ފުޓުބޯޅައަކީ ގައުމީ މަސައްކަތެއް ކަމަށާއި، އެކަން ކުރިއެރުވުމަށް ކުރާ މަސައްކަތަށް ސަރުކާރުން އެއްބާރުލުން ދެއްވާނެ ކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ. އެ މަނިކުފާނު މިހެން ވިދާޅުވީ، މައިލޯ އެކެޑަމީ ޗެމްޕިއަންޝިޕް 2024- 14 އަހަރުން ދަށުގެ ޢުމުރުފުރާގެ ފުޓްބޯޅަ މުބާރާތް ނިންމުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅުދައްކަވަމުންނެވެ.
ރާއްޖޭގައި ފުޓުބޯޅަ ދިރުވައި އާލާކުރުމަށް ފުޓުބޯޅަ އެކެޑަމީތަކާއި ބެލެނިވެރިން ކުރައްވާ މަސައްކަތްތަކުގެ އަގުވަޒަންކުރައްވަމުން އެމަނިކުފާނު ވަނީ، ފުޓުބޯޅަ ކުރިއެރުވުމަށް އެ ފަރާތްތަކުން ކުރާ މަސައްކަތުގައި ސަރުކާރުގެ ފުރިހަމަ އެހީތެރިކަމާއި އެއްބާރުލުން ލިބޭނެކަމުގެ ޔަޤީންކަން ދެއްވާފައެވެ.
ނަޞްރުގެ ދުވަސް ފަދަ ޤައުމީ އިޙުތިފާލުތައް ކުރިއަށްދާ ދުވަހެއްގައި، ރައީސުލްޖުމްހޫރިއްޔާގެ ނައިބު، ފުޓުބޯޅަ މުބާރާތެއް ނިންމުމުގެ ރަސްމިއްޔާތުގައި ބައިވެވަޑައިގަތުމަށް ހަމަޖެހުމުންވެސް ދައްކުވައިދެނީ ދިވެހި ސަރުކާރާއި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ފުޓުބޯޅައަށާއި ކުޑަކުދިންނަށް ދެއްވާ އަހައްމިއްޔަތުކަން ކަމުގައި އެމަނިކުފާނު ވިދާޅުވިއެވެ.
އަދި މައިލޯ އެކެޑަމީ ޗެމްޕިއަންޝިޕް ފަދަ މުބާރާތްތަކުން، ތަފާތު ހުނަރުތައް ހުރި، ފުޓުބޯޅަ ކުޅުންތެރިން ދިވެހި ފަސްގަނޑުގައި އުފެދެމުންދާކަން ފާހަގަކުރައްވަމުން އެ މަނިކުފާނު ވިދާޅުވީ، ޤައުމީ ފުޓުބޯޅަ ކުރިއެރުވެން އޮތީ، ކޮންމެ ކުއްޖަކުވެސް، ޤައުމީ ފެންވަރުގައި، ޤައުމީ ރޫޙުގައި ކުޅެން މަސައްކަތްކޮށްގެން ކަމަށެވެ.
މައިލޯ އެކެޑަމީ ޗެމްޕިއަންޝިޕް 2024، 14 އަހަރުން ދަށުގެ ޢުމުރުފުރާގެ ކުޅުން ނިންމުމުގެ ރަސްމިއްޔާތު ޝަރަފުވެރިކޮށްދެއްވައި ރައީސުލްޖުމްހޫރިއްޔާގެ ނައިބު ވަނީ، ފައިނަލް މެޗުގެ ކުޅުން ބައްލަވާލައްވާފައެވެ. މުބާރާތުގެ 14 އަހަރުން ދަށުގެ ފައިނަލުގައި ސަސް އެކަޑަމީ ވަނީ 7-0 ގެ ނަތީޖާއަކުން އެޑްވެންޗަރ އެކަޑަމީގެ ބަލިކޮށް އެ އުމުރުފުރާގެ ޗެމްޕިއަންކަން ހޯދާފައެވެ. އެ އުމުރުފުރާގެ ތިންވަނަ ޓީމަކީ ނިއުސްޓާރ ޓީމެވެ.
ނައިބު ރައީސް ވަނީ މެޗުގެ މޮޅު ކުޅުންތެރިޔާއަށާއި ވަނަވަނަ ޙާޞިލުކުރި ޓީމުތަކާއި އޮފިޝަލުންނާއި ރެފްރީންނަށް ތައްޓާއި ހަނދާނީ ލިޔުމާއި އިނާމު ހަވާލުކޮށްދެއްވާފައެވެ. އަދި އެ މަނިކުފާނު ވަނީ ޗެމްޕިއަންޝިޕް ބޯޅައިގައި ސޮއިކުރައްވާފައެވެ.
ބުރާސްފަތި ދުވަހުން ފެށިގެން މިއަދުގެ ނިޔަލަށް ހެންވޭރު ދަނޑުގައި ކުރިއަށްދިޔަ މި މުބާރާތުގެ ނިންމުމުގެ ރަސްމިއްޔާތުގެ އިތުރުން 14 އަހަރުން ދަށުގެ ފައިނަލު މެޗުވެސް ޝަރަފްވެރިކޮށްދެއްވީ ނައިބު ރައީސެވެ. މީގެ އިތުރުން ނިންމުމުގެ ރަސްމިއްޔާތާއި ފައިނަލު މެޗުގެ ހާއްސަ މެހެމާނުންގެ ގޮތުގައި ކޮމިޝަނަރ އޮފް ސްޕޯޓްސް މުޙައްމަދު ޠަލާލް، އާއި އެފްއޭއެމްގެ ނޯމަލައިޒޭޝަން ކޮމެޓީގެ ޗެއާމަން އަހުމަދު ޒުހޫރު ވަނީ ބައިވެރިވަޑައިގެންފައެވެ.
މި މުބާރާތުގައި ގިނަ އެކަޑަމީތަކެއް ބައިވެރިވިއިރު އަތޮޅުތެރެއިން ވަނީ 7 އެކަޑަމީއެއް ބައިވެރިވެފައެވެ. އަދި 23 އެކަޑަމީއަކުން 27 ޓީމު ވަނީ ބައިވެރިވެފައެވެ. ޖުމްލަ 515 ކުދިން މި މުބާރާތުގައި ޖުމްލަ ހިމެނެއެވެ.