ވިލިމާލޭ ހޮސްޕިޓަލުގެ ޢަމަލީ މަސައްކަތް އަންނަ އަހަރުގެ މެދުތެރޭގައި ފެށޭނެ

ވިލިމާލޭގައި ތަރައްޤީކުރާ 100 އެނދުގެ ހޮސްޕިޓަލްގެ ޢަމަލީ މަސައްކަތް އަންނަ އަހަރުގެ މެދުތެރޭގައި ފެށޭނެކަމަށް މާލޭ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާޤް ޙަލީމް ވިދާޅުވެއްޖެއެވެ.

ވިލިމާލޭ ހޮސްޕިޓަލާއި ގުޅޭގޮތުން މިހާރު ކުރިއަށްދަނީ ކޮންޓްރެކްޓް އެކުލަވާލުމުގެ މަސައްކަތްތައްކަމަށް އިބްރާހީމް ޢަބްދުރައްޒާޤް ޙަލީމް ވިދާޅުވިއެވެ.

އާބާދީގައި 15،000 އެއްހާ މީހުން ދިރިއުޅޭ ވިލިމާލޭގައި ހުރި ހޮސްޕިޓަލަކީ އަބާދީއަށް ޚިދުމަތް ފޯރުކޮށްދެވޭނެ އިންތިޒާމު ޤާއިމުވެފައި ނެތް ހޮސްޕިޓަލެކެވެ.
ވިލިމާލޭގައި މިހާރު ބޭނުންކުރާ ހޮސްޕިޓަލުގައި ބޭނުންކުރަނީ އެމަޖެންސީ 5 އެނދެއެވެ. އަދި ހޮސްޕިޓަލުގައި ހުރީ ބަލި މީހުން ބަލާ 3 ކޮޓަރިއެވެ.
ނަތީޖާއެއްގެ ގޮތުން އެންމެ ޢާއްމު ކަންކަމުގައިވެސް ގިނަ ފަހަރު އައިޖީއެމްއެޗަށް ނުވަތަ ދަރުމަވަންތައަށް ދާންޖެހުމަކީ ވިލިމާލޭ ރައްޔިތުންގެ އޮތް ބޮޑު ކަންބޮޑުވުމެކެވެ. މިކަމަށް ޙައްލެއް ގެނެސްދިނުމަށް ސަރުކާރުން މިހާރުވަނީ ވިލިމާލޭގައި 100 އެނދުގެ ޓާޝަރީ ހޮސްޕިޓަލެއް ތަރައްޤީކުރުމުގެ މަސައްކަތް ފައްޓާވާފައެވެ.

މިމަޝްރޫޢާ ގުޅޭގޮތުން ވާހަކަދައްކަވަމުން މާލޭ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާޤް ޙަލީމް ވިދާޅުވީ، މަޝްރޫޢުގެ ކޮންޓްރެކްޓް އެކުލަވާލުމަށްޓަކައި ކުރަންޖެހޭ މުހިއްމު މަސައްކަތްތައް ކުރަމުންދާކަމަށެވެ. އެގޮތުން ދިވެހި ސަރުކާރާއި ޗައިނާ ސަރުކާރާއި ގުޅިގެން ކުރެވުނު މަޝްވަރާތަކަށްފަހު، މިނިޓްސް އޮފް ދަ މީޓިންގްސްގައި ސޮއިކުރެވި މިހާރު ކުރަމުންދަނީ ކޮންޓްރެކްޓް އެކުލަވާލުމުގެ މަސައްކަތްތައްކަމަށް އިބްރާހީމް ޢަބްދުއްރައްޒާޤް ޙަލީމް ވިދާޅުވިއެވެ.

"މިހާރު ކުރަމުންދަނީ ކޮންޓްރެކްޓް އެކުލަވާލުމުގެ މަސައްކަތްކުރަމުން. އުއްމީދުކުރެވެނީ އަންނަ އަހަރުގެ މެދުތެރޭގައި ޢަމަލީ މަސައްކަތް ފެށިގެންދާނެކަމަށް." ސީއީއޯ ވިދާޅުވިއެވެ.

ވިލިމާލޭ ހޮސްޕިޓަލުގެ މަސައްކަތްކުރުމަށް ބޭނުންވާ ފީސިބިލިޓީގެ މަސައްކަތްކުރުމަށް ޗައިނާގެ ސިޑްކާ ކުންފުނިންވަނީ ދިރާސާތަކެއްކޮށްފައެވެ. ޓެންޑަރިން މަރުޙަލާގައި އޮންނަ 6 މަސްދުވަހުގެ ތެރޭގައި މިމަސައްކަތް ކުރާނެ ކުންފުންޏެއް ހޯދުމުގެ މަސައްކަތް ޗައިނާއިން ކުރިއަށްގެންދާނެކަމަށެވެ. އަދި އަންނަ އަހަރުގެ މެދުތެރޭގައި ޢަމަލީ މަސައްކަތް ފަށާ، ކުރިއަށް އޮތް 2 އަހަރުގެ ތެރޭގައި މަސައްކަތް ނިމެނޭނެކަމަށް ސަރުކާރުން ވިދާޅުވެއެވެ.