ޖުމްލަ ހަ ޓީމަކާއެކު ކުލަބު އީގަލްސް ވެޓަރަންސްއިން ބާއްވާ ދެވަނަ ފުޓްސަލް މުބާރާތް މާލޭގައި ފަށައިފިއެވެ.
ކުލަގަދަ ރަސްމިއްޔާތަކާއެކު އީގަލްސް ވެޓެރަންސް ކަޕްގެ 2 ވަނަ ފުޓްސަލް މުބާރާތް ފައްޓަވައިދެއްވީ ކުލަބް އީގަލްސް ފުރަތަމަ ޑިވިޝަނަށް ގެންގޮސްދިން ކޯޗް އަހުމަދު ނިޔާޒު އެވެ. މި މުބާރަތަކީ ކުލަބް އީގަލްސްއަށް ނިސްބަތްވާ ކުރީގެ ކުޅުންތެރިން އިސްނަގައިގެން 2023 ވަނަ އަހަރު ބާއްވަން ފެށި މުބާރާތެކެވެ.
ކުޅިވަރުގެ ގިނަ ދުވަސްތަކެއް ހޭދަކުރުމަށްފަހު ކުޅުމުން ރިޓަޔާކޮށްފައިވާ ޖީލަށް އަމާޒުކޮށްގެން ކުރިއަށްގެންދާ މިފަހަރުގެ މުބާރާތުގަި ޖުމްލަ ހަ ޓީމު ވަނީ ބައިވެރިވެފައެވެ. ހަ ޓީމު ބަހާލެވިފައިވަނީ އީގަލްސްގެ ދިދައިގެ ކުލަތަކާއި ކުލަބުން އާއްމުކޮށް ބޭނުންކުރާ ޖާޒީގެ ކުލަތަކަށް ނިސްބަތްކޮށެވެ.
މުބާރާތުގައި ބައިވެރިވާ ޓީމުތަކަކީ ޕިންކް އީގަލްސް، ވައިޓް އީގަލްސް، ގުރީން އީގަލްސް، ބުލެކް އީގަލްސް، ގުރޭ އީގަލްސް އަދި އޮރެންޖް އީގަލްސްއެވެ. މި މުބާރާތް ކުރިޔަށް ދާނީ އޮކްޓޯބަރ 27 ން ނޮވެމްބަރު 13 ގެ ނިޔަލަށެވެ. އަދި މެޗުތައް ކުޅޭނީ ކޮންމެ އާދިއްތަ އަދި ބުދަ ދުވަހުގެ ރޭ 21:00 ފެށިގެން 23:00 އަށެވެ.
މިއީ ފުޓްބޯޅަ ޢާއިލާގެ މެމްބަރުގެ ގުޅުން ބަދަޙިކޮށް ، މިހާރު ފަނޑުވަމުންދާ ފުޓްބޯޅަ ކުޅިވަރު ދިރުވާ އާލާކުރުމަށް ހިތްވަރުދިނުމުގެ އިތުރުން ކުލަބް ނިސްބަތްވާ މާފަންނު ހުޅަނގު ސަރަޙައްދުގައި ދިރިއުޅޭ (އީގަލްސް ކޮމިއުނިޓީގެ) ކުޅިވަރު ކުޅޭ މީހުން ގުޅުން ބަދަޙިކުރުމުގެ މަގުސަދުގައި ބާއްވާ މުބާރާތެކެވެ.