އޭއެފްސީ ޗެލެންޖް ލީގުގައި ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނުން ކުޅުނު ފަހު މެޗުގައި ކިރްގިސްތާންގެ ޗެމްޕިއަން އެފްސީ އަބްދީޝް-އާޓާ އަތުންވެސް ބަލިވެއްޖެއެވެ.
އޭއެފްސީން މި ފަހަރު އަލަށް ފެށި ތިންވަނަ ފަންތީގެ ކުލަބު ފުޓްބޯޅަ މުބާރާތުގައި މާޒިޔާ ވާދަކުރިއިރު، އެ ޓީމުގެ ހިމެނޭުނު ގްރޫޕް ބީގެ މެޗުތައް ކުރިއަށްދިޔައީ ސެންޓްރަލައިޒްކޮށްގެން ކުވެއިތުގައެވެ. އަލް ކުވެއިތު ސްޕޯޓްސް ކުލަބުގައި ރޭ ކުޅުނު މެޗުން މާޒިޔާ ބަލިވެފައިވަނީ 3-0 ގެ ނަތީޖާއަކުންނެވެ.
މި މެޗު ފަށައިގެން ނުވަވަނަ މިނިޓުގައި އަބްދީޝްއިން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ކަޔަރަތު ޒީރްގަލްބެކެވެ. އޭގެ ފަހުން ފުރަތަމަ ހާފުގައި އިތުރު ލަނޑެއް ފެނިގެން ގޮސްފައެއް ނުވެއެވެ.
މި މެޗުގައި އަބްދީޝްއިން ލީޑު ފުޅާކޮށްފައިވަނީ މެޗުގެ 63 ވަނަ މިނެޓުގައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ޖަހައިދިނީ ބަދަލަކަށް ކުޅެން އެރި އަޓާއި ޒުމަޝޭވްއެވެ. މިއީ މާޒިޔާގެ އޭރިއާ ތެރެއިން ޑިފެންޑަރު އޭރޯން އީވަންސް ކުރި ފައުލަކާ ގުޅިގެން ރެފުރީ ދިން ޕެނަލްޓީއެކެވެ. އަދި މެޗު ނިމެން 10 މިނެޓަށް ވެފައި ވަނިކޮށް ބަދަލަކަށް ކުޅެން ނުކުތް އެމަނުއެލް ޔަގާ ވަނީ އަބްދީޝްގެ ތިންވަނަ ލަނޑު ކާމިޔާބުކޮށްދީފައެވެ.
މި ނަތީޖާއާއެކު މާޒިޔާއިން ޗެލެންޖް ލީގު ނިންމާލީ ކުޅުނު ތިން މެޗުންވެސް ބަލިވެ، ގްރޫޕް ބީގެ ފުލުގައެވެ. ރޭގެ ނަތީޖާއާއެކު ކުވެއިތުގެ އަލް އަރަބި އާއި، ތުރުކުމެނިސްތާން ޗެމްޕިއަން އަރްކަޑަގް އަދި އަބްދީޝަށްވެސް ހަ ޕޮއިންޓް ލިބިފައިވާއިރު، ލަނޑުގެ ތަފާތުން އަބްދީޝް ދިޔައީ ތިންވަނައަށެވެ. އެހެންކަމުން މި ގްރޫޕުން ކުއާޓާ ފައިނަލުގެ ފުރުސަތު ހޯދީ އަލް އަރަބި އާއި އަރްކަޑަގެވެ.