ލުބްނާންގެ އިރުމަތީގައި އޮތް ބަޢަލަބަކައަށް ޔަހޫދީ ފައުޖުން ދިން ނިރުބަވެރި ޙަމަލާތަކެއްގައި ހަ މީހުން ޝަހީދުކޮށްލައި އިތުރު 11 މީހުން ޒަޚަމު ކޮށްލައިފިއެވެ. މިއީ، ލުބްނާންގެ މުސްލިމުންގެ ނަސްލުހޭދު ކުރަން ހިންގަމުންދާ ލާއިންސާނީ ޖަރީމާތަކުގެ ދަށުން ދީފައިވާ ރަޙުމު ކުޑަ ޙަމަލާތަކެކެވެ. ބަޢަލަބަކައިގެ އަލް-ޚަރީބާއަށް ދީފައިވާ ޙަމަލާގައި ޝަހީދު ކޮށްލާފައިވާ މީހުންގެ ތެރޭގައި ތިން ކުޑަކުދިން ހިމެނޭ ކަމުގައި ލުބްނާންގެ ޞިއްޙަތާ ބެހޭ ވުޒާރާއިން ހާމަކުރިއެވެ.
ޒަޚަމު ކޮށްލާފައިވާ މީހުންގެ ތެރޭގައި ވެސް ފަސް ކުޑަކުދިން ހިމެނެއެވެ. ޞިއްޙަތާ ބެހޭ ވުޒާރާއިން ބުނީ، އޭގެ ތެރެއިން ދެ ކުއްޖެއްގެ ހާލު ސީރިޔަސް ކަމުގައެވެ. ބަޢަލަބަކައަށް ޙަމަލާ ދިނުމުގެ ކުރިން ޔަހޫދީ ފައުޖުން ވަނީ ބުރްޖް ރަޙާލާއި ކަފާރް ތަބަނަޔިތަށް ވެސް ރަޙުމު ކުޑަ ޙަމަލާތަކެއްދީ، ޞިއްޙީ ޚިދުމަތްތެރިންގެ ތެރެއިން ދެ މީހުން ޝަހީދު ކޮށްލާފައެވެ. އެ ޙަމަލާތަކުގައި ޞިއްޙީ ޚިދުމަތްތެރިންގެ ތެރެއިން އިތުރު އިތުރު މީހަކު ޒަޚަމު ކޮށްލާފައިވާއިރު، ސުންނާފަތި ކޮށްލާފައިވާ އިމާރާތްތަކުގެ ދަށުވެ، އިތުރު ދެ މީހަކު ގެއްލިފައިވާ ކަން ވެސް ޞިއްޙަތާ ބެހޭ ވުޒާރާއިން ހާމަކުރިއެވެ.
ލުބްނާންގެ ވެރިރަށް ބައިރޫތަށް ވެސް ޔަހޫދީ ފައުޖުން ވަނީ ނުރައްކާތެރި ޙަމަލާތަކެއް ދީފައެވެ. ލުބްނާންގެ ސަލާމަތީ ދާއިރާގެ މަޞްދަރުތަކުން ބުނީ، ބައިރޫތުގެ ދެކުނުގެ 15 ސަރަޙައްދަކަށް ޔަހޫދީ ފައުޖުން ނިރުބަވެރި ޙަމަލާތަކެއް ދީފައިވާ ކަމުގައެވެ. އަދި، ފާއިތުވި 24 ވަރަކަށް ގަޑިއިރުގެ ތެރޭގައި އެ ޤައުމުގެ އެކި ކަންކޮޅުތަކަށް 145 ފަހަރު ޙަމަލާ ދީފައިވާ ކަމުގައެވެ.
ބައިރޫތަށް ދީފައިވާ ޙަމަލާތަކަކީ، އެ ޤައުމުގައި ހަރަކާތްތެރިވާ މުޖާހިދުންގެ ޖަމާޢަތް، ޙިޒްބުاللهގެ މެންބަރުންނަށް އަމާޒުކޮށް ދީފައިވާ ޙަމަލާތަކެއް ކަމުގައި ޔަހޫދީ ފައުޖުން ބުނިފައިވާއިރު، ލުބްނާންގެ އޮފިޝަލުން ބުނީ އެ ޙަމަލާތަަކުގައި އެ ޤައުމުގެ އަސްކަރިއްޔާގެ ސިފައިންގެ މީހަކު ޝަހީދު ކޮށްލާފައިވާ ކަމުގައެވެ. އެ ޙަމަލާތަކުގައި ޝަހީދު ކޮށްލާފައިވާ އިތުރު މީހުންގެ ތަފުސީލު ސާފެއް ނޫނެވެ.
ލުބްނާންގެ މުސްލިމުންގެ ނަސްލުހޭދު ކުރަން ޔަހޫދީ ސިފައިން ލާއިންސާނީ ޢުދުވާނެއް ފަށާފައި ވަނީ ސެޕްޓެންބަރު 23ވަނަ ދުވަހުއެވެ. އެއީ، ޒަޔަނިސްޓު އިސްރާއީލުގެ ރަށްތަކަށް ޙިޒްބުاللهގެ މުޖާހިދުން ދެމުންދާ ޙަމަލާތައް ހުއްޓުވުމުގެ ނަމުގައި ފަށާފައިވާ ލާއިންސާނީ ޖަރީމާތަކެކެވެ. އެއަށްފަހު، އޮކްޓޫބަރު 1ވަނަ ދުވަހު ޔަހޫދީ ފައުޖުގެ ނިރުބަވެރި ސިފައިން ވަނީ އެއްގަމު މަގުން ލުބްނާންގެ ރަށްތަކަށް އަރައި ޤަތުލުޢާންމު ފުޅާކޮށްފައެވެ. ޙިޒްބުاللهން އިސްރާއީލުގެ ރަށްތަކާއި ޔަހޫދީ ފައުޖުގެ އަމާޒުތަކަށް ޙަމަލާ ދޭން ފަށާފައި ވަނީ، މީގެ 13 މަސް ކުރިން ފަލަސްޠީނުގެ ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ލާއިންސާނީ ޖަރީމާތަކެއް ފެށުމާ ގުޅިގެންނެވެ.
ލުބްނާނުގެ މުސްލިމުންނާ ދެކޮޅަށް ހިންގަމުންދާ ޢުދުވާނުގައި ޝަހީދު ކޮށްލާފައިވާ ޢާންމުންގެ ޢަދަދު ވަނީ 3,452އަށް އުފުލިފައެވެ. އޭގެ ތެރޭގައި ގިނަ ޢަދަދެއްގެ އަންހެނުންނާއި ކުޑަކުދިން ހިމެނޭ ކަމުގައި ލުބްނާނުގެ ޞިއްޙަތާ ބެހޭ ވުޒާރާއިން ބުންޏެވެ. އަދި, ޒަޚަމު ކޮށްލާފައިވާ މީހުންގެ ޢަދަދު 14,664އަށް އަރައެވެ. ޔަހޫދީންގެ ޢުދުވާނުގައި ގެދޮރު ނެތިކޮށްލާފައިވާ މީހުންގެ ޢަދަދު 1.2 މިލިޔަނަށް އުފުލިފައިވާއިރު, އދން ބުނީ އޭގެ ތެރެއިން ގިނަ ޢަދަދެއްގެ ބަޔަކު މި ވަގުތު ދިރިއުޅެމުން ދަނީ މަގުތަކުގެ މަތީގައި ކަމުގައެވެ.