ނިމިގެންދިޔަ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) މެންސް ވޮލީބޯލް ޗެލެންޖް ކަޕް 2024 ގައި އެންމެ ގިނަ ޕޮއިންޓް ހޯދި ކުޅުންތެރިޔާގެ މަގާމު ރާއްޖޭގެ ގައުމީ ފިރިހެން ވޮލީބޯޅަ ޓީމުގެ ކެޕްޓަން އިސްމާޢީލް ސާޖިދު (ކުޑަކާއްޓޭ) ހޯދައިފިއެވެ.
އުޒްބެކިސްތާނުގެ ޓަޝްކެންޓުގައި ކުރިއަށްދިޔަ މި މުބާރާތުގައި ހަ ގައުމެއް ވާދަކުރާއިރު، އެ ގައުމުތަކަކީ ރާއްޖޭގެ އިތުރުން އުޒްބެކިސްތާނާއި، ކިރްގިސްތާނާއި، ތަޖިކިސްތާނާއި، ތުރުކުމެނިސްތާން އަދި އަފްޣާނިސްތާނެވެ.
މި މުބާރާތުގެ އެންމެ ގިނަ ޕޮއިންޓް ހޯދި ކުޅުންތެރިޔާގެ މަގާމު ކުޑަކާއްޓޭ ހޯދިއިރު، އޭނާއަށް ވަނީ ސްޕައިކަށް 99 ޕޮއިންޓް، ބްލޮކަށް ނުވަ ޕޮއިންޓް އަދި ސާވް ކުރުމަށް ދެ ޕޮއިންޓް ލިބިފައެވެ. އެއާއެކު ކުޑަކާއްޓޭއަށް ވަނީ ޖުމްލަ 110 ޕޮއިންޓް ލިބިފައެވެ. އޭނާއާ އެންމެ ގާތުން ދެވަނައިގައި އޮތް ތުރުކުމެނިސްތާންގެ ވެއިސޯވް ބޭރަމްގެލްޑީއަށް ލިބިފައިވަނީ ޖުމްލަ 95 ޕޮއިންޓެވެ.
މި ރޭންކިންގައި ރާއްޖެއިން ދެން އެންމެ ގިނަ ޕޮއިންޓް ހޯދާފައިވަނީ އަށްވަނަ ހޯދި އުއްމީދީ ކުޅުންތެރިޔާ ހުސެއިން ޝަމާއިލެވެ. އެގޮތުން އޭނާ ވަނީ 69 ޕޮއިންޓް ހޯދާފައެވެ. މި ފަހަރުގެ މުބާރާތުގައި ޝަމާއިލްގެ ފަރާތުން ވަނީ މޮޅު ކުޅުމެއް ފެނިގެން ގޮސްފައެވެ.
އެކަމަކު މި ފަހަރުގެ ކާވާ މެންސް ވޮލީބޯލް ޗެލެންޖް ކަޕުގައި ރާއްޖެއަށް އެންމެ އެދެވޭ ކުޅުމެއް ދެއްކިފައި ނުވާއިރު، މި މުބާރާތުން ރާއްޖެއަށް ލިބުނީ ފަސްވަނައެވެ. އެއީ އިއްޔެ ކުޅުނު ރޭންކިން މެޗުގައި ތިން ސެޓު އެއް ސެޓުން ތަޖިކިސްތާން ބަލިކޮށްގެންނެވެ. މުބާރާތުގެ ލީގު ބުރުގައިވެސް ރާއްޖެއަށް މޮޅެއް ލިބުނީ ތަޖިކިސްތާން އަތުން އެކަންޏެވެ. އެކަމަކު އޭގެ ކުރިން ކުޅުނު ހަތަރު މެޗުންވެސް ބަލިވެފައިވާއިރު، ތުރުކުމެނިސްތާނާ ދެކޮޅަށް ކުޅުނު މެޗު ފިޔަވައި، އެހެން ހުރިހާ މެޗަކުން ރާއްޖެ ބަލިވެފައިވަނީ ސީދާ ތިން ސެޓުންނެވެ.
މި މުބާރާތުގެ ޗެމްޕިއަންކަން ހޯދާފައިވަނީ ކިރްގިސްތާނެވެ. އެ ޓީމުން ޗެމްޕިއަންކަން ހޯދީ އިއްޔެ ކުޅުނު ފައިނަލް މެޗުގައި ސީދާ ތިން ސެޓުން އުޒްބެކިސްތާން ބަލިކުރުމަށްފަހުއެވެ.