ޖޫނިއަރ ސާފިން ޗެމްޕިއަންޝިޕް: ޗެމްޕިއަންކަން އިނާން، ކަޔާން އަދި ޔަސީނަށް

މޯލްޑިވްސް ސާފިން އެސޯސިއޭޝަން (އެމްއެސްއޭ) އިން އިންތިޒާމުކޮށްގެން ބޭއްވި ގައުމީ ޖޫނިއަރ ސާފިން ޗެމްޕިއަންޝިޕް 2024 ކާމިޔާބުކަމާއެކު ނިންމާލަައިފިއެވެ.

ވަރުނުލާ ރާޅުގަނޑު ސަރަހައްދުގައި މި މުބާރާތް ކުރިއަށް ގެންގޮސްފައިވަނީ ތިން ކެޓެގަރީއަކަށް ބަހާލައިގެންނެވެ. އެއީ 14 އަހަރުން ދަށް، 16 އަހަރުން ދަށް އަދި 18 އަހަރުން ދަށެވެ.

މުބާރާތުގެ ފައިނަލް ހީޓުތައް މިއަދު ކުރިއަށްދިޔައިރު، 18 އަހަރުން ދަށުގެ ޗެމްޕިއަންކަން މުޙައްމަދު އިނާން އަބްދުލް ހަންނާން ހޯދީ ފައިނަލުގައި ޔޫސުފް ކަޔާން ހަމްދާން ޒަނީ ބަލިކުރުމަށްފަހުއެވެ. އެގޮތުން މި ހީޓުގައި އިނާން 10.17 ސްކޯ ކުރިއިރު، ކަޔާނަށް ލިބިފައިވަނީ 7.50 ގެ ސްކޯއެކެވެ.

މި މުބާރާތުގެ 16 އަހަރުން ދަށުގެ ޗެމްޕިއަންކަން ހޯދީ ކަޔާން އަބްދުﷲ އަރީފެވެ. އޭނާ ފައިނަލް ހީޓު ކާމިޔާބުކުރީ 11.33 ގެ ސްކޯއެއް ހޯދައިގެންނެވެ، ފައިނަލުގައި ކަޔާންއާ ވާދަކުރި ޔަސީން އަޙްމަދު ނާޝިދަށް ލިބިފައިވަނީ 7.24 ގެ ސްކޯއެކެވެ.

މި މުބާރާތުގެ 16 އަހަރުން ދަށުގެ ފައިނަލުން ޔަސީން ބަލިވި ނަމަވެސް، އޭނާ ވަނީ 14 އަހަރުން ދަށުގެ ޗެމްޕިއަންކަން ހޯދާފައެވެ. މި ބައިގެ ފައިނަލުގައި ޔަސީން 9.83 ގެ ސްކޯއެއް ހޯދިއިރު، އޭނާއާ ދެން ވާދަކުރި ނޫހު މުޙައްމަދު ދުނައިމް އިރުޝާދަށް ލިބިފައިވަނީ 6.57 ގެ ސްކޯއެކެވެ.

މި މުބާރާތުގެ 14 އަހަރުން ދަށުގެ ޓްރޮފީ ޔަސީން ދިފާއުކުރިއިރު، މިދިޔަ އަހަރު އޭނާ ވަނީ 14 އަހަރާއި 16 އަހަރުން ދަށުގެ އުމުރުފުރާގެ ޗެމްޕިއަންކަންވެސް ހޯދާފައެވެ.