ސްޕެނިޝް ލީގުގައި އަންނަ ޑިސެމްބަރު މަހު ބާސެލޯނާ އާއި އެތުލެޓިކޯ މެޑްރިޑް ބައްދަލުކުރުމަށް ހަމަޖެހިފައިވާ މެޗު، އެމެރިކާގެ މަޔާމީގައި ކުޅުމަށް ފީފާގެ ހުއްދަ ހޯދުމަށް މަސައްކަތްކުރަމުންދާ ކަމަށް މީޑިއާ ރިޕޯޓުތައް ބުނެފިއެވެ.
އެގޮތުން އެމެރިކާގައި ހަރަކާތްތެރިވާ ސްޕެނިޝް ލީގުގެ ޕާޓްނަރު ކަމަށްވާ ރެލެވެންޓް ސްޕޯޓްސްއިން މި މެޗު ކުޅެވޭނެ އިންތިޒާމު ހަމަޖެއްސުމުގެ މަސައްކަތް ފީފާ އާއެކު ކުރަމުންދާ ކަމަށް ސްޕެނިޝް ލީގުން ވަނީ ބުނެފައެވެ.
މީގެ ފަސް އަހަރެއްހާ ދުވަސް ކުރީން، ސްޕެނިޝް ލީގުން އެންމެ ފުރަތަމަ މަސައްކަތްކުރީ ސީޒަނުގެ ކޮންމެވެސް މެޗެއް އެމެރިކާގައި ކުޅުމަށެވެ. ނަމަވެސް، އޭރު އެ މަސައްކަތްތައް ހުއްޓާލަންޖެހުނީ ސްޕެއިނުގެ ފުޓްބޯޅަ ފެޑެރޭޝަނާއި، ޕްލެއާސް ޔޫނިއަނުން އެކަމާ އެއްބަސްނުވުމުންނެވެ.
ބޭރު ގައުމެއްގައި ލީގުގެ މެޗެއް ކުޅުމަކީ އެހެން ގައުމުތަކުގައި ފުޓުބޯޅަ އާއި ލީގުގެ ބްރޭންޑް މަޝްހޫރު ކުރުމުގެ ގޮތުން ކުރެވޭނެ މުހިއްމު ކަމަކަށްވުމާއެކު، ބައިނަލްއަގުވާމީ ފެންވަރުގައި ކުރިއެރުންތައް ހޯދަމުން އަންނަ ސްޕެނިޝް ލީގުގެ އެންމެ ބޮޑު އުއްމީދަކީ ވަރުގަދަ އިނގިރޭސި ޕްރިމިއާ ލީގާ ދެމެދު އޮތް ތަފާތު ކުޑަކުރުމެވެ. އެކަމަކު ފާޑުކިޔާ ފަރާތްތަކުން ފާހަގަކުރާ ގޮތުގައި ބޭރު ގައުމެއްގައި މެޗެއް ކުޅުމަކީ ލީގުގައި ހަމަހަމަ ނޫން ވާދަވެރިކަމެއް އުފެދިގެންދާނެ ކަމެކެވެ.