗުން މޮޅުވުމާއެކު ގްރީސްއިން ވަނީ ލީގު ބީގެ ގްރޫޕް ދޭއްގައި މިހާތަނަށް ކުޅުނު ހަތަރު މެޗުން 12 ޕޮއިންޓް ހޯދައިގެން، ގްރޫޕްގެ އެއްވަނަ މަގާމު ހޯދާފައެވެ. މި މުބާރާތުގައި ވާދަކުރާ 54 ޓީމުގެ ތެރެއިން ކޮންމެ ޓީމެއްވެސް މިހާތަނަށް އެއްވެސް ޓީމަކަށް ކުޅުނު ހަތަރު މެޗު ކާމިޔާބުކުރެވިފައެއް ނުވެއެވެ. މި ފުރުސަތު އޮތް ހަމައެކަނި ދެ ޓީމަކީ ޕޯޗުގަލް އާއި ރުމޭނިއާއެވެ. އެ ދެ ޓީމުންވެސް މިހާތަނަށް ތިން މެޗު ކުޅެފައިވާއިރު، ތިން މެޗުވެސް ވަނީ ކާމިޔާބުކޮށްފައެވެ.
ގްރީސްގައި ރޭ ކުޅުނު މެޗުގެ ފުރަތަމަ ހާފްގައި އެއްވެސް ޓީމަކަށް ލަނޑެއް ކާމިޔާބު ކުރެވިފައިނުވި ނަމަވެސް، ގްރީސް ވަނީ ރަނގަޅު ކުޅުމެއް ދައްކައި ލަނޑު ޖަހާނެ ފުރުސަތުތަކެއްވެސް ތަނަވަސްކޮށްފައެވެ.
މި މެޗުގެ ދެވަނަ ހާފްގެ ކުޅުން ފެށުނުތާ ތިންވަނަ މިނިޓުގައި ގްރީސްގެ ކެޕްޓަން ޓަސޮސް ބަކަސެޓަސް ވަނީ ލަނޑެއް ކާމިޔާބުކޮށް އެ ޓީމަށް ކުރި ހޯދަދީފައެވެ. އަދި މެޗުގެ ފުރިހަމަ ވަގުތު ހަމަވެ އިތުރު ވަގުތުގެ ކުޅުމުގައި އަޔަލަންޑްގެ ކުޅުންތެރިއަކަށް ހެދުނު ގޯހެއްގެ ފައިދާ ނަގާ ގްރީސްގެ މަންޓާލޮސް ވަނީ އިތުރު ލަނޑެއް ކާމިޔާބުކޮށް މެޗުގެ ނަތީޖާ 2-0 އަށް ބަދަލުކޮށްފައެވެ.
މި މެޗުން ބަލިވުމާއެކު އަޔަލަންޑަށް ވަނީ ރެލިގޭޝަންގެ ޕްލޭއޮފްގައި ކުޅުމުގެ ބިރު ހީވެފައެވެ. ގްރޫޕުގައި ބާކީ ދެ މެޗު ކޮޅެއް އޮތްއިރު, އަޔަލަންޑް މޮޅުވެފައިވަނީ އެންމެ މެޗަކުންނެވެ. އަދި ތިން މެޗުން އެ ޓީމު ވަނީ ބަލިވެފައެވެ. ގްރީސްއިން މި މުބާރާތުގައި މިހާތަނަށް ދައްކަމުންދާ ކުޅުމަށް ބަލާއިރު ނޭޝަންސް ލީގުގެ އެންމެ މަތީ ކެޓަގަރީއަށް ކޮލިފައިވުމަށް އެ ޓީމަށް ވަނީ ވަރަށް ބޮޑަށް މަގުފަހިވެފައެވެ.