ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ 2020، 2021، 2022، އަދި 2023 ވަނަ އަހަރުގެ އޮޑިޓް ރިޕޯޓުތައް ފާސްކޮށްފިއެވެ.
މި އޮޑިޓް ރިޕޯޓުތައް ފާސްކޮށްފައިވަނީ ވީއޭއެމްގެ ހިންގާ ކޮމިޓީގެ ބައްދަލުވުމުގެ ތެރެއިންނެވެ. އެގޮތުން ފަނަރަ މެންބަރުންގެ ތެރެއިން 13 މެންބަރުން ހާޒިރުވި މި ބައްދަލުވުމުގައި ރިޕޯޓުތައް ފާސްކޮށްފައިވަނީ އެންމެންގެ އިއްތިފާގުންނެވެ.
މި ބައްދަލުވުމުގައި ކޮމިޝަނާ އޮފް ސްޕޯޓްސް، މޯލްޑިވްސް އޮލިމްޕިކް ކޮމިޓީ، މޯލްޑިވްސް ސްޕޯޓްސް ނޭޝަނަލް ކައުންސިލް، އަދި ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ)ގެ އޮބްޒާވަރުން ވެސް ބައިވެރިވެފައިވެ އެވެ.
ވީއޭއެމުގެ ރައީސްކަމުގެ މަގާމަށް ލަތީފް އިންތިހާބުވެވަޑައިގަތީ މީގެ ހަތް މަސްދުވަސް ކުރިންނެވެ. ހަވާލުވިއިރު އެސޯސިއޭޝަނުގެ ހާލަތު އޮތީ ގޯސްކޮށެވެ. އެހެންކަމުން މި ވޭތުވެދިޔަ ހަތް މަސްދުވަހު އެންމެ ބޮޑު މަސައްކަތެއްގެ ގޮތުގައި ކޮށްފައިވަނީ އޮޑިޓު ރިޕޯޓުތައް ފާސްކުރުމަށެވެ.
ވީއޭއެމުގެ ކުރީގެ ރައީސް މުހައްމަދު ރަނޭޝް (ރަނޭ) ގެ ދައުރުގައި ބައިނަލްއަގްވާމީ ގިނަ މުބާރާތްތަކެއް ބޭއްވި ނަމަވެސް ހަރަދުކުރި ގޮތުގެ އެއްވެސް ކަމެއް ހާމައެއް ނުކުރެއެވެ. މިއަހަރުގެ މާރޗް މަހުގެ 1 ވަނަ ދުވަހު މަގާމުން އިސްތިއުފާ ދިނުމާއި ހަމަޔަށް އޭނާގެ ދައުރުގެ ހަތަރު އަހަރުގެ އޮޑިޓް ރިޕޯޓު ފާސްކޮށްފައިނުވާތީ ގިނަ ބަޔަކު ސުވާލު އުފެއްދިއެވެ. އަދި ކޮރަޕްޝަނުގެ ތުހުމަތުތަކެއްވެސް ކޮށްފައިވެއެވެ. ނަމަވެސް އޭރު ރަނޭ މިކަމާއި ގުޅޭގޮތުން އެއްވެސް ވާހަކައެއް މީޑިއާގައި ދައްކާފައެއް ނުވެއެވެ.
ރަނޭ އިސްތިއުފާ ދިނުމާއެކު ކޮމިޝަނާ އޮފް ސްޕޯޓްސް އިން ވޮލީބޯލް އެސޯސިއޭޝަނުގެ އިންތިހާބު ބާއްވަން ފުރުސަތު ދީފައިވަނީ، 90 ދުވަހުގެ ތެރޭގައި ވޮލީބޯލް އެސޯސިއޭޝަންގެ މިދިޔަ ހަތަރު އަހަރުގެ އޮޑިޓްގެ ކަންކަން ފުރިހަމަ ކުރުމަށެވެ. ވޮލީބޯލް އެސޯސިއޭޝަނުން ރާއްޖޭގެ ގާނޫނާ އެއްގޮތަށް ނިންމަން ޖެހޭ ކަންކަން ފުރިިހަމަ ކުރުމަށެވެ. އެއާއެކު އަލަށް އިންތިހާބުވެވަޑައިގެންނެވި ލަތީފް ވަނީ މި ހަތް މަސްދުވަހުގެ ތެރޭގައި ރަނޭގެ ދައުރުގެ ހަތަރު އަހަރު ކުރި މަސައްކަތްތަކާއި ކުރި ހަރަދުތަކުގެ އޮޑިޓް ރިޕޯޓު ފާސްކޮށްފައެވެ.
މި ކޮންގްރެސްގައި، ވޮލީބޯލް އެސޯސިއޭޝަންގެ ހުރިހާ ފުރިހަމަ މެމްބަރު ކްލަބްތަކުގެ މަންދޫބުން ބައިވެރިވި ކަމަށް އެ އެސޯސިއޭޝަނުން ނެރުނު ބަޔާނުގައި ބުނެފައިވެ އެވެ. އެއީި ޕޮލިސް ކްލަބް، އަލްމާ ސްޕޯޓްސް ކްލަބް، އައްޑޫ ސްޕޯޓްސް ކްލަބް، ވޮލީބޯލް ޔޫތު ނިއު ޖެނެރޭޝަން، ކްލަބް ވޮލީބޯލް، ޔޫތު ނިއު ޖެނެރޭޝަން، ކްލަބް ހާފް ލައިން ލިންކޭޖް، އެސްޕިރޭޝަން ފޯ އޮލް އިނިޝިއޭޓިވްސް ސްޕޯޓްސް ކްލަބް، ދިވެހި ސިފައިންގެ ކްލަބް އަދި ގުޑީސް ސްޕޯޓްސް ކްލަބް އެވެ.