83 މިލިޔަން ރުފިޔާ ސަލާމަތްކޮށް، އެހެން ކޮންޓްރެކްޓަރަކާ ހަވާލުކޮށްގެން އަރަބިއްޔާގެ ޢަމަލީ މަސައްކަތް ފަށައިފި

އަރަބިއްޔާ ސްކޫލް އިމާރާތްކުރަން ކުރިން ހަވާލުކުރި ކޮންޓްރެކްޓަރު ހުށަހެޅި އަގަށްވުރެ 83 މިލިޔަން ރުފިޔާ ކުޑަކޮށް އެމަސައްކަތް ރަޝީދު ކާޕެންޓްރީ އެންޑް ކޮންސްޓްރަކްޝަން، އާރުސީސީއާ ހަވާލުކޮށް ސްކޫލް އިމާރާތްކުރުމުގެ ޢަމަލީ މަސައްކަތް ފަށައިފިއެވެ.

އަރަބިއްޔާ ޢަމަލީ މަސައްކަތް ރަސްމީކޮށް ފައްޓަވާދެއްވީ ތަޢުލީމީ ވަޒީރު ޑރ. އިސްމާޢިލް ޝަފީޢުއެވެ.

ޢަރަބިއްޔާ ސްކޫލްގެ ޢަމަލީ މަސައްކަތް ފެށުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ތަޢުލީމީ ވަޒީރު ޑރ. އިސްމާޢިލް ޝަފީޢު ވިދާޅުވީ ސްކޫލްގެ އަމަލީ މަސައްކަތް ފަށަން ސަރުކާރުން ޕްލޭންކުރި ތާރީޚަށްވުރެ ލަސްވެގެންދިޔައީ އެކަމުގައި މުހިއްމު ނިންމުމެއް ނިންމަވަން ޖެހުމުން ކަމަށެވެ. އެގޮތުން ކުރިން މަސައްކަތް ހަވާލުކުރި ކުންފުނިން މަސައްކަތު އަގުގެ ގޮތުގައި ކިޔާފައިވަނީ ބާޒާރު އަގަށްވުރެ ބޮޑުކޮށްކަން ފާހަގަކުރައްވަމުން ވަޒީރު ވިދާޅުވީ ސަރުކާރުން ނިންމީ ފައިސާ ސަލާމަތްކުރުމަށް އެ ކުންފުންޏާއެކު މަސައްކަތް ކުރިއަށްނުގެންދިޔުމަށް ކަމަށެވެ. އަދި އެ ނިންމުމުގެ ސަބަބުން 80 މިލިޔަނަށްވުރެ ގިނަ ރުފިޔާ ސަލާމަތްވިކަމަށް ވަޒީރު ވިދާޅުވިއެވެ.

މިހާރު މަސައްކަތް ހަވާލުކޮށްފައިވާ ރަޝީދު ކާޕެންޓްރީ އެންޑް ކޮންސްޓްރަކްޝަން، އާރުސީސީއިން ކިޔާފައިވަނީ ކުރީ ކުންފުނިން ކީ އަގަށްވުރެ ގާތްގަނޑަކަށް 83 މިލިޔަން ދަށް އަގެއްކަމަށް ވަޒީރު ވިދާޅުވިއެވެ. އަދި މި އަގާއެކުވެސް ޢަރަބިއްޔާ ސްކޫލްގެ ދަރިވަރުންނާއި ބެލެނިވެރިން އެދޭފަދަ ޒަމާނީ ފެންވަރުގެ ސްކޫލެއް އެޅޭނެކަން ވަޒީރު ފާހަގަކުރެއްވިއެވެ.

"ރައްޔިތުންގެ އުންމީދުތަކުގައި ކުލަ ޖައްސާއިރު އަމާނާތެއް އަޅުގަނޑުމެންގެ ކޮނޑުގައި އެޅިފައި އެބައޮތް. އެއީ ރައްޔިތުންގެ ފައިސާ އިސްރާފުނުވާނެ ގޮތަކަށް އަމާނާތްތެރިކަމާއެކު ބޭނުންކުރުން" ވަޒީރު ވިދާޅުވިއެވެ.

ޢަރަބިއްޔާ ސްކޫލަށް ޒަމާނީ ފެންވަރަށް ހިންގޭނެ ޢިމާރާތެއް ނުލިބި ވަނީ ގިނަ ދުވަސްތަކެއް ވެފައެވެ. މިދިޔަ ސަރުކާރުންވެސް ޢަރަބިއްޔާ ސްކޫލް އިމާރާތްކުރަން ވައުދުވީނަމަވެސް ދައުރު ނިމިގެންދިޔައިރުވެސް އެކަމުގައި އަމަލީ ސިފަޖެހިފައެއް ނުވެއެވެ. ނަމަވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އެމަނިކުފާނުގެ ވަޢުދާ އެއްގޮތަށް ޢަރަބިއްޔާ ސްކޫލްގެ ޢަމަލީ މަސައްކަތް ވެރިކަމުގެ ފުރަތަމަ އަހަރުގެ ތެރޭގައި ފައްޓަވާފައެވެ.

ސްކޫލްގެ ޢަމަލީ މަސައްކަތް ފެށުމުން ސްކޫލްގެ ދަރިވަރުންނާއި ބެލެނިވެރިންގެ ބައެއް ޝުޢޫރުތައް ޕީއެސްއެމް ނިއުސްއާ ވަނީ ޙިއްސާކޮށްފައެވެ.

"ރައީސް ޞާލިހުގެ ސަރުކާރުގައިވެސް ޢަރަބިއްޔާ އަޅަން އުޅުނު. ނަމަވެސް މަސައްކަތް ފެށޭ ގޮތް ނުވިތަން ފެނުނީ. ނަމަވެސް މިއަދު ރައީސް މުޢިއްޒު މިވަނީ އެ މަސައްކަތް ފައްޓަވާދެއްވާފައި. ރައީސަށް ވަރަށް ޝުކުރުވެރިވަން" ބެލެނިވެރިޔަކު ބުންޏެވެ.

ޢަރަބިއްޔާ ސްކޫލުގެ އައު އިމާރާތުގައި 42 ކްލާސް ރޫމާއި، މަލްޓިޕާޕަސް ހޯލަކާއި، 4 ލިފްޓުގެ އިތުރުން ސްކޫލެއްގައި ހުންނަންޖެހޭ ހުރިހާ ވަސީލަތެއް ފުރިހަމަވެފައި ހުންނާނެ ކަމަށް ތަޢުލީމީ ވުޒާރާއިން ވިދާޅުވިއެވެ.

އަދުގެ ސަރުކާރުން ވަނީ މަޝްރޫޢުގެ ޑިޒައިނަށް ބަދަލުތަކެއް ގެނެސް 10 ފަންގިފިލާއަށް އެޅުމަށް ނިންމާފައެވެ. ސަރުކާރުގެ އަމާޒަކީ 2 އަހަރު ދުވަހުން ސްކޫލް އިމާރާތުގެ މަސައްކަތް ނިންމާލުމެވެ.

ޢަރަބިއްޔާ ސުކޫލްގެ އައު އިމާރާތް ވެގެންދާނީ ރާއްޖޭގައި އެންމެ ފުރަތަމަ އަންޑަރ ގްރައުންޑް ޕާކިން އަކާއެކު ތަރައްޤީކުރާ ފުރަތަމަ ސުކޫލް އިމާރާތައްކަމަށް ތަޢުލީމީ ވަޒީރު ޑރ. އިސްމާޢިލް ޝަފީޢު ވިދާޅުވެއެވެ.