ހަޤީގަތް ހަމާކުރުމަށްނަމަވެސް، އެހީގެ ތަފްސީލް ހާމަކުރެވުނީތީ މައާފަށް އެދެން: އެންސްޕާ

އެންސްޕާއިން މީހަކަށް ހަމަޖައްސައިދެއްވި އެހީއެއްގެ ތަފްސީލްތައް ހާމަކުރުމަކީ އެންމެ ރަނގަޅު ގޮތް ނޫންކަމަށާއި، އެކަމަށް މައާފަށް އެދޭކަމަށް ނެޝަނަލް ސޯޝަލް ޕްރޮޓެކްޝަން އޭޖެންސީ، (އެންސްޕާއިން) އިން ވިދާޅުވެއްޖެއެވެ.

އެންސްޕާއިން ވިދާޅުވީ އެ އެޖެންސީއަކީ ރައްޔިތުންގެ އިޖްތިމާޢި ރައްކާތެރިކަމާއި ރައްޔިތުންނަށް މާލީ އެހީތެރިކަން ފޯރުކޮށްދިނުމަށް ހިންގަމުންދާ އޭޖެންސީއެއް ކަމަށެވެ. ނަމަވެސް ބަލިމީހަކަށް އެންސްޕާއިން އެހީ ނުދިން ކަމަށްބުނެ މީސްމީޑިއާގައި ދޮގު މަޢުލޫމާތުތައް ފަތުރަމުންދިއުމާއި ގުޅިގެން، އެ ކަން ހިންގައި ދިޔަގޮތުގެ ތަފްސީލް ހާމަކުރުމުގެ ގޮތުން އެ އެޖެންސީގެ ފަރާތުން ބަޔާނެއް ނެރުނުކަމަށެވެ.

އެންސްޕާއިން ވިދާޅުވީ އެ ބަޔާނުގައި ބަލިމީހާގެ ޒާތީ އެއްވެސް މައުލޫމާތެއް ހިމަނާފައި ނުވާކަމަށެވެ. ނަމަވެސް އެމީހާއަށް ދިން އެހީގެ ތަފްސީލް ހިމެނިކަމަށާއި، އެއީ އެކަން ކުރަން އެންމެ ރަނގަޅު ގޮތް ނޫންކަމަށްވެސް އެންސްޕާއިން ވިދާޅުވިއެވެ. އެހެންކަމުން އެ ތަފްސީލްތައް އާންމުކުރެވުނީތީ މައާފަށް އެދޭކަމަށްވެސް އެންސްޕާއިން އެކަމާއި ގުޅިގެން ނެރުއްވި ބަޔާނުގައިވެއެވެ.