މަސްވެރިކަމުގެ 25 އަހަރުގެ މާސްޓަރ ޕްލޭނެއް އެކުލަވާލުމުގެ މަސައްކަތް ފަށައިފި

މަސްވެރިކަމާ ކަނޑުގެ ވަސީލަތާ ބެހޭ 25 އަހަރުގެ މާސްޓަރ ޕްލޭނެއް އެކުލަވާލުމުގެ މަސައްކަތް މަސްވެރިކަމާ ބެހޭ ވުޒާރާއިން ފަށައިފިއެވެ.

މަސްވެރި ސިނާއަތް ތަރައްގީކޮށް ސިންދަފާތުކޮށް ކުރިއެރުވުމަށް ކުރާ ކަންތައްތަކަކީ ވެސް ރޭވި ކުރެހިފައިވާ އިސްތިރާޖީ ޕްލޭނެއްގެ ދަށުން ކުރިއަށް ގެންދާ ކަންތައްތަކަށް ހެދުމަށް ޓަކައި މަސްވެރި ވުޒާރާއިން ވަނީ ކުރިއަށްއޮތް 25 އަހަރަށް މަސްވެރިކަމާއި ކަނޑުތަކުގެ މާސްޓަރ ޕްލޭނެއް އެކުލަވާލުމަށް ނިންމާފައެވެ. އެ މަސައްކަތުގެ ދަށުން މިހާރު ޕްލޭނިންގެ މަސައްކަތް ފަށާފައިވާކަމަށް މަސްވެރިކަމާއި ބެހޭ ވުޒާރާއިން ވަނީ ވިދާޅުވެފައެވެ.

މަސްވެރިކަމާއި ބެހޭ ވުޒާރާއިން ވިދާޅުވީ، މި އިސްތިރާޖީ ޕްލޭނުގައި ކުރިއަށް އޮތް 25 އަހަރު މަސްވެރި ސިނާއަތުން ހާސިލްކުރަން ބޭނުންވާ ކަންކަމާއި ތަސައްވުރާއި އަމާޒު ކަނޑައަޅާނެކަމަށެވެ. އަދި ކަނޑުތަކުގެ ވަސީލަތް ފުރިހަމައަށް ބޭނުންކޮށް އިގްތިސާދީ ނަފާ އިތުރުކުރުމަށް ލަނޑުދަނޑިތަކެއް ރޭވި އެކަން ހާސިލުކުރުމަށް ކުރާނެ ކަންކަން މި ޕްލޭނުގައި ހިމެނިގެން ދާނެކަމަށް އެ ވުޒާރާއިން ވިދާޅުވެއެވެ.

މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާއިން ވިދާޅުވީ، މި މާސްޓަރ ޕްލޭން އެކުލަވާލުމަށް ބޭނުންވާ ފައިސާ ވޯރލްޑް ބޭންކުގެ އެހީގައި ހަމަޖެހިފައިވާކަމަށެވެ.

ދިވެހި ރާއްޖޭގެ ތަރައްގީއަށް ކުރެވޭ ކަންކަމަކީ ރޭވިފައިވާ ޕްލޭނެއްގެ ދަށުން ކުރާ ކަންތައްތަކަށް ހެދުމަށްޓަކައި ގާނޫނަކުން ބާރުލިބޭ ޤައުމީ ތަރައްގީގެ 20 އަހަރުގެ ޕްލޭނެއް އެކުލަވާލުމަކީ ރައީސް ޑރ. މުޙައްމަދު މުޢިއްޒުގެ މުހިންމު ވައުދުފުޅެކެވެ. އެ މާސްޓަރ ޕްލޭން އެކުލަވާލުމުގެ މަސައްކަތްވެސް މިހާރު ވަނީ ފަށާފައެވެ.