ފަތުރުވެރިކަމުގެ ދާއިރާއިން ކުރު މުއްދަތެއްގައި ގިނަ ކާމިޔާބީތަކެއް، ކުރިމަގު އުޖާލާ

ރާއްޖޭގެ އިޤްތިސާދުގެ މައި ލޭނާރަކީ ފަތުރުވެރިކަމެވެ. ރާއްޖޭގެ އިޤްތިސާދީ ހުރިހާ ހަރަކާތެއްވެސް ގުޅިފައިވަނީ މިދާއިރާއާއެވެ.

އިޤްތިސާދުގައި މި ދާއިރާގެ މުހިންމުކަމާއެކު ފަތުރުވެރިކަން ކުރިއެރުވުމަށް ސަރުކާރުން ޚާއްސަ އިސްކަމެއް ދެއްވައެވެ.

މިދާއިރާ ކުރިއެރުވުމަށް ކުރަމުންދާ މަސައްކަތްތަކުގައި މިފާއިތުވީ އެއް އަހަރުދުވެސްތެރޭ ސަރުކާރުން މިވަނީ ބޮޑެތި ކުރިއެރުންތަކެއް ހޯދާފައެވެ. މިކަން އެންމެ ބޮޑަށް ހާމަވެގެންދަނީ ރާއްޖެއަށް އައި ފަތުރުވެރިންގެ އަދަދުތަކުންނެވެ. މިސަރުކާރުން މިއަހަރު ރާއްޖެއަށް ގެނައުމަށް އަމާޒު ހިފާފައިވަނީ 2 މިލިޔަން ފަތުރުވެރިންނެވެ.

ރާއްޖެ އިޝްތިހާރުކޮށް ޕްރޮމޯޓުކުރުމަށް ކުރެވުނު ކާމިޔާބު މަސައްކަތްތަކާއެކު މިއަހަރުގެ ފެބްރުއަރީމަހަކީ ރާއްޖެއަށް އެއްމަސް ދުވަސްތެރޭ އެންމެ ގިނަ އަދަދަކަށް ފަތުރުވެރިން އައި މަހެވެ. އެގޮތުން ފެބްރުއަރީމަސްތެރޭ ރާއްޖެއަށް ވަނީ 217،392 ފަތުރުވެރިން ޒިޔާރަތްކޮށްފައެވެ. އަދި ފާއިތުވީ ތިން އަހަރަށް ބަލާއިރު، ރާއްޖެއަށް ކޮންމެ މަހަކު ފަތުރުވެރިން ޒިޔާރަތްކުރި އަދަދު ނިސްބަތުން ގިނައީ މިއަހަރުއެވެ.

ރާއްޖެއަށް މިހާރު ފަތުރުވެރިން އަންނަ އަދަދުތަކަށް ބަލާއިރު، އަންނަމަހުގެތެރޭގައި ރާއްޖެއިން މިއަހަރަށް ހިފާފައިވާ އަމާޒު ހާސިލްކުރެވޭނެ ކަމަށް ފަތުރުވެރިކަމާ ބެހޭ ވުޒާރާއިން ލަފާކުރެއެވެ.

ސަރުކާރުގެ އަމާޒަކީ ފަތުރުވެރިކަން މުޅި ރާއްޖެއަށް ފުޅާކޮށް ފަތުރުވެރިކަމުން ލިބޭ ނަފާ ވީހާވެސް ގިނަ ރައްޔިތުންނަށް ލިބޭނެ މަގު ތަނަވަސްކޮށްދިނުމެވެ. އެގޮތުން ސަރުކާރުން މިހާތަނަށްވަނީ ފަތުރުވެރިކަން ތަރައްޤީކުރުމަށް 24 ރަށެއް ހުޅުވާލާފައެވެ. މީގެތެރޭގައި ފަޅު ހިއްކައިގެން ރިސޯޓު ތަރައްޤީކުރުންވެސް ހިމެނެއެވެ.

ފަތުރުވެރިކަމާއި ބެހޭ ވުޒާރާއިން ރިސޯޓު ތަރައްޤީކުރުމަށް ބީލަމަށް ހުޅުވާލާފައިވާ ރަށްތަކުގެ ތެރޭގައި ތ، ލ، ހދ، ގދ،ގެ ރަށްތައް ހިމެނެއެވެ.

ފަތުރުވެރިކަން ކުޑަކޮށް ތަރައްޤީވެފައިވާ އަތޮޅުތަކަށް ފަތުރުވެރިކަން ގެންދިޔުމަކީ ގޮންޖެހުންތައް ގިނަ މަސައްކަތެކެވެ. އަދި ރާއްޖޭގެ ފަތުރުވެރިކަން ވަރަށް ބޮޑަށް ވެލާނާ އިންޓަރނޭޝަނަލް އެއަރޕޯޓަށް ބަރޯސާވެފައި އޮތުމުން، އެއަރޕޯޓާއި ދުރު ހިސާބުތަކަށް އިންވެސްޓަރުން ގެންދިޔުމަކީވެސް ފަސޭހަކަމެއް ނޫނެވެ.

އެހެންނަމަވެސް ސަރުކާރުން ދަނީ އިންވެސްޓަރުންގެ ޝައުގުވެރިކަން އިތުރުކުރުމަށްވެސް ގިނަ މަސައްކަތްތަކެއް ކުރަމުންނެވެ. މިކުރެވުނު މަސައްކަތްކާއެކު މިހާތަނަށް މިވަނީ 8 ރަށެއް ފަތުރުވެރިކަމަށް އަލަށް ދޫކޮށްފައެވެ.

ރާއްޖޭގެ ފަތުރުވެރިކަމަށް ދިމާވެފައިވާ އެންމެ ބޮޑު އަދި އެންމެ ޒަމާންވީ މައްސަލައަކީ ރިސޯޓު ތަރައްޤީކުރުމަށް ދޫކޮށްފައިވާ ރަށްތައް ނުހުޅުވި ގިނަ ދުވަސްވުމެވެ. މިކަމަށް ކުރީ ސަރުކާރުތަކުންވެސް ހައްލުތައް ހޯދުމަށް މަސައްކަތްތަކެއް ކުރެވުނެވެ. އެހެން ނަމަވެސް މިކަމަށް ހައްލެއް ހޯދިފައިނުވެއެވެ.
އެކި ސަބަބުތަކާ ހެދި، ފަތުރުވެރިކަމަށް ނުނެރެވި ހުރި ރަށްތަކުގެ ޢަދަދު 58 އަރައެވެ. މީގެތެރޭގައި ފަތުރުވެރިކަމަށް ދޫކޮށް އަދިވެސް ނުހުޅުވި 20 އަހަރު ނުވަތަ 30 އަހަރުވެފައިވާ ރަށް ހުރިކަން ފާހަގަކުރެވެއެވެ. މިރަށްރަށާ މެދު އަމަލުކުރާނެގޮތްތައް އިކޮނޮމިކް ކައުންސިލަށް ހުށަހަޅައި ނިންމާފައިވާއިރު، ފަތުރުވެރިކަމާއި ބެހޭ ޤާނޫނަށް އިސްލާހުތައް ގެނައުމުގެ މަސައްކަތް ބަންޑާރަ ނައިބު ކުރައްވަމުން ގެންދަވާކަމަށް ފަތުރުވެރިކަމާއި ބެހޭ ވުޒާރާއިން ވިދާޅުވެއެވެ.

ފަތުރުވެރިކަމުގެ ދާއިރާއިން ބޭނުންވާ ތަމްރީންތައް ފޯރުކޮށްދިނުމަށްޓަކައި ސަރުކާރުން ވަނީ ރާއްޖޭގައި 5 ތަރީގެ ރިސޯޓެއް ތަރައްގީކޮށް ހޮޓެލް ސްކޫލެއް ގާއިމްކުރުމަށް ގައުމީ ޔުނިވަރސިޓީއާއެކު ފަހުމުނާމާގައި ސޮއިކޮށްފައެވެ. މިމަހުގެތެރޭގައި ސޮއިކޮށްފައިވާ އެއްބަސްވުމުގެ ދަށުން ޓްރެއިނިންގ ރިސޯޓެއް ތަރައްޤީކުރުމަށް ހަމަޖެހިފައިވަނީ ލ. މާމެންދޫ ކައިރީގައި އޮންނަ ހުޅިމެންދޫގައެވެ.

ރާއްޖޭގައި ޓްރެއިނިންގ ރިސޯޓެއް ތަރައްޤީކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ވަޢުދުފުޅާއެއްގޮތަށް ކުރިއަށްގެންދާ މަޝްރޫޢެކެވެ. މިއީ ރާއްޖޭގެ ފަތުރުވެރިކަން އެހެން ހަރުފަތަކަށް ގެންދިޔުމަށް މުހިއްމު މަސައްކަތެކެވެ. ސަރުކާރުގެ އަމާޒަކީ މި މަޝްރޫޢާއެކު ފަތުރުވެރިކަމުގެ މަތީފަންތީގެ ވަޒީފާތަކުގައި ދިވެހިން އިތުރުކުރުމެވެ. އަދި ރާއްޖެއަކީ ބޭރު ޤައުމުތަކުގެ ފަރާތްތައްވެސް ފަތުރުވެރިކަމުގެ ޓްރެއިނިންގ ހޯދަން އަންނަ ޤައުމަކަށް ހެދުމަކީވެސް މި މަޝްރޫއުން ހާސިލްކުރަން ކަނޑައަޅާފައިވާ އަމާޒެކެވެ.

މިގެންނަ ބަދަލުތަކާއެކު ކުރިއަށްއޮތް އަހަރުތަކުގައި ރާއްޖޭގެ ފަތުރުވެރިކަމުގެ ދާއިރާއިން ގިނަ ބަދަލުތަކެއް ފެނިގެންދާނެކަން ޔަޤީނެވެ. ޒަމާންވީ ގިނަ މައްސަލަތަކަކަށް ހައްލުތައް ގެނައުމަކީ ދަތިކަމަކަށްވާނެއެވެ. އެހެންނަމަވެސް ސަރުކާރުގެ އަމާޒު ހުރީ ދާއިރާގައި ހުރި މައްސަލަތަކަށް ހައްލުތައް ހޯދައިދީ، ރައްޔިތުންނަށް އެންމެ މަންފާކުރާނެ ގޮތަށް މަސައްކަތްތައް ކުރިއަށްގެންގޮސް ނިންމުމަށެވެ.