ސަބްސިޑީގެ ހައްގުވެރިން ދެނެގަތުމަށް ހަރުދަނާ ނިޒާމެއް ގާއިމްކުރުން މުހިންމު: ގަވަރުނަރު މުނައްވަރު

ސަބްސިޑީ ދިނުމުގެ އުސޫލަށް ގެންނަ ބަދަލުގައި އެހީ އެންމެ ބޮޑަށް ބޭނުންވާ ފަރާތްތައް ދެނެގަތުމަށް ހަރުދަނާ ނިޒާމެއް ގާއިމްކުރުން މުހިންމު ކަމަށް މޯލްޑިވްސް މަނިޓަރީ އޮތޯރިޓީ، އެމްއެމްއޭގެ ގަވަރުނަރު އަހުމަދު މުނައްވަރު ވިދާޅުވެއްޖެއެވެ.

ބަޖެޓު ދިރާސާކުރާ ކޮމެޓީއަށް މާލީ ވަޒީރުގެ އިތުރުން މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީގެ ގަވަރުނަރު އަޙްމަދު މުނައްވަރާއި، އޮޑިޓަރ ޖެނެރަލް ޙުސައިން ނިޔާޒީ ވަނީ ހާޒިރުކޮށްފައެވެ.

މި ބައްދަލުވުމުގައި އެމްއެމްއޭގެ ގަވަރުނަރު އަހުމަދު މުނައްވަރު ވިދާޅުވީ ސަބްސިޑީއަށް ގެންނަ ބަދަލުތަކަކީ ހެޔޮ ބަދަލެއް ކަމަށެވެ. އެހެންނަމަވެސް މިއީ ވަރަށް ރޭވުންތެރިކަމާއެކު ކުރަން ޖެހޭ ކަމެއްކަމަށް ގަވަރުނަރު ވިދާޅުވިއެވެ.

"ދެތިން އަހަރުވެއްޖެ މިކަން ކުރަން އުޅޭތާ، މިކަން ނުވެ އޮތީ، އެކަމަށް ބޭނުންވާ އޮނިގަނޑު ނެތުމުން، އަޅުގަނޑުމެންގެ ލަފައަކީ ރަނގަޅު ޑޭޓާ ބޭސްއެއް ހެދުން، ހުރިހާ މައުލޫމާތު ހިމެނޭ ޑޭޓާ ބޭސްއަކަށް ވާން ޖެހޭ." މުނައްވަރު ވިދާޅުވިއެވެ.

ގަވަރުނަރު ވިދާޅުވީ ހުރިހާ ގޭބީސީއެއްގެ ފުރިހަމަ ޑޭޓާ ބޭސްއެއް އަވަހަށް ހެދުން މުހިންމު ކަމަށެވެ. ސަބަބަކީ އެންމެ ހައްގުވެރި ފަރާތްތައް ހޯދުމަށް މި މައުލޫމާތު މުހިއްމުވާތީ ކަމަށެވެ.

ދައުލަތުގެ ޚަރަދުތަކާ ގުޅޭގޮތުން ވާހަކަފުޅުދައްކަވަމުން ގަވަރުނަރު މުނައްވަރު ވިދާޅުވީ ދައުލަތުން ސްޓޫޑަންޓު ލޯނަށް ކުރާ ހޭދަ އަހަރުން އަހަރަށް އިތުރުވަމުންދާ ކަމަށެވެ. އެހެންކަމުން މިކަމަށް ހައްލުތަކެއް ހޯދަން ޖެހޭ ކަމަށެވެ.

"މީގެ 5 ވަރަކަށް އަހަރު ކުރިން 16 މިލިޔަން ޑޮލަރު ޚަރަދުކުރަމުންދިޔަ ކަމެއް މިހާރު ޚަރަދު ކުރަމުންދޭ 52 މިލިޔަން ޑޮލަރު، މިއީ ރިޒާވަށް ސީދާ އަސަރުކުރަމުން ދާ ކަމެއް،" މުނައްވަރު ވިދާޅުވިއެވެ.

ގަވަރުނަރު މުނައްވަރު ވިދާޅުވީ އަންނަ އަހަރު ވެލާނާ އިންޓަރނޭޝަނަލް އެއަރޕޯޓުގެ އައު ޓަރމިނަލް ބޭނުންކުރަން ފަށާއިރު، ރާއްޖެއަށް އަންނަ ފަތުރުވެރިންގެ އަދަދު އިތުރުކުރުމަށް މަސައްކަތްތަކެއް ކުރަން ޖެހޭ ކަމަށެވެ. އެހެންކަމުން ބަޖެޓުގައި އެކަމަށް ޖާގަ ދޭން ޖެހޭނެ ކަމަށް ގަވަރުނަރުވަނީ ވިދާޅުވެފައެވެ.